Адæймагæн йе ‘нæниздзинадæй ахсджиагдæр æмæ зынаргъдæр ницы ис. Нæ адæм цы зындзинæдтæ бавзæрстой фæстаг азты, уый фæстиуæгæн сæ бирæтæн се ‘нæниздзинад фæцудыдта. Канд хистæр кары адæм нæ, фæлæ ма кæстæр фæлтæр дæр нæ аирвæзстысты уæззау дуджы фæлварæнты фæстиуджытæй.
Куыд уынæм, афтæмæй бирæ арæзт цæуы нæ цæрджытæн медицинон лæггæдты гъæд фæхуыздæр кæныныл. Арæзт æмæ эксплуатацимæ лæвæрд цæуынц æндæр æмæ æндæр медицинон уагдæттæ, кæцытæ ифтонг сты нырыккон медицинон ифтонггæрзтæй. Хъæууон бынæтты архайынц фельдшерон-акушерон пункттæ. Нæ ног медицинон уагдæттæн бынæттон кадртæ кæй нæ фаг кæны, уымæ гæсгæ специалисттæ хуынд цæуынц Уæрæсейы æндæр æмæ æндæр рæттæй.
Æнæниздзинады æмæ социалон райрæзты министрад Тотчиты Георгийы сæргълæудæй аскъуыддзаг кодтой, цæмæй хъæуæгдæр медицинон специалисттæ рæстæгмæ хуынд цæуой нæ республикæмæ æмæ сгарой, йе ‘нæниздзинадæй чи хъаст кæнынц, уыцы цæрджыты.
Ныр цыппæрæм хатт нæ республикæмæ хуынд æрцыдысты Уæрæсейы стырдæр клиникæты профилон дохтыртæ. Ивгъуыд къуыри дæр Санкт-Петербургæй æрцыд – хирург, эндокринолог, репродуктолог, гинеколог. Уыдон дыууæ боны дæргъы бæрæг кодтой нæ горæты цæрджытæн се ‘нæниздзинад.
Пациенттæ сæхæдæг куыд зæгъынц, афтæмæй-иу райсомæй 8 сахатыл слæууыдысты рады, вæййы дзы бирæ адæм, фæлæ Уæрæсейæ æрцæуæг дохтыртæ иу дæр нæ аздахынц.
Санкт-Петербургаг дохтыртæ куыд загътой, афтæмæй сын боныдæргъы бантысы 48-50 пациенты бæрц басгарын æмæ сын æмбæлон хостæ рафыссын.
Дохтыртæ рынчынты сгæрстой нæ горæты сывæллæтты поликлиникæйы ногарæзт бæстыхайы. Куыд зонæм, афтæмæй уый та ифтонг у нырыккон медицинон ифтонггæрзтæй. Бынаты баххуыс кæнын сæ бон кæмæн не ссис, уыдон та фæхуыдтой Санкт-Петербургмæ, цы клиникæты кусынц, уырдæм. Бацамыдтой сын бынаты цы анализтæ æмбæлы саразын æмæ медицинон гæххæттытæ куыд æмбæлы байдзаг кæнын, цæмæй Санкт-Петербургмæ ныццæугæйæ бирæ рæстæг ма хардз кæной.
Æрхуынд хирург куыд загъта, афтæмæй поликлиникæйы цы ног аппаратурæ ис, уыдонмæ гæсгæ сбæлвырдгæнæн ис алыгъуызон низтæн, фæлæ рынчынтæй ис вазыгджын операци кæй хъæуы, ахæмтæ, уыдонæй чидæртæ æрвыст æрцæудзысты Дзæуджыхъæумæ, кæнæ та Беслæны рынчындонмæ. Фæлæ, сæйраджыдæр, сæхæдæг цы бынæтты кусынц, уырдæм Хуссар Ирыстонæй ныццæугæ рынчынтæм Уæрæсейы дарынц аудгæ ахаст, басгарынц сæ лæмбынæг æмæ сын бамбарын кæнынц, куыд хос цæуы иу кæнæ иннæ низæн нырыккон медицинон æмвæзадыл. Фæлæ низтæй чи тæссагдæр у, чи та – æдасдæр. Алы хатт пациентыл операци нæ хъæуы. Уый æрмæст иу дохтыр ма хъуамæ аскъуыддзаг кæна. Сæхимæ кæй фæхуыдтой, уыдон хъысмæт скъуыддзаг цæудзæнис рынчыны комплексон æгъдауæй бассгарыны фæстæ».
Æнæниздзинад хъахъхъæныны министрад нырæй фæстæмæ дæр хонинаг у æндæр æмæ æндæр специалистты. Уый хорзæрдæм бандавдзæнис бынæттон дохтыртыл дæр, ахуыр кæндзысты æрцæугæ дохтырты фæлтæрддзинадыл.
Уазæгты Марфа
Comments are closed, but trackbacks and pingbacks are open.