Бибылты Анатоли æмæ Владимир Путины фембæлд

Республикæ Хуссар Ирыстоны Президент Бибылты Анатоли æмæ Уæрæсейы Федерацийы Президент Владимир Путинæн уыд фембæлд.

Уæрæсейы Федерацийы Президент зæрдыл æрлæууын кодта, зæгъгæ, 26-æм августы 10 азы æххæст кæны, Хуссар Ирыстоны хæдбардзинад Уæрæсе куы банымадта, уыцы боныл.

«Мах хорз хъуыды кæнæм, дæс азы размæ уыцы уæззау цаутæ куыд цыдысты, уый, фæлæ æппæт вазыгджындзинæдтæм нæ кæсгæйæ, æмæ уыдон та алыхатт дæр бирæ вæййынц, республикæ рæзы, мах архайæм, Хуссар Ирыстоны æдасдзинад сифтонг кæныны тыххæй гæнæн цы ис, уый саразыныл, уыцы нымæцы экономикон æххуыс бакæныныл дæр», – загъта Владимир Путин.

Уый банысан кодта Уæрæсе æмæ Хуссар Ирыстоны ‘хсæн товарты æрзылды рæзты динамикæйы тыххæй. «Товарты æрзылд у 24-25 проценты, республикæйы æххæст цæуынц социалон проекттæ – сывæллæтты рынчындоны, республикон рынчындоны хирургион комплексы, фæндæгты арæзтады. Иумиагæй, куыст цæуы, къухты бафтыд бирæ саразын, фæлæ саразын цы бантыст, уымæй проблемæтæ ноджы фылдæр сты, æмæ уымæ нæ кæсгæйæ, ахастытæ рæзынц æмæ республикæ фидар кæны, фидар кæны йæ позици», – банысан кодта Владимир Путин.

Уый ма йæ ныхасмæ бафтыдта, зæгъгæ, Уæрæсе тырны, гæнæн цы ис, уый саразынмæ Хуссар Ирыстоны æдасдзинад сифтонг кæныны æмæ экономикон æгъдауæй  республикæйæн баххуыс кæнынмæ. Уæрæсейаг лидеры Хуссар Ирыстоны къухдариуæгад æмæ æппæт адæмæн бафæндыд амонд æмæ дидинæфтыд.

Йæ рады, Бибылты Анатоли дæр банысан кодта, зæгъгæ, Республикæ Хуссар Ирыстоны хæдбардзинад банымайыны фæдыл Уæрæсейы къухдариуæгады уынаффæйæн уыд хъысмæтскъуыддзаггæнæн нысаниуæг.

«Номхуындæй, Гуырдзыстоны фидыдадмæ æркæныны  æмæ  Республикæ Хуссар Ирыстоны хæдбардзинад банымайыны фæстæ Хуссар Ирыстоны адæм райдыдтой цæрын бынтон æндæр уавæрты – стабилондзинад, сабырдзинад æмæ дидинæфтыды уавæрты. Абон Хуссар Ирыстоны сывæллæттæ не схъиуынц снарядты рæмыгъдтытæй, абон республикæ рæзы æмæ, кæй зæгъын æй хъæуы, мах зонæм, фактон æгъдауæй  Республикæ Хуссар Ирыстоны цæуæг æппæт цауты  Дæуæн цы стыр нысаниуæг ис æмæ цахæм политикон фæндондзинад равдыстай, уый тыххæй», – банысан кодта Бибылты Анатоли.

Уый бузныг загъта уæрæсейаг лидерæн республикæйы паддзахаддзинады рæзтмæ йæ хайбавæрды тыххæй. «Æз мæхицæн кадыл нымайын, абон Дæуæн Республикæ Хуссар Ирыстоны адæмы номæй бузныджы æмæ арфæйы ныхæстæ кæй зæгъын, абон Хуссар Ирыстоны сабырдзинад кæй ис, сывæллæттæ æхстытæ кæй нал хъусынц, абон Хуссар Ирыстон кæй рæзы, уый тыххæй. Æмæ æппæт уыдон сты, кæй зæгъын æй хъæуы, Уæрæсейы Федерацийы руаджы. Стыр бузныг Дын æппæт уыдæтты тыххæй», – загъта Бибылты Анатоли.

Хуссарирыстойнаг фарсы ‘рдыгæй ма фембæлды хайад райстой Хицауады Сæрдар Пухаты Эрик, Президенты Администрацийы къухдариуæггæнæг Козаты Игорь, Финансты министр Хæбæлаты Азæ. Уæрæсейаг фарсæр-дыгæй та – Хицауады Сæрдары хæдивæг Виталий Мутко, Президенты æххуысгæнæг Владислав Сурков, Цæгат Кавказы хъуыддæгты фæдыл министр Сергей Чеботарев, Æдасдзинады Советы секретары хæдивæг Рашид Нургалиев, Фæсарæйнаг хъуыддæгты министры хæдивæг Игорь Моргулов, Финансты министры хæдивæг Леонид Горнин.

Боны фæткы ма уынаффæ кодтой дыууæфарсон æмгуыстады рæзты фарстытыл дæр.

 

УАЦАМОНГÆЙЫ ОРДЕН –  ВЛАДИМИР ПУТИН ÆМÆ ДМИТРИ МЕДВЕДЕВÆН

РХИ-йы уæлдæр паддзахадон хорзæх лæвæрд æрцыд Республикæ Хуссар Ирыс-тоны æмæ Уæрæсейы Федерацийы Президентты фембæлды рæстæджы.

РХИ-йы Президенты Барамынды дзырдæуы, зæгъгæ, Владимир Путинæн хорзæх лæвæрд цæуы «Республикæ Хуссар Ирыстоны ныхмæ Гуырдзыстоны хæстон агрессийæн ныхкъуырд радтыны хисæрмагонд хайбавæрды æмæ Республикæ Хуссар Ирыстоны суверенон паддзахаддзинад сфидар кæныны тыххæй».

Уацамонгæйы орденæй ма хорзæхджын æрцыд УФ-йы Хицауады Сæрдар Дмитри Медведев дæр. «Республикæ Хуссар Ирыстоны ныхмæ Гуырдзыстоны агрессийæн ныхкъуырд радтыны йе стыр лæггæдты, афтæ ма Республикæ Хуссар Ирыстоны хæдбардзинад сфидар кæныны йæ хисæрмагонд хайбавæрды тыххæй».

Бибылты Анатоли æмæ Владимир Путины фембæлд уыд, Республикæ Хуссар Ирыстоны хæдбардзинад Уæрæсейы Федераци куы банымадта, уыцы боныл 10 азы сæххæсты боны размæ.

РХИ-йы Президенты

пресс-службæ