РХИ-йы Хицауад æмæ компани «Газпром»-ы ‘хсæн сразыдзинады фæлгæтты цы кусæгон къорд арæзт æрцыд, уый ныртæккæ кусы республикæйы газификацийы «фæндагон картæ» аразыныл. Уый тыххæй ИА «Рес»-æн хъусын кæны Сæудæджерад, транспорт æмæ энергетикæйы комитеты сæрдар Бекъойты Геннади.
«Фæндагон картæ»-йæн йæ сæйраг контуртæ бæрæг æрцыдысты Мæскуыйы, дыууæ фарсы хайадистæй цы æмбырд уагъд æрцыд, уым.
«Кусæгон къордæн уыдис йæ фыццаг рабадт дæр, кæцыйы уынаффæ кодтой иууыл ахсджиагдæр фарстатыл. Документаци бацæттæ кæныны фæдыл куыстытæ фæуыдзысты ацы аз æмæ фидæнмæ та райдайдзæнис газификаци», – загъта Бекъойы фырт.
Банысан кæнын хъæуы уый, æмæ республикæйы районты газификацийы агъоммæ дыууæ фарсæрдыгæй дæр хъæуы стыр цæттæгæнæн куыст бакæнын закъондæттынадон æмæ техникон документаци бакусыны фæдыл, афтæ ма Хуссар Ирыстоны территоримæ газ ласын, транспортировкæ йæ кæнын, дих кæнын æмæ æфснайынимæ баст фарстытæ дæр.
Уымæй дарддæр ма фæбæлвырддæр кæнын хъæуы газы инфраструктурæйы объектты арæзтад æмæ эксплуатациимæ баст фарстатæ дæр.
Хуссар Ирыстонæй кусæгон къорды скондмæ бацыдысты фондз профилон министрадтæ æмæ ведомствоты, уыдоны ны-мæцы Юстицийы министрады къухдариуæггæнджытæ.
Хуссар Ирыстоны газификацийыл «Газпром» хъуамæ бахардз кæна фондз азы дæргъы 2 миллиард сомы .
Comments are closed, but trackbacks and pingbacks are open.