Куыд зонæм, афтæмæй Донецкы Адæмон Республикæйы лигъдæттæй нæ республикæ райста 42 адæймаджы. Уыдонæй 24 сты сывæллæттæ. Ныртæккæ уыдон комфортон уавæрты цæрынц, ресторан «Виктория»-йы цы уазæгдон ис, уым. Уырдæм сæм фæуазæг вæййынц нæ республикæйы цæрджытæй бирæтæ. Бахæссынц сывæллæттæн адджинæгтæ, дыргътæ æмæ, уæлæдарæсæй цух цæмæй сты, уыдон.
Ивгъуыд къуырийы та уыдоны бабæрæг кодтой Цхинвалы районы администрацийы кусджытæ Бибылты Валерийы сæргълæудæй. Цхинвалы районы уæвæг хъæуты администрацитæ æмæ иумæйаг скъолаты ахуыргæнджытæ уыдонæн ‘ртымбыл кодтой æхцайы фæрæзтæ 300 мин сомы.
«2014 азæй нырмæ кæрон нæй Донецк æмæ Луганскы цæрæг адæмы хъизæмæрттæн. Дæ хæдзар ныууадз æмæ искæй зæхмæ æрцу, уыцы хъуыддаг стыр зæрдæниз у. Уæрæсейы алы регионтæ дæр уæ сæхимæ хонынц, цæмæй уе ‘нахъом сабитæ байрæзой, скъолатæй ма фæиппæрд уой. Уыдзæн рæстæг æмæ сымах аздæхдзыстут фæстæмæ уæ хæдзæрттæм. Сабыр арвы бын дунейы рæсугъд фидæн араздзыстут. Ныр та уал стут махмæ кадджын уазджытæ æмæ айсут нæ чысыл æххуыс Цхинвалы районæй», – загъта Цхинвалы районы администрацийы сæргълæууæджы хæдивæг Бибылты Валери.
Сывæллæтты мадæлтæ стыр æхсызгонæй сæмбæлдысты уазджытыл. «Бузныг уын уæ лæвары тыххæй. Æнæуый дæр нæ тынг буц кæнут. Уазæджы суазæг кæнынмæ, æвæццæгæн, ирон адæмы хуызæн ничи рæхсы. Фæзминаг у уыцы æгъдау. Афтæ нæм кæсы, цыма уæ республикæ æппæт йæ хъару, йæ тыхтæ махмæ радта. Лæггад нын кæнынц хицæн адæймæгтæ дæр. Куыддæр æрцыдыстæм, афтæ та такси «Эконом» фехъусын кодта, цæттæ кæй у, мах æнæаргъæй ласынмæ. Æрбацæуынц нæм Хицауады минæвæрттæ дæр, цæмæй сæхи цæстæй феной, цы уавæрты цæрæм. Махæн ис æппæт дæр. Нывыл арæзт сты æнæниздзинад, æдасдзинад æмæ ахуырады фадæттæ. Нæ сывæллæттæй скъоладзаутæ чи сты, уыдон, цæмæй сæ ахуырæй фæсте ма баззайой, уый тыххæй ахуыр кæнынц 3-æм скъолайы. Ам нæ сабитыл фембæлдысты ахуыргæнджытæ æмæ ахуыргæнинæгтæ дæр рæвдаугæ. Ныридæгæн уыдон сæхицæн ссардтой хæлæрттæ. Скъолайы агъоммæ сабитæн дæр рæвдауæндæтты ис бынæттæ. Æхцайы фæрæзтæ райсын нæм раст нæ кæсы, фæлæ сæ иугæр сæрмагондæй махæн æрæмбырд кодтат, уæд ма цы гæнæн ис. Стыр бузныг, йæ хайбавæрд чи бахаста ацы хъуыддагмæ. Специалон æфсæддон операци цы республикæты цæуы, уым сты нæ фыдтæ, не ‘фсымæртæ. Уæ адæмæй Донецк æмæ Луганскмæ бархионтæ кæй ацыд, уый дæр зонæм. Хуыцауы фæнд уæд, цæмæй уыдон рæхджы сæрæгасæй æрыздæхой сæ Райгуырæн бæстæмæ», – дзырдта сылгоймæгтæй сæ иу Светлана Лагочова.
Comments are closed, but trackbacks and pingbacks are open.