РХИ-йы Президент Бибылты Анатоли йæхимæ райста Цæгат Кавказы хъуыддæгты фæдыл министры хæдивæг Игорь Кошин æмæ ХПÆ бæстæтæ-хайадисджытæ, Республикæтæ Абхаз æмæ Хуссар Ирыстонимæ социалон-экономикон æмгуыстады фæдыл УФ Президенты управленийы хистæры хæдивæг Денис Травины. Фембæлды хайад райстой Хицауады Сæрдар  Пухаты Эрик, РХИ-йы Президенты Администрацийы сæргълæууæг Козаты Игорь, УФ-йы æххæстбарджын минæвар Хуссар Ирыстоны Марат Кулахметов.

Фембæлды рæстæджы Бибылты Анатоли раарфæ кодта Игорь Кошинæн, æрæджы Цæгат Кавказы хъуыддæгты фæдыл министры хæдивæгæй нысан кæй æрцыд, уый тыххæй. «Уырны мæ, раздæр дын бæрнон бынæтты кусгæйæ цы æнтыстытæ уыд, уыдон ныр дæр кæй дарддæр кæндзынæ. Ныфс мæ ис, не ‘мгуыстад кæй уыдзæн фæстиуæгджын», – загъта Бибылты Анатоли.

Фембæлды размæ Игорь Кошин азылд республикæйы арæзтцæуæг объекттыл æмæ скодта инспекцион азылды хатдзæгтæ. «Æз  азылдтæн арæзтцæуæг объекттыл æмæ мæм фæзынд æхсызгон тæлмæнтæ. Ам уыдзæн диссаджы медицинон  чысыл горæт. Республикæйы къухдариуæгады ‘рдыгæй куысты процессмæ æнкъардæуы стыр хъусдард», – загъта Игорь Кошин. Министры хæдивæг равдыста йæ цæттæдзинад нæ республикæйы Инвестпрограммæ реализаци кæныны фарстаты фæдыл æмгуыстадмæ.  «Æххæстбæрцæй мæ ныфс æвæрут ацы фарсты фæдыл. Æмгуыстгæнгæйæ, махæн нæ бон суыдзæн æппæт фарстатæ дæр æмбæлонæй скъуыддзаг  кæнын.  Ныртæккæ нæ сæйраг хæс у, подрядон организациты финансон фæрæзтæ æмæ æп-пæтхъæуæг проектон-сметæйон документацийæ сифтонг кæнын», –  загъта Игорь Кошин.

Бибылты Анатоли загъта, нæ республикæйы размæцыды æмæ арæзтадон процессмæ Уæрæсейы Федерацийы  Президенты Администрацийы æмæ Цæгат Кавказы хъуыддæгты фæдыл министрады ‘рдыгæй кæй ис стыр хъусдард. Уæлдай бузныджы ныхæстæ загъта Денис Травинæн ацы хъуыддаджы тыххæй.

«Ивгъуыд азы Инвестпрограммæ æххæст æрцыд 90 проценты бæрц. Ахæм фæстиуджытæ ис æрмæстдæр Цæгат Кавказы хъуыддæгты фæдыл министрады æмæ Уæрæсейы Федерацийы Президенты Администрациимæ нæ республикæйы къухдариуæгады эффективон æмгуыстады руаджы. Ивгъуыд рæстæджы æмгуыстгæнгæйæ, райсгæ фæлтæрддзинадыл бындуриуæггæнгæйæ, мæ бон у фидарæй зæгъын, нæ дарддæры куыстæн дæр кæй уыдзæн тынг  хорз фæстиуджытæ», – банысан кодта Бибылты Анатоли.

Бæстæйы президенты ныхæстæм гæсгæ, Инвестпрограммæйы реализаци кæныны фарстаты фæдыл стыр æххуыс ис Хуссар Ирыстоны Уæрæсейы Федерацийы Минæварады ‘рдыгæй, æмæ загъта бузныджы ныхæстæ Марат Кулахметовæн.

 

Comments are closed, but trackbacks and pingbacks are open.