Сывӕллон бафӕлмӕцы. Ахуыры фыццаг бонтӕ сывӕллонӕн гӕнӕн ис уа цыппар нӕ, фӕлӕ фондз кӕнӕ ӕхсӕз урокы. Хӕдзарон куыстытыл иууыл къаддӕр бахъӕуы 1,5 сахат рӕстӕг, хатт ӕнӕхъӕн изӕр. Уӕлдай зын у лицей ӕмӕ гимназы ахуырдзаутӕн, уым «кусгӕ бон» бирӕ фылдӕр у. Фактон ӕгъдауӕй скъола исы сӕрибар рӕстӕг иууылдӕр: сывӕллӕттӕ ахуыр кӕнынц 12-14 сахаты, стӕй цӕуынц музыкӕ, кӕнӕ спортивон секцитӕм, аразынц хӕдзары сӕ уроктӕ ӕмӕ изӕр бынтон ӕдыхӕй бафынӕй кӕнынц. Скъоладзаутӕн нӕй нормалонӕй баулӕфыны, тезгъо кӕныны, ӕмбӕлттимӕ аныхас кӕныны рӕстӕг ӕмӕ сӕ уый ӕркӕны хроникон фӕлладдзинады синдроммӕ. Бӕрӕг у, ӕгӕр интеллектуалон уӕз ӕвзӕрӕрдӕм ӕндавы сывӕллоны ӕнӕниздзинадыл.
Къаддӕр змӕлы. Физиологтӕ ӕмӕ педиатртӕ куыд нымайынц, афтӕмӕй скъолайы кӕстӕр ӕмӕ астӕуккаг кары сывӕллӕтты активондзинады дефицит схизы 30-40 процентмӕ хистӕркъласонтӕн та – 8 процентмӕ. Ахуыры иумӕйаг рӕстӕг, факультативтӕ ӕмӕ хӕдзармӕ хӕслӕвӕрдтӕ ӕххӕст кӕнын нымайгӕйӕ, ахӕссы 9 сахаты.
Хӕдзармӕ ӕрцӕугӕйӕ, бирӕ сывӕллӕттӕ компьютеры кӕнӕ телевизоры раз фӕбадынц 2 сахаты бӕрц. Афтӕмӕй скъоладзау ӕнӕзмӕлгӕйӕ фӕвӕййы суткӕйы ӕмбисы бӕрц. Уый фӕстиуӕг сывӕллонмӕ фӕзыны уӕлдай уӕз, иммунитет фӕныллӕгдӕр вӕййы, йӕ уӕнгты конд фӕивы ӕмӕ а.д.
Стресстӕ. Скъолайы ахуыргӕнинаджы ӕнӕниздзинад кӕй февзӕрдӕр вӕййы, уый баст у, нуӕртты системӕйыл уӕлдай уӕз кӕй цӕуы, уыимӕ. Сывӕллон ӕдзух тагъд кӕны, ӕнхъӕлмӕ кӕсы урокы фӕудмӕ, улӕфтбонты, каникулты ӕрбалӕудмӕ. Ӕппӕт уыдӕттӕ ӕркӕнынц хроникон эмоционалон сытынгдзинӕдтӕм. Уымӕй дарддӕр ма скъола у ахӕм бынӕт ӕмӕ дзы ӕнкъараг, импульсивон, йӕхиуыл чи не ‘ууӕнды, ахӕм сывӕллон йӕхи хорз нӕ фӕхаты. Арӕх стрессмӕ ӕркӕнынц ӕхуыргӕнджытӕ ӕмӕ къласонтимӕ конфликттӕ. Уыдон мӕгуырауырдӕм ӕндавынц сывӕллӕтты психикон ӕмӕ физикон ӕнӕниздзинадыл.
2024-09-17
