Рæстæг дугъон бæхæй хъауджыдæр нæу. Азтæ кæрæдзийы фæстæ афтæ тагъд лидзынц æмæ сæ адæймаг  хатгæ дæр нал кæны, кæмдæр рохуаты тыгъдады бамыр вæййынц. Абон, 7-æм декабры Дзауы скъола-интернаты  сырæзтыл сæххæст 55 азы.

«Ныртæккæ Дзауы скъола-интернаты ахуыр кæнынц 79 ахуыргæнинаджы. Ахуырадон уагдоны кусы 28 ахуыргæнæджы æмæ 18 хъомылгæнæджы, афтæ ма техникон персонал дæр. Ахуырдзаутæй бирæтæ, ома, дæрддаг хъæутæй чи цæуы, уыдон æрлæууынц æхсæвиуат кæнынмæ дæр. 1-аг уæладзыджы ахуыр кæнынц райдиан кълæсты ахуырдзаутæ æмæ 2-аг уæладзыджы та – 5-11 кълæсты скъоладзаутæ. Цалдæр азы размæ бæстыхайы æрцыд зынгсирвæзт, фæлæ Президент Бибылты Анатолийы хъусдарды фæрцы абон скъола-интернаты арæзт æрцыд æппæт уавæртæ дæр ахуыры процессæн. 2-аг уæладзыджы ис компьютерон кълас, ирон æвзаг æмæ литературæйы, биологи, химийы кабинеттæ, кæцытæй алкæцыйы дæр ис интерактивон фæйнæджытæ, сывæллæттæн хъазæн хатæн, 3 фынæйгæнæн хатæны, афтæ ма  чызджытæн фæллойы кабинет дæр. Ис ма дзы актон зал, медцицинон кабинет æмæ æндæртæ. Хатæнтæ хъарм цæуынц газæй. Скъолайы кæрты ис футболы, баскетбол æмæ волейболы фæзтæ. Стыр бузныг зæгъын мæ фæнды Президентæн йе ‘дзухон хъусдарды тыххæй», – радзырдта нын скъола-интернаты директор Галуанты Залинæ.

Дзауы скъола-интернаты сырæзты историйæ

1964 аз. Æнæхъæн Хуссар Ирыстоны автономон областыл айхъуыст  Дзауы поселочы скъола-интернат йæ дуæрттæ кæй бакодта, уыцы цины хабар. Уæды рæстæджы Дзауы ком нæргæ ком уыд, цард дзы цæдджинагау фыхт, дæрддаг æвадат хæххон хъæуты дæр цард тынг бирæ адæм, Дзомагъгом æмæ Тлийæ райдайгæйæ æмæ районы æндæр хъæутæй фæугæйæ. Ацы хъæуты алыран скъола нæ уыд æмæ-иу сæ цæрджыты бахъуыд сæ сывæллæтты Дзауы астæуккаг скъоламæ, кæнæ та Цхинвалы скъолатæм бакæныны сæр. Фæлæ хъæуты цæрджытæй Дзау æмæ Цхинвалы алкæмæн хион кæм уыд æмæ-иу сæ сывæллæттæн баххуырстой фатертæ, æрвылмæй фатеры мызд фидын та ныййарджытæй алкæйы бон кæм уыд, уымæй дæр сæ фылдæр бирæсывæллонджын æмæ цыбыркъух уыдысты. Уымæ гæсгæ Дзауы скъола-интернат арæзт куы æрцыд уæд сæ цинæн кæрон нал уыд. Ахуырадон уагдон скъоладзаутæн йæ дуæрттæ уæрæхæй байгом кодта 1964 азы 7-æм декабры.

Арæзт æрцыд дыууæ æртæуæладзыгон корпусы – сæ иу уыд ахуыры процесс кæм цыд æмæ иннæ та фынæйгæнæн корпус.  Бæстыхæйтты уыд æппæт уавæртæ дæр, хатæнтæ уыдысты райдзаст. Ахуыргæнинæгтæн хицæнæй арæзт æрцыдысты хæрæндон æмæ хинайæн бæстыхæйттæ дæр. Иудзырдæй адæймаг дзы ницæуыл фæтыхстаид, æрмæстдæр ахуыр кæн. Уый базонгæйæ, куыд районы цæрджытæ, афтæ Цхинвалы районтæй æмæ æндæр рæттæй дæр ныййарджытæ сæ сывæллæтты кодтой ацы скъоламæ.

1964 азы Дзауы скъола-интернат куы байгом, уæд ын директорæй нысан æрцыд дзауаг Коцты Яков Тотрадзы фырт. Уый разынд диссаджы къухдариуæггæнæг, уымæн æрдзæй ратгæ уыд къухдариуæггæнджы курдиат. Цыбыр рæстæгмæ йæ алыварс æрбамбырд кодта тынг хорз æнгом коллектив, раст сæ цыма æвзаргæ ракодта, уыйау амæй-ай хуыздæр ахуыргæнджытæ райдыдтой кусын скъола-интернаты. Мæнæ куыд фæзæгъынц, иумæ дæр сæ фау æрхæссæн нæ уыд, афтæ зæрдиагæй куыстой æмæ æнæвгъау сæ зонындзинæдтæ амыдтой скъоладзаутæн. Ахуыргæнинæгтæн сæ фылдæр хъæутæй æрцæугæ кæй уыдысты, уымæ гæсгæ сын, кæй зæгъын æй хъæуы, уырыссаг æвзагыл дзурын æмæ ахуыр кæнын  райдианы зын кодта, фæлæ ма йæ ноджы зæгъон, куыстуарзаг ахуыргæнджыты фæрцы, уыдон цыбыр рæстæгмæ базыдтой æмæ сæрибарæй дзырдтой уырыссаг æвзагыл. Хорзы кой дардмæ хъуысы æмæ скъола-интернатæн дæр уайтагъд йæ хорзы ном айхъуыст  куыд æнæхъæн областыл, афтæ областæн æддейæ дæр  æмæ алы рæттæй ныййарджытæ æзфæраздæронæй цыдысты Дзаумæ, алкæйы дæр сæ фæндыд йæ сывæллоны ардæм æрбакæнын ахуырмæ, фæлæ дзы кæм уыд алкæйы фаг бынæттæ. Кæй зæгъын æй хъæуы, фыццаг рады ацы скъоламæ истой сидзæр сывæллæтты, бирæсывæллонджын бинонты æмæ дæрддаг хъæуты скъоладзауты. Кæцæйты дзы нæ ахуыр кодтой, уæдæ Хашуры æмæ Карелы районтæй, уæдæ Гур æмæ Гуры районтæй, уыдис дзы гуырдзиаг сывæллæттæ дæр. Уæд чи ахъуыды кодтаид кæддæр нын уыдон знæгтæ кæй суыдзысты æмæ нæ хъизæма-рæй кæй мардзысты, ууыл.

Скъолайы къæсæрæй-иу чи æрбахызт, уыцы ахуыргæнинæгтæн-иу  радтой уæ-лæдарæс сæрæй къæхты бынмæ. Кæй зæгъын æй хъæуы, æххуысхъуаг бинонтæн сæ  бон нæ уыд сæ цоты алцæмæй сифтонг кæнын æмæ сын ацы скъолайы баконд сæ къух тынг фæрог кодта, иуæй сæ æхсæвиуаты тыххæй æхца фидын нал хъуыд, иннæмæй та уæлæдарæсыл дæр се хца нал хардз кодтой, æмæ сæйраджыдæр та  сæ сывæллæттæм сæ зæрдæ нал æхсайдта, уымæн æмæ уыдысты æууæнкджын адæймæгты къухты. Мæн дæр мæ фыд  Дзриайы астазон скъолайæ ракодта æмæ 4-æм къласмæ бацыдтæн Дзауы скъола-интернатмæ. Куыддæр скъо-лайы къæсæрæй бахызтæн, афтæ мын радтой ног дарæс æмæ ма мæ цинæн кæрон кæм уыд, мæхимæ ма æркæс-æркæс кодтон, кæд дарæс цух мæ ныййарджыты хæдзары дæр уыйбæрц нæ уыдтæн, уæддæр. Скъола-интернаты сывæллæтты нымæц-иу уыд 400 ахуырдзауæй фылдæр. Бирæ хатт-иу кълæсты ахуыр кодтой 37 ахуыргæнинаджы. Ахуыр дзы цыд бæрзонд æмвæзадыл. Скъолайы директор Коцты Яков скъолайы ахæм фæтк æрæвæрдта æмæ йæм фау æппындæр ничи ницæмæй æрхастаид, йæ цуры хъæрæй никæцы ахуыргæнæинаг сдзырдтаид, афтæ тынг дзы аргъуц кодтой иууылдæр. Директор  стыр аргъ кодта музыкалон сфæлдыстадæн дæр, скъолайæн уыд йæхи кафты æмæ зарды ансамбль, кæцы арæх хайад иста уæды Советон Гуырдзыстоны алыгъуызон конкурсты æмæ олимпиадæты æмæ-иу дзы алыхатт дæр бацахста призон бынæттæ. Æрбахуыдта-иу зард æмæ кафты иттæг хорз специалистты, куыд Гаглойты Хазби, Санахъоты Федыр, фæндырдзæгъдæг Хъазиты Гиви æмæ æндæрты.

 Ахуыргæнинæгтæй-иу искæйы гуырæн бон куы уыди, уæд-иу уыцы бон хæрæндоны æрæвæрдтой бæрæгбонон фынгтæ, æрвылбонон хæлцæй дарддæр-иу  фынгтыл уыцы бон уыдысты алыгъуызон адджинæгтæ, адджын дæттæ æмæ а.д.  Скъолайы ахуырдзаутæн арæх уагъд цыдысты дискотекæтæ æмæ æндæр хиирхæфсæн мадзæлттæ. Фæнды мæ æрæмысын скъола-интернаты  ахуыргæнджытæ Зæгъойты Инессæ, Санахъоты Сæлимæт, Бибылты Клавдия, Цхуырбаты Венерæ, Цхуырбаты Валентин,  Гаглойты Мисурæт, Джиоты Варварæ, Томайты Георги, Остъаты Мисурæт,  Цхуырбаты Серги, Гасситы Мифодия æмæ бирæ æндæрты нæмттæ. Хъыгагæн, уыдонæй бирæтæ абон сæрæгас нал сты. Уыдоны фæрцы скъола-интернаты рауагъдонтæй бирæтæ систы зындгонд адæймæгтæ:

Коцты Яковы фæстæ скъола-интернаты директортæ уыдысты Цхуырбаты Валентин, Козаты Роланд, Коцты Виктор, Магкоты Эльвирæ, Хæбæлаты Галинæ. Ныртæккæ  та ахуырадон уагдонæн æнтыстджынæй къухдариуæгад кæны Галуанты Залинæ. Уый рай-гонд у скъолайы ахуыргæнджыты куыстæй, кæцытæ дарддæр кæнынц скъолайы хорз традицитæ.

Арфæ кæнæм Дзауы скъола-интернатæн йæ 55 азы юбилейы сæраппонд. Хуыцау зæгъæд æмæ фидæны уагдоны кæртæй цы райхъуыса ноджы фылдæр ахуырдзауты хъæлдзæг хъæлæба.

ДЖИОТЫ Екатеринæ

Comments are closed, but trackbacks and pingbacks are open.