Президент Тыбылты Леониды сæрдариуæгадæй уагъд æрцыд Хицауады радон рабадт. Æмбырды райдианы бæстæйы сæргълæууæг раарфæ кодта Æнæниздзинад хъахъхъæныны æмæ социалон рæзты министр Григори Кулиджановæн йе 65 азы боны цытæн æмæ йæ схорзæхджын кодта Хæлардзинады орденæй.

«Григори Степаны фырт йæ куысты рæстæджы республикæйæн бирæ сарæзта. Фыдыбæстæйы раз ын йе ‘нтыстытæ хынцгæйæ, æз райстон уынаффæ Хæлардзинады орденæй йæ схорзæхджын кæныны тыххæй», – загъта уый.

Дарддæр Хицауады уæнгтæ рахызтысты боны фæткы фарстытыл уынаффæ кæнынмæ.

Фыццаг цы фарстытæм æркастæуыд, уыдоны æхсæн уыдысты куысты азтæ банымайын, пенсион бафыстытæ снысан кæнын, РХИ-йы мидхъуыддæгты органты чи службæ кæны, уыдон æмæ сæ бинонтæн компенсацитæ æмæ æххуысы фæрæзтæ фидыны фарстытæ.

«Махæн уый у фыццаградон хæс. 150 адæймаджы онг цæттæ сты пенситæ саразынмæ. Уымæй дарддæр ма бафыстытæ ногæй банымайын æмæ пенситы фæфылдæр кæныны хъуыддаг æрхаудзæн ныртæккæйы пенсиисджытæм дæр. Мах ацы фарстыл уынаффæ кодтам Уæрæсейы Мидхъуыддæгты министрады Бадзырдон-барадон департаменты къухдариуæгадимæ, уыдон нæ хъуыдыйыл сразы сты», – банысан кодта Лæууойты Æхсар.

Респуликæ Хуссар Ирыстоны архивон хъуыддаджы уавæримæ æрæмбырдуæвджыты базонгæ кодта Сæйраг архивон управленийы хистæр Тадтаты Хетæг. Уый банысан кодта, зæгъгæ, управлени у техникон ифтонгады æмæ специалистты хъуаг.

Президент бахæс кодта Хицауады Сæрдары хæдивæг Пухаты Эрикæн, цæмæй базонгæ уа ацы фарстимæ æмæ йыл бакуса.

Рабадты ма уынаффæ цыд Паддзахадон бюджетон уагдон «Æхсæнадæмон аналитикон журнал «Республикæ Хуссар Ирыстон»-æн гонорарон фонд снысан кæныны фарстыл.

Докладимæ ныхасы рацыд Информаци æмæ мыхуыры паддзахадон комитеты сæрдар Тыбылты Алан.

«Цæмæй ацы уагдон куса æмæ журнал цæуа «Дзыллон информацион фæрæзты тыххæй» Республикæ Хуссар Ирыстоны Закъонмæ гæсгæ, уый тыххæй йын æнæмæнгхъæуæг у 65 мин сомы бæрц гонорарон фонд снысан кæнын. Гонорары ацы бæрц, паддзахадон мыхуыры фæрæзтæн цас æмбæлы, уыцы минимумæй у ныллæгдæр», – загъта уый.

Тыбылты Алан йæ ныхас фæбæлвырддæр кодта, ома ацы фондæй гонорар фыст цæудзæн, журналы сæ уацтæ чи мыхуыр кæной, уыцы бынæттон аналитиктæ æмæ æттагон автортæн.

Финансты министр Хæбæлаты Азæ бацамыдта Информаци æмæ мыхуыры паддзахадон комитеты сæргълæууæгæн, цæмæй йе ‘рбавдыст уынаффæимæ æрбавдиса ИА «Рес»-ы гонорарон фонд дæр.

Хицауады уæнгтæ æмзæрдæйæ хъæлæс радтой Хуссар Ирыстоны арæнгæрон цæрджыты уадзæн гæххæттæй бынтондæр ссæрибар кæныны фæндоныл.

«Ацы фарстыты фæдыл ивындзинæдтæ бирæ не сты, фæлæ сты уæзгæ. Мах хæссæм фæндон, цæмæй Хуссар Ирыстоны æмбæстæгтæ бынтондæр сæрибар æрцæуой арæнгæрон зонæмæ уадзæн гæххæттытæй», – загъта Паддзахадон æдасдзинады комитеты арæнгæрон службæйы къухдариуæггæнæг Валери Зазуля.

Йæ ныхæстæм гæсгæ, Хуссар Ирыстоны æмбæстæгтæн сæ бон арæнгæрон зонæмæ бацæуын уыдзæн паспорт, кæнæ та службæйон æвдисæнадр равдисгæйæ, Хуссар Ирыстоны æмæ Уæрæсейы Федерацийы æнахъом æмбæстæгтæ та  Хуссар Ирыстоны æмбæстæгтæ семæ, афтæмæй райгуырды æвдисæндар равдисгæйæ. Уымæй дарддæр ма, фæсарæйнаг æмбæстæгтæн сæ куырдиаттæм æркæсыны æмгъуыд фæкъаддæр уыдзæн 30 бонæй 10 боны онг.

«Арæнгæрон зонæйы чи цæрынц, уыцы цæрджытæн та æнæмæнг нал уыдзæн погранзаставæмæ хатын арæнæй 100 метры дæрддзæгæн хæдзарадон архайды бар райсыны тыххæй», – йæ ныхасмæ ма бафтыдта Валери Зозуля.

Паддахадон æдасдзинады комитеты Арæнгæрон службæйы къухдариуæггæнæг куыд загъта, афтæмæй ацы уынаффæ рахастæуыд Ленингоры районы сæргълæууæг Босыкты Алексейы куырдиатмæ гæсгæ.

Тыбылты Леонид бузныг загъта Валери Зозуляйæн йæ æнтысгæ куысты тыххæй æмæ банысан кодта, зæгъгæ, ацы фарст аскъуыддзаг кæныныл куыст цыдис рагæй.

 

Республикæ Хуссар Ирыстоны Президенты Официалон сайт     

Comments are closed, but trackbacks and pingbacks are open.