Цæгат Ирыстоны

ÆМГУЫСТАДЫ ФАРСТАТÆ

 

РЦИ-Аланийы Хицауады Сæрдары хæстæ рæстæгмæ æххæстгæнæг Тускъаты Таймураз фембæлд, ацы бонты Дзæуджыхъæумæ цы делегаци ссыд, уый уæнгтимæ. Уыдон сты: Мурманскы науаразæн заводы директоры хæдивæг Сергей Пахомов, Волгограды энергетикон лæггæдты компанийы директор Сергей Попов æмæ социалон-патриотон клуб “Сталинград”-ы æмсæрдар Алексей Рылеев.

Фембæлды архайдтой республикæйы Хицауады Сæрдары хæдивæджы хæстæ рæстæгмæ æххæстгæнæг Дзанайты Барис æмæ цæрæнуатон-коммуналон хæдза-рады, æртаг æмæ энергетикæйы министры хæдивæг Зæнджиаты Роман.

Бæстæйы æфсæддон-сæудæджерадон комплексæн нæ республикæйы цы куыстуæттæ ис, уыдоны æппæт хъарутæй скусын кæнын, бюджетон организациты уæ-рæхдæр пайда кæнын энергетикон фæрæзтæ фæс-тауæрц кæныны нырыккон технологитæй – ацы æмæ æн-дæр фарстатыл æрныхас кодтой фысымтæ æмæ уазджытæ.

Фембæлды  куыд баныхас кодтой, афтæмæй энергетикон фæрæзтæ фæсауæрц кæныны къабазы æмгуыстадæн ис хорз фадæттæ. Волгоградаг компанийы технологитæ цас пайда сты, уый фенæн ис цалдæр фæлварæн объекты дæнцæгыл. Зæгъæм, дæнцæджы хуызы цалдæр объекты компани баивдзæн электрон рухсдæттæнтæ. Куыстуаты минæвæрттæ куыд зæгъынц, афтæмæй ног ифтонггæрзты фæрцы электрон тыхы фæсауæрц схæццæ вæййы 40 процентмæ.

Тускъаты Таймураз республикон министрадтæ æмæ ведомствоты специалисттæн бахæс кодта, цæмæй бæлвырд æркæсой, фембæлды цы фæндæттыл цыд ныхас, уыдонмæ æмæ æмгуыстады бадзырдтæ бафыссынæн фадæттæ саразой.

 

НАРКОМАНИЙЫ НЫХМÆ

Республикæйы барадхъахъхъæнджытæ дыууæ къуырийы дæргъы баххæст кодтой сæдæ рейды бæрц акци “Сообщи, где торгуют смертью”-йы фæлгæтты. Уыимæ республикæйы æппæт районты дæр æххæст кодтой профилактикон мадзæлттæ, æнæниз цард-уаджы пропагандæ. Акцийы сæйраг нысан уыд, æнахъомтæй карз нозт, наркотиктæ æмæ психотропон буарадтæй чи пайда кæны, уыдоны рабæрæг кæнын.

Акцийы рæстæджы рабæрæг æвæстиатæй аскъуыддзаггæнинаг бирæ фарстатæ. Карз нозт чи кæны, уыцы æнахъомтæ разындысты 44, фынддæс сывæллонæй бадомдтой административон бæрндзинад, дыууæйы та бахастой наркологион номхыгъдтæм. Акцийы архайджытæ фадæттæ сарæзтой, се ‘нæниздзинад хорз кæмæн нæу, ахæм æхсæз сывæллоны рынчындæтты схуыссын кæнынæн, æртæйы та барвыстой æнахъомты социалон реабилитацийы центр “Доброе сердце”-мæ.

Акцийы архайджытæ ма бабæрæг кодтой номхыгъдтæм хаст 350 бинонты. Уыдон æмбæлон уагæй нæ хъомыл кæнынц сæ сывæллæтты. Рейды рæстæджы ахæмтыл арæзт æрцыд 45 суагъæйы. Полицийы кусджытæ уæлдай фылдæр æргом аздæхтой æнахъомты хъуыддæгты службæйы æмæ наркологион диспансеры номхыгъдтæм хаст æнахъомтæм. Психологтæ æмæ наркологтæ семæ æмбарæн куыст кодтой. Адæмæн куыст дæттыны службæйы специалисттæ та полицийы кусджытæн радзырдтой, сывæллæтты сæрды мæйты цавæр куыстытыл ис бафтауæн, уый тыххæй.

Акцийы рæстæджы патриотон хъомылады нысæнттимæ номхыгъдтæм хаст сывæллæттимæ полицийы кусджытæ бабæрæг кодтой Кады музейтæ, зæрдылдарæн бынæттæ… Скъолаты сын уыд алыхуызон фембæлдтытæ, нозт æмæ наркотикты ныхмæ бакастысты 400 лекцийы бæрц .

Практикæ куыд равдыста, афтæмæй ахæм акцитæн ис стыр хъомыладон æмæ патриотон нысаниуæг.

Нæ уацх.