Информаци æмæ мыхуыры комитеты пресс-центрмæ фæхуыдтой Бакулевы номыл медицинон центрæй нæ республикæмæ дыууæ боны æмгъуыдмæ æрцæуæг кардиологты.
Дохтырты ‘хсæн уыдысты ахæм специалисттæ, куыд сывæллæтты кардиолог Алексей Заграй, диагност Вера Донцова, хирург-аритмолог Олег Сопов зæрдæ æмæ тугдадзинты сывæллæтты хирург Антон Ковасари, афтæ ма æвзонг кардиологтæ – Залина Кудзоева æмæ Евгения Рузина. Уазджытæн ма семæ уыд РХИ-йы Æнæниздзинад хъахъхъæныны министры хæдивæг Пухаты Аленæ: «Дыууæ боны дæргъы Мæскуыйæ зындгонд Бакулевы номыл медицинон клиникæйæ зæрдæйы специалисттæ нæ республикæйы бирæпрофилон медицинон центры уагътой консультацитæ. Уыдон махмæ æрцыдысты Æнæниздзинад хъахъхъæныны министр Джыгкайты Томасы æрхуындмæ гæсгæ. Сæдæгай пациенттæ рады слæууыдысты уæрæсейаг кардиологтæм. Номхыгъд сарæзтам нæхи кардиологтимæ рагацау. Фæлæ бирæ рынчынтæ уыд рады æмæ уæд нæ уазджытæ сразы сты алкæйдæр басгарын. Суанг фæсæхсæвæртæм дæр истой рынчынты. Сбæрæг кодтой 65 ас пациентæн æвæстиатæй кæй хъæуы операцитæ саразын. Хъыгагæн, сывæллæтты кардиолог Алексей Заграй куыд зæгъы, афтæмæй æхсæз чысыл пациентæн дæр бахъæудзæн операцитæ саразын Мæскуыйы.
Æввахсдæр рæстæджы реабилитацимæ та хъуамæ арвитой 25 сывæллоны. Уыдонæн раздæр сæ зæрдæтыл операцитæ сарæзтой, фæлæ реабилитаци нæма рацыдысты. Уыцы рынчынтæн хъæудзæн сæ гæххæттытæ бацæттæ кæнын. Уæрæсейаг æмбæстаджы бæлвырдгæнæнтæ кæмæн ис, уыдонæн ницы проблемæтæ уыдзæн, фæлæ Хуссар Ирыстоны паспорт кæмæн ис, уыдон хъæуы рекомендацион гæххæттытæ æмæ сыл нæ министрад бакусдзæн. Рахицæн сын кæндзыстæм фæндаггæгтæ æмæ операцитæ арæзт æрцæудзысты æнæаргъæй. Хирург-кардиологтæ сæрмагонд рекомендацитæ æмæ амындтытæ цы уæлæнгай рынчынтæн скодтой, уыдонмæ та сæ хъус дардзысты бынæттон кардиологтæ. Консультацитæ сын ауагътой æмæ бацамыдтой, пациенттæн цы методтæм гæсгæ хъæуы хос кæнын.
Сывæллæтты кардиолог Антон Коасари куыд загъта, афтæмæй Бакулевы номыл националон медицинон иртастæнты кардиологийы хайады реабилитацион центр иттæг ахадгæ у, сывæллæттæй зæрдæйы хъæдгæмттимæ (порок) чи райгуыры, уыдонæн. «Центр у комплексон æмæ дзы реабилитаци æрцæуынц сывæллæттæ иу азæй 18 азы онг. Ам пайда кæнынц диагностикон, медикаментозон, физиотерапион æмæ физикон-культурон методтæй канд сывæллæттæ нæ, фæлæ ма ныййарджытæ дæр. Алкæцы сывæллонимæ дæр кусынц индивидуалонæй. Комплексон басгæрстыты фæстæ пациенттæн бацамонынц, хи хизын куыд хъæуы, цæмæй ногæй операци кæнын ма бахъæуа. Пациенттимæ ма кусынц психологтæ дæр.
Дохтыр-аритмолог Олег Сопов журналистты хъусдард аздæхта ахæм гуырцæй рахæсгæ низтæм куыд перинаталон диагностикæ «Сывæллон тагъд куы фæллайа, йæ зæрдæ тагъд-тагъд куы куса æмæ йæ пульсы куыст бæрзонд куы уа, уый бирæ фактортимæ баст у. Фæлæ ныййарæг æмæ сывæллæтты фадыгон дохтыр æмбаст куы уой, уæд ацы æппæрццаг цауæн аиуварсгæнæн ис йæ райдианы. Суанг ма низæн коррекцигæнæн дæр ис мады гуыбыны. Низмæ иугъæдон цæстæй кæсæн нæй æмæ уый хъуамæ зоной фидæны ныййарджытæ дæр», – дзырдта хирург-аритмолог.
Хирург-диагност Вера Донцова та Республикон бирæпрофилон медицинон центры тыххæй йæ тæлмæнтæ куы дзырдта, уæд афтæ загъта: «Сымахмæ ис хорз дохтыртæ, рынчынтæ иууылдæр сты сæ хъусдарды бын, фæлæ сын нæ фаг кæны материалон-техникон базæ. Æмæ уымæн та æндæр гæнæн нæй. Ныртæккæ дуг размæ цæуы: иу ногдзинад иннæйы афтæ тагъд ивы æмæ цырд куы нæ фæлæууай, уæд фæстейæ аззайдзынæ. Знон дæр ма хуыздæрыл цы медицинон ифтонгад цыд нымад, уый абон базæронд, йæ бынаты ноджы хуыздæр, нырыккондæр аппаратурæ балæууыд. Иумæйагæй сисгæйæ, персоналæй алчидæр йæ бынаты ис, зонынц, цы аразын хъæуы æмæ пациенттимæ куыд архайын хъæуы».
УАЗÆГТЫ Марфа
