15-æм январы Президент Бибылты Анатоли æмбырд ауагъта министрадтæ æмæ ведомствоты къухдариуæггæнджытæн, районты администрациты сæргълæуджытæн. Æмбырды куысты ма хайад райстой Парламенты депутаттæ æмæ дзыллон информацийы фæрæзты кусджытæ.

Ног азы æрбалæуды цытæн сын Президент ноджыдæр зæрдæбын ногазон арфæтæ ракодта æмæ банысан кодта, зæгъгæ, мæн уырны 2018 аз нæ республикæйы цæрджытæн алы хъуыддаджы дæр кæй уыдзæнис хорз æмæ æнтыстджын. Æмæ цæмæй афтæ уа, уый тыххæй та мах алцы дæр сараздзыстæм. Уый фæстæ Бибылты Анатоли æрæмбырдуæвджыты хъусдард аздæхта Уæрæсейы Федерацийы Президенты  æвзæрстытæм цæттæгæнæн куыстытæм.

«Æз зонын, Централон æвзарæн къамис æнгом куыст кæй кæны Уæрæсейы Федерацийы минæварадимæ. Фæлæ ныридæгæн бакусын хъæуы ууыл, цæмæй æвзæрстытæ ацæуой куыд æмбæлы, афтæ, æнæкъуылымпыйæ. Нæ республикæйы цæрджытæн сæ фылдæр хай Уæрæсейы æмбæстæгтæ кæй сты, уымæ гæсгæ хъуамæ спайда кæной сæ æмбæстагон бартæй æмæ хайад райсой Уæрæсейы Федерацийы Президентон æвзæрстыты. Уый тых-хæй та хъуамæ арæзт æрцæуа æппæт уавæртæ дæр», – загъта Президент æмæ банысан кодта, цæмæй ныридæгæн кусын райдайой ацы фарстытыл, сæ хъусдард аздахой æвзарæн фадгуыты æмбæлон уавæртæ саразынмæ. Ацы хъуыддаджы та хъуамæ хъæппæрис равдисой администрациты сæргълæуджытæ. Уыдон  хъуамæ бакусой æвзарæн фадгуыты агъуыстыты æмбæлон уагмæ æркæныныл, куыстмæ сæ сифтонг кæныныл. Уымæй дарддæр сæ хъæудзæнис транспортæй сифтонг кæнын. Йæ бон кæмæн не суа æвзарæн фадгуытæм æрбацæуын, уатон рынчынтæ чи сты, уыдонмæ та цæмæй бацæуой хæдзæрттæм. Æппæт уыцы фарстытæ хъуамæ скъуыддзаг цæуой Централон æвзарæн къамис æмæ Уæрæсейы Федерацийы минæварадимæ оперативон æгъдауæй. Дарддæр Бибылты Анатоли йæ хъусдард аздæхта информацион фæрæзты кусджытæм, уыдон хъуамæ развæлгъау зоной, цафон æмæ кæдмæ хъуамæ кусой æвзарæн фадгуытæ, цæмæй рæстæгыл информаци хæццæ кæной нæ республикæйы территорийыл уæвæг уæрæсейаг æмбæстæгтæм.

Уый фæстæ Президент бахатыд æрæмбырдуæвджытæм, цæмæй Централон æвзарæн къамисы домæнтæм сæ хъус дарой, уой цырддзаст, дзуапп кæной рæстæгыл æмæ ма бафæстиат уой иу кæнæ иннæ информаци    рæстæгыл  фехъусын кæнын. Æмæ Централон æвзарæн къамисы сæрдар Плиты Беллæйæн бацамыдта, цæмæй сæ домæнтæ   хынцыд цæуой нæ паддзахадон структурæтимæ. Кæд исты фарстытæ æвзæра администрациты, ведомствоты æмæ министрадты кусджытæм, кæд искæцы фарст аскъуыддзаг кæныны тыхсой, уæд, зæгъгæ, æз цæттæ дæн уæ фарсмæ балæууынмæ. Æвзæрстытæ æнæмæнг хъуамæ ацæуой бæрзонд æмвæзадыл.

«Фылдæр æвзарæн фадгуытæ горæты кæй уыдзысты, уымæ гæсгæ горæты администраци æппæт организацион фарстытæ скъуыддзаг кæндзæн уемæ уынаффæ кæнгæйæ», – загъта Президент.

Æмбырды йæ хъуыдытæ загъта Уæрæсейы Федерацийы минæвар Хуссар Ирыстоны Марат Кулахметов.

– Хуссар Ирыстоны территорийыл цы æвзарæн фадгуытæ хъуамæ байгом уа, уыдонæй иу уыдзæнис Уæрæсейы минæварады бæстыхайы территорийыл, иннæтæ та – нæ горæты 1-æм, 5-æм æмæ 6-æм астæуккаг скъолаты, Профцæдисты хæдзары, Знауыры, Дзауы, Ленингоры æмæ Цхинвалы районы Дменисы хъæуы администрацийы агъуысты. Уымæ гæсгæ курæг дæн администрациты сæргълæу-джытæй, цæмæй æвзарæн фадгуыты агъуыстыты бацæттæ кæной, фæн-дæгтæ уой æмбæлон уавæры, ифтонг уой транспортæй, цæмæй æвзарæн къамисы уæнгтæн фадат уа, сæ бон æвзарæн фадгуытæм цæуын кæмæн нæу, уыдонмæ хæдзармæ бацæуын. Хуссар Ирыстоны территорийыл цæрæг æмбæстæгтæ хъуамæ спайда кæной се ‘мбæстагон барæй», – загъта Марат Кулахметов. Уый ма банысан кодта, зæгъгæ, 16-æм февралæй 23 февралмæ хъуамæ баконд æрцæуой æвзарæн фадгуытæ æмæ æрæвналой   цæттæгæнæн куыстытæм.

Йæ рады Централон æвзарæн къамисы сæрдар Плиты Беллæ дæр загъта, зæгъгæ, мах цæттæ стæм æвзæрстытæм. Æрмæст ис иу цухдзинад – нæ ифтонггæрзтыл нæй Хуссар Ирыстоны герб. Фæлæ уыцы хъуыддаг аиуварс кæнын афтæ зын нæ уыдзæн. Беллæ ма куыд банысан кодта, афтæмæй уыдон развæлгъау сбæрæг кæндзысты, Хуссар Ирыстоны территорийыл цæрæг уæрæсейаг æмбæстæгтæй йæ бон йæхицæн æрбацæуын кæмæн нæу, уыдоны номхыгъдтæ.

Бестауты Валя

Comments are closed, but trackbacks and pingbacks are open.