Уæрæсейы аивæдты сгуыхт архайæг, композитор Махъоты Ацæмæз документалон киноныв «Этника»-йæн ныффысдзæн музыкæ. Киноныв исын райдыдтой режиссертæ Æлборты Амиран æмæ Æлборты Алан. Ныхас дзы цæудзæн ирон нырыккон музыкæйыл. Махъоты Ацæмæз хорзыл банымадта фæсивæды хъуыды æмæ сразы кинонывæн музыкæ ныффыссыныл. Кинонывыл куыст цæуы фæсивæды хъуыддæгты фæдыл федералон агентады грантмæ гæсгæ.
«Мах бахатыдыстæм Ацæмæз Владимиры фыртмæ, цæмæй нын ныффысса сæйраг саундтрек нæ фильмæн. Радзырдтам ын фильмы идеяйы тыххæй. Мах фæнды адæмы разæнгард кæнын æмæ равдисын, зæгъгæ, ирон æвзагыл дæр ис гæнæн нырыккон музыкæ ныффысын, нæ уидæгтыл бындуриуæг кæнгæйæ. Ныфс нæ ис, ацы фильмæй махæн нæ бон кæй суыдзæн не ‘взаг æмæ культурæ бахъахъхъæнын æмæ рæзтмæ нæ чысыл хайбавæрд бахæссын. Ацæмæз Владимиры фырт уайтагъд не ‘вварс рахæцыд. Загъта, зæгъгæ, æхсызгон ын уыдзæн ахæм кинонывæн музыкæ саразыны хайад райсын», – радзырдта фильмы режиссер Æлборты Амиран.
