Хетæгкаты Къостайы юбилейон аз кæй у, уымæ гæсгæ ацы аз нæ республикæйы расидт æрцыд конкурс Хетæгкаты Къостайы номыл Паддзахадон преми радтыны сæраппонд. Цытджын преми лæвæрд цæуы фондз номинацийæ – литературæ, публицистикæ, аивад, ирон филологи æмæ историон зонæдты фадгуыты.
Хуссар Ирыстоны Президенты цур Хетæгкаты Къостайы номыл Паддзахадон преми райсыны тыххæй къамисы уæнгтæн æрæджы уыд рабадт. Уыдон æруынаффæ кодтой æмæ конкурсмæ райстой 10 куысты. Уыдонæй æртæ сты литературæйы фадыджы, æртæ – аивады, дыууæ – публицистикæйы, иу – филологи æмæ иу та – историон зонæдты фадыджы.
Хетæгкаты Къостайы номыл Паддзахадон премийæн фыццаг бындур æвæрд æрцыд советон дуджы. Ацы кадджын преми лæвæрд фæцæуы культурæйы, аивады, зонады фадгуыты егъау æнтыстытæ кæмæн вæййы, уыдонæн.
Ивгъуыд æнусы 90-æм азты Къостайы номыл преми лæвæрд нал цыд, æхсæнадон-политикон уавæр нæ республикæйы æндыгъд кæй уыдис, уый тыххæй. Дзæвгар рæстæджы фæстæ – 2009 азы, Хуссар Ирыстон нымад паддзахад куы ссис, уæд преми дæттыны традици сног кодтой нæ хицауад. Уæд преми лæвæрд цыдис дыууæ азы иу хатт. Фæстæдæр Республикæ Хуссар Ирыстоны Президенты барамындмæ гæсгæ лæвæрд цæуы æрмæстдæр Къостайы юбилейон азты, ома, фондз азы иу хатт.
Премийы уагæвæрдмæ гæсгæ, конкурсы райдианы тыххæй уыд хъусинаг 24-æм майы бынæттон дзыллон информацийы фæрæзты. Конкурсы хайад райсын кæй фæндыд, уыдонæн уыд дыууæ мæйы æмгъуыд, сæхи раразмæ кæнын æмæ сæ документтæ къамисмæ бадæттыны тыххæй. Документтæ исыны бар уыд 1-æм августмæ. Махмæ уыцы æмгъуыдмæ преми райсыны тыххæй æрбацыд 12 заявкæйы. Фыццæгæм августы къамис æрыхгæдта документтæ исыны хъуыддаг æмбæлон актмæ гæсгæ», – банысан кодта Хетæгкаты Къостайы номыл премийы фæдыл къамисы сæрдар Джиоты Мурат.
Къостайы номыл Паддзахадон премийы ног лауреаттæ бæрæг æрцæудзысты октябры мæйы.
Хетæгкаты Къостайы номыл Паддзахадон преми саккаг кæнынц куыд Хуссар Ирыстоны, афтæ Цæгат Ирыстоны дæр. Æндæр æмæ æндæр азты преми нæ республикæйы райстой бирæ адæймæгтæ, уыдоны нымæцы Хъодалаты Герсан, Бигъуылаты Иринæ, Хъазиты Мелитон, Гаглойты Юри, Чехойты Оля, Дзабиты Зарбег, Хъуылымбегты Роберт, Уалыты Нинæ, Гаглойты Роберт æмæ æндæртæ.
Цæгат Ирыстоны Къостайы преми исынц 1964 азæй фæстæмæ. Фыццæгты ‘хсæн уыдысты, дунейыл хъуыстгонд ахуыргонд лингвист Абайты Васо, æмæ курдиатджын фыссæг Мамсыраты Дæбе. Уый фæстæ – Жорж Дю-мезиль, Плиты Грис, Джыккайты Шамиль, Æлборты Феликс æмæ æндæртæ.
Коцты Елена
