Хицауады Сæрдары хæдивæг радзырдта Дунеон армукъайы хайадисты тыххæй
28-æм августы Сириаг Арабаг Республикæйы кусæгон балцы уыдис Хуссар Ирыстоны делегаци Хицауады Сæрдары хæдивæг – Экономикон рæзты министр Бекъойты Геннадийы сæргълæудæй.
Йæ фæстиуджыты тыххæй 12 сентябры Sputnik-ы пресс-центры журналисттæн радзырдта Бекъойты Геннади.
«Райдианы мæ фæнды сымахæн фехъусын кæнын, нæ делегаци Дамаскы цы дунеон армукъа уагъд æрцыд Сириаг Арабаг Республикæйы президент Башар Хафаз аль-Асады инициативæйæ, уырдыгæй кæй æрыздæхтыстæм хъарм тæлмæнтимæ. Дамаскаг 61-æм дунеон армукъа у Скæсæйнаг бæстæты иууыл рагондæр. Фондз азы армукъа нал куыста бæрæг аххосæгтæм гæсгæ, фæлæ та 2017 азы йæ куыст сæндидзын кодта», – дзырдта экономикон рæзты министр.
Хицауады Сæрдары хæдивæг зæрдыл æрлæууын кодта 2018 азы Сирийы Республикæ Хуссар Ирыстон æмæ Абхазы республикæты хæдбардзинад куы банымадта, уый фæстæ ацы бæстæмæ хуынд кæй æрцыд РХИ-йы Президент Бибылты Анатоли. Дыууæ бæстæйы ‘хсæн фидар æрцыдысты дипломатон ахастытæ, къухтæ æрфыстæуыд къорд бадзырдыл. Уыцы нымæцы дыууæ паддзахады ‘хсæн базарадон-экономикон æмахастытæ сфидар кæнын æмæ иумæйаг культурон мадзæлттæ уадзын. Уый тыххæй та æнæмæнг бакæнын хъуыд дипломатон æмæ консулон минæварадтæ.
«Нæ делегацийыл Дамаскмæ ныццæугæйæ фембæлд Сирийы экономикæ æмæ æддагон политикæйы министры хæдивæг Халед Аб Факер æмæ ма ноджыдæр æндæр зынгæ сириаг къухдариуæггæнджытæ.
61-æм Дамаскаг дунеон армукъайы хайад иста Абхазы республикæйы делегаци дæр. Армукъа ацыд бæрзонд æмвæзадыл. Ам æвдыст цыдысты нырыккон сæудæджерады æнтыстытæ, IT технологитæ», – радзырдта Бекъойты Геннади.
Бекъойты Геннадийы ныхæстæм гæсгæ Сирийы экономикæ æмæ æддагон базарады министр Самар Аль Халилимæ бафыстой бадзырд базарадон хæдзæрттæ Хуссар Ирыстон æмæ Сирийы бакæныны фæдыл. Ацы бадзырдмæ гæсгæ дыууæ бæстæйы дæр конд æрцæудзысты сæрмагонд базарадон павильонтæ национ продукциимæ. Министры ныхæстæм гæсгæ ацы этапы Хуссар Ирыстоны фарсæн Сирийы базарадмæ йæ бон бавдисын у æрмæстдæр дон.
Экономикæйы министр куыд радзырдта, афтæмæй Дамаскаг армукъа, бæстæйы уавæрмæ нæ кæсгæйæ, у активон. Армукъайы æвдыст æрцыд сириаг хойраджы продукцийы алы хуызтæ, электроифтонгад, кæцы ис тынг бæрзонд æмвæзадыл æмæ а.д. Равдысты иууыл иумæ хайад истой 48 бæстæйы амалиуæггæнджытæ. Нæ делегацийы иууыл тынгдæр бацымыдис кодтой сириаг хæлцадон продукттæ – кофе, цай.
Журналистты фарстатæн, ома, кæд хъавынц дыууæ бæстæ базарадон хæдзæрттæ бакæнын, уый тыххæй та Бекъойты Геннади загъта, зæгъгæ, ацы азы кæрон хъуамæ гом æрцæуой.
Фембæлды кæрон Бекъойты Геннади загъта, зæгъгæ, хицауад хъавы Сирийы цы ирон егъау диаспорæ ис, уыимæ бастдзинæдтæ сфидар кæнын.
Уазæгты Марфа
Comments are closed, but trackbacks and pingbacks are open.