Инциденттæ ма æруадзын æмæ сæм хъусдард здахыны фæдыл механизмты фæлгæтты куыст дарддæр цæуы хуссарирыстойнаг-гуырдзиаг арæнмæ æввахс цæрæн пункт Эргнеты.
Механизмты куысты хайад истой Хуссар Ирыстон, Гуырдзыстон, Уæрæсейы Федераци, ЕÆÆО æмæ Евроцæдисы минæвæрттæ.
Фембæлдæн фæстиуджытæ аразгæйæ, Хуссар Ирыстонæй делегацийы сæргълæууæг, РХИ-йы Президенты Паддзахадон уынаффæгæнæг Санахъоты Дауыт банысан кодта, зæгъгæ, дзырд цыд арæныл сæвзæргæ инциденттыл.
«Механизмты фæстаг фембæлдæй радон фембæлдмæ арæныл æнæзакъонæй хизыны фæстиуæгæн ахст æрцыд 22 гуырдзиаг æмбæстаджы. Уыдонæй ма дыууæ у ахст, иннæтæ сæрибар æрцыдысты.
Уымæй дарддæр гуырдзиаг фарс радон хатт раразмæ кодта Башарулийы тыххæй хъуыддагмæ ногæй æркæсын.
Паддзахадон арæнимæ баст фарстатæм здæхт æрцыд уæлдай хъусдард. Паддзахадон арæнтæ цы бынæтты цæуынц, уымæ æввахс цæрæг æмбæстæгтæн къаддæр æвзæры арæныл æнæзакъонæй хизыны фæдыл проблемæтæ», — банысан кодта Дауыт.
Гуырдзиаг фарс ма рæгъмæ рахаста, зæгъгæ, Цхинвалы районы Хеиты хъæуы Бондо Гочашвилийы уæлмæрды æбæрæг æмбæстæгтæ æнæуаг митæ бакодтой. Уыцы хъуыддаджы тыххæй хуссарирыстойнаг фарс дæр азымджын кæны вандалон акттæ аразджыты. Санахъойы фырты ныхæстæм гæсгæ, æркæсдзысты ацы хъуыддагмæ — уæлмæрды уавæрмæ.
Паддзахадон арæнтæ фылдæрбæрцæй баст сты æдасдзинадыл, уый фæстæ та алыхуызон гуманитарон фарстатыл: паддзахадон арæнтæ æнæрхъуыдыйæ фехалын, æгомыг фос арæнтыл ахизын. Хуссар Ирыстонæй делегацийы сæргълæууæг куыд загъта, афтæмæй гуырдзиаг фарсæн загътой дыууæфарсон къамис — гуырдзиаг-ирон къамис саразын арæнтæ делимитаци æмæ демаркацийы фæдыл, цæмæй арæнтæ раст æмæ лæмбынæгæй бæрæг æрцæуой æмæ сæвзæргæ проблемæтæ хуымæтæг уавæрты скъуыддзаг цæуой. Уымæй дарддæр хуымæтæг цæрджыты проблемæтæ дæр цыбыр рæстæгмæ скъуыддзаг цæуиккой.
Нæ уацхæссæг
Comments are closed, but trackbacks and pingbacks are open.