Уæрæсейаг фарс развæлгъауыл нымайы Фæскавказы фæдыл Женевæйаг дискусситæ рахæссыны тыххæй конкретон столицæтæ æмæ æмгъуыдтæ нысан кæнын. Куыст дарддæр цæуы, – ахæм хъуыды РИА «Новости»-йæн йæ интервьюйы загъта УФ-йы Фæсарæйнаг хъуыддæгты министры сæргълæууæджы хæдивæг Михаил Галузин.
«Фыццаг рады мæ фæнды бамбарын кæнын, уæрæсейаг фарс дызæрдыджы кæй не ‘ппары бадзырдон форматы, фæлæ уыимæ домы, йæ уадзыны бынат ын аивын», – банысан кодта уый. Галузин хъусдард аздæхта уымæ, зæгъгæ, «махæн уыдон сты дыууæ алыгъуызон фарстайы».
«Иуæрдыгæй, бадзырдон платформæ йæ куысты азты сбæлвырд кодта йæ пайдадзинад», – йæ ныхасмæ бафтыдта Галузин. Уый радзырдта, зæгъгæ, «бадзырдты фæрцы ис бæрæг сабырдзинад гуырдзиаг-абхазаг æмæ гуырдзиаг-ирон æмарæнты, иуварс цæуы æндыгъддзинады эскалаци.
Михаил Галузин ма бацамыдта, зæгъгæ, «Женевæйæ дискусситы æндæр ранмæ рахæссынæн ис объективон аххосæгтæ, кæцыты расайдтой Украинæйы конфликты контексты Швейцари кæронмæ йæ нейтралитет кæй фесæфта, уый».
«Бирæ цæвиттонтæ ис æрхæссæн «коллективон Ныгуылæны» аргессивон политикæйы Берны практикон хайадистæн, уыцы нымæцы Уæрæсейы ныхмæ Евроцæдисы санкцитæм æрбаиу æмæ киеваг режимимæ æмзæрдæдзинад», – бафиппайдта уый.
«Номхуындæй ахæм уавæртæм гæсгæ мах бахъуыд фарст сæвæрын бадзырдтæ æндæр паддзахады территоримæ рахæссыны тыххæй, кæцыйы хицауад нæ араздзæн бадзырдон процессы хайадисджытæй искæцыйы интерестæн зиан æрхæссыны къахдзæфтæ. Дыккаг, махæн ис фаг фæлтæрддзинад æхсæнадæмон диалогты форматы нæхимæ райсыны фæдыл», – загъта УФ-йы Фæсарæйнаг хъуыддæгты министры сæргълæууæджы хæдивæг.
Уый ма банысан кодта, зæгъгæ, нырма æгæр раджы у бадзырдтæ рахæссыны æмгъуыдтæ зæгъынæн. «Конкретон столицæ æмæ рахæссыны гæнæнуæвæг æмгъуыдтæ нымайæм æгæр раджыйыл, уымæн æмæ консенсусы ацы фарста аскъуыддзаг кæныны тыххæй æнæмæнгхъæуæг куыст дарддæр кæны», – банысан кодта уый.
Уыимæ Галузин хъусдард аздæхта уымæ, зæгъгæ, «уæрæсейаг позициимæ æххæстæй æмзæрдæ сты абхазаг æмæ хуссарирыстойнаг æмцæдисонтæ».
