Цæгат Ирыстоны

ГАГЛОЙТЫ ГЕОРГИЙЫ НОМЫЛ  МЕМОРИАЛОН ФÆЙНÆГ

Гаглойты Георгийы номыл мемориалон фæйнæг байгом кодтой Дзæуджыхъæуы. Уый уыд республикæйы Уæлдæр Советы Президиумы фыццаг сæрдар.

Гаглойты Георги райгуырд 1900-æм азы Хуссар Ирыстоны. 1920-æм азы, гуырдзиаг меньшевикты æрбабырсты фæстæ, ралыгъд Цæгат Ирыстонмæ. Ам фыццаг кусын райдыдта «Электроцинк»-ы хуымæтæг кусæгæй. Гаглойты Георги Стыр Фыдыбæстæйон хæсты фæстæ йæ фатермæ цæрынмæ бауагъта сидзæр сывæллæтты. Уыд Советон Цæдисы Маршал Семён Будённый æмæ Советон Цæдисы Уæлдæр Советы Президиумы уæды Сæрдар Михаил Калинины хæлар. Уымæй уæлдай, уыд Гаглойты мыггаджы иугæнæг.

Мемориалон фæйнæг байгом кæныны хъæппæрис разынд Гаглойты Георгийы байзæттаг Гаглойты Азæмæтмæ. Ныффидар æй кодтой, 15 азы цы бирæфатерон хæдзары фæцард, уый къулыл.

Мадзалмæ æрбацыдысты Дзæуджыхъæуы администрацийы, Цæгат Ирыстоны Уæлдæр Тæрхондоны минæвæрттæ, Ветеранты цæдисы ми-нæвæрттæ æмæ Гаглойты Георгийы хæстæджытæ. Кæронбæттæны, мемориалон фæйнæджы цур сæвæрдтой дидинджытæ. Гаглойты Азæмæт куыд банысан кодта, афтæмæй Гаглойты Георгийы номæй фæнд кæнынц горæты ног уынгтæй иу схонын дæр.

 

АКЦИ – КАВКАЗ БАХЪАХЪХЪÆНЫНЫ   ТОХЫ ЦЫТÆН

Цæгат Ирыстоны райдыдта сæрмагонд акци. Снысан æй кодтой Стыр Фыдыбæстæйон хæсты Кавказы сæрыл тох куы райдыдта, ууыл 79 азы  сæххæсты бонмæ.

Альпинистты сæйраг нысан – «Алани»-йы цъуппыл Советон Цæдисы Хъæбатырты порт-реттæ равæрын. Хæстонтæ – Хуссар æмæ Цæгат Ирыстонæй хæсты йæхи хъазуатонæй чи равдыста, уыдон. Акцийы архайджытæм йæ раныхасы фæсидт республикæйы сæргълæууæджы хæстæ рæстæгмæ æххæстгæнæг Сергей Меняйло.

Мадзалы архайдтой республикæйы хицауады уæнгтæ, æхсæнадон организациты æмæ барадхъахъхъæнæг органты минæвæрттæ, æфсæддон-патриотон змæлд «Æрыгон æфсæддонты» хъомылгæнинæгтæ, студенттæ.

Фыццаг бон къорд æрбынат кодта Алагиры районы Калачы хъæуы лагеры.

Экспедицийы бахъæудзæн зын фæндæгтыл ацæуын. Сæйрагдæр – æдасдзинад. Бæлцæтты æдасдзинадæн дзуапп дæтты Уæрæсейы Æнæнхъæлæджы уавæрты министрады Цæгат Ирыстоны агурæн-ирвæзынгæнæн хайады къорд. Материалон-техникон æххуыс та сын бакодта Хуссар æфсæддон зылды 58-æм æфсад.

28 адæймаджы се’хсæн телеуынынады къорд дæр, афтæмæй схызтысты Къуыдары æфцæгмæ. Бынаты сæмбæлдысты Хуссар Ирыстонæй акцийы архайджытимæ, Алчи дæр йæ хъæбатыры къам йæ къухты хæсгæйæ, афтæмæй.

Уæрæсейы Федерацийы паддзахадон арæн. Галиуæрдыгæй – Цæгат Ирыстон, рахисы ‘рдыгæй – йæ хуссайраг хай. Æфцæгмæ хæстæг боныхъæд æвзæрырдæм фæивта. Уымæ гæсгæ къорды цытджын митинг бахъуыд Къуыдары æфцæгыл саразын. Афтæмæй дыууæ Ирыстоны минæвæрттæ, кæрæдзийæн æфсымæртæ,  ссардтой цъæх арвы бын æдасæй кæй фæрцы цæрæм, уыдоны рухс нæмттæ.