Дзæуджыхъæуы цытджын æгъдауæй хорзæхджын æрцыдысты футболæй Цæгат Ирыстон-Аланийы чемпионаты уæлахиздзау æмæ призертæ. Уæлахиздзауы кубок лæвæрд æрцыд командæ «Цхинвал»-æн, кæцы турниры æрæмбырд кодта иууыл фылдæр очкотæ. Футболон командæ «Цхинвал» кæй фæуæлахиз, уый цытæн футболисттæн Хуссар Ирыстоны Президент Бибылты Анатолийы арфæйы тел бакаст паддзахады сæргълæууæджы æххуысгæнæг Касаты Ацæмæз.
Хуыздæр командæты схорзæхджын кæныны церемонийы ма хайад райстой Хуссар Ирыстоны футболы федерацийы президент Джиоты Алан æмæ спорты фарстаты фæдыл президенты æххуысгæнæг Джиоты Руфин.
Чемпионаты лидер командæ “Синдикат”-æй цхинвайлæгтæн уыд 10 очкойы къаддæр, фæлæ уæддæр сæ бон ссис йæ баййафын æмæ йæ разæй фæуын.
«Фæнды мæ нæ республикæйы спортуарзджытæн раарфæ кæнын нæ командæйы уæлахизы фæдыл. Бузныг зæгъын командæйы футболисттæн, фидар удыхъæд кæй равдыстой, уый тыххæй. Сæрмагондæй бузныг зæгъын РХИ-йы Президент Бибылты Анатолийæн, нæ клубæн нын алыварсон æххуыс кæй кæны, уый тыххæй», – банысан кодта «Цхинвал»-ы тренер Хъоцыты Сослан.
Цытджын церемонийы ма хорзæхджын æрцыдысты чемпионаты хуыздæр хъазджытæ. Сæрмагонд хорзæхтæ кæмæн радтой, уыдоны ‘хсæн уыдысты «Цхинвал»-ы хъазджытæ дæр. Хуыздæр хъахъхъæнæджы приз райста Мулдарты Алексей. Хуыздæр размæбырсæгыл та нымад æрцыд Бæззаты Ибрагим.
ХУРИТЫ Батрадз
Comments are closed, but trackbacks and pingbacks are open.