Нӕ горӕты Сывӕллӕтты сфӕлдыстады галуаны фыццаг хатт уагъд ӕрцыд республикон фотоконкурс «Мæ Райгуырæн бæстæ», зæгъгæ. Конкурсы хайад райстой нæ горæты скъолаты æмæ скъолайы кары агъоммæйы уагдæтты ахуыргæнджытæ, афтæ ма районты Сфæлдыстадон хæдзæртты кусджытæ дæр. Мадзалы организатор уыд горæт Цхинвалы Сывæллæтты сфæлдыстады галуан Хуссар Ирыстоны Ахуырад æмæ зонады министрады æмархайдæй.
Фотоконкурсы хайад райстой 50-йæ фылдæр хайадисæджы. Йæ сæйраг нысан уыд къамты фæрцы ахуыргæнджыты патриотон æнкъарæнтæ сæ райгуырæн бæстæмæ рæзын кæнын.
Фотоконкурсы цы къамтæ равӕрд ӕрцыдысты, уыдонӕн аргъ кодтой жюрийы уӕнгтӕ – Ахуырад ӕмӕ зонады министрады ӕмӕ Нывгӕнджыты цӕ-дисы минӕвӕрттӕ, скъолайы кары агъоммæйы уагдæтты ахуыргӕнджытӕ ӕмӕ информацион агентад Sputnik-ы профессионалон нывисджытӕ. Конкурсы хатдзæгтæм гæсгæ жюри рахицæн кодтой 15 уæлахиздзауы ахæм номинациты: «Лица моей Родины», «Архитектура моей Родины» æмæ «Природа моей Родины». Жюрийы уæнгтæ лæмбынæгæй базонгæ сты æмæ афтæмæй баллтæ нывæрдтой 80 фылдæр куыстæн. Уыдон къамтæн аргъ кодтой ахӕм критеритӕм гӕсгӕ: сæ аивадон æмвæзад, оригиналондзинад, композици æмæ сæ гъæдмæ гæсгæ. Ахуыргæнджытæ равдыстой активондзинад. Ууыл дзурæг уыдысты сæ бирæнымæц куыстытæ. Хъыгагæн, иуæй-иу куыстытæ æвзарæн этапмæ нæ бахаудтой, конкурсы хайад райсыны уавæртæн æмбæлон кæй нæ уыдысты, уымæ гæсгæ.
Фӕуӕлахизуӕвджытӕ ӕмӕ призертӕ хорзӕхджын ӕрцыдысты I, II, III къӕпхӕнты дипломтӕй. Жюрийы уӕнгтӕ куыд банысан кодтой, афтӕмӕй къамты ӕхсӕн уыдис тынг бирӕ аив ӕмӕ зӕрдӕмӕдзӕугӕ куыстытӕ, уымӕ гӕсгӕ зын уыд уæ-лахиздзауты равзарын.
Кокайты Зæринæ
