10 ноябры Хуссар Ирыстоны Мидхъуыддæгты министрады кусджытæ сæ профессионалон бæрæгбон банысан кæныны сæраппонд æрбацыдысты нæ горæты Тугъанты Махарбеджы уынгмæ. Цытджын мадзалы рæнхъыл слæууыдысты министрады аппараты кусджытæ, министрады æппæт хайæдты службæгæнджытæ, Цхинвал, Знауыр, Дзау æмæ Ленингоры районты мидхъуыддæгты органты минæвæрттæ. Хайад дзы райстой мидхъуыдæгты министрады ветерантæ дæр.
Ардæм æрбацыдысты Хуссар Ирыстоны Хицауады Сæрдар Хъуылымбегты Доменти, Мидхъуыддæгты министр Лæууойты Æхсар, æндæр бæрнон адæймæгтæ.
Мадзалы райдианы сæрмагонд сконды раз рахаст æрцыд паддзахадон тырыса æмæ айзæлыд Республикæ Хуссар Ирыстоны гимн.
Уый фæстæ ныхасы бар лæвæрд æрцыд Хуссар Ирыстоны Мидхъуыддæгты министрады министр Лæууойты Æхсарæн. Уый бæрæгбоны цытæн раарфæ кодта милицийы æппæт кусджытæн. Бафæндыд æй, цæмæй сын æнтыстытæ уа куыд царды, афтæ куысты дæр. Уый аккаг стут – дарддæр дзырдта министр, уымæн æмæ нæ адæмы хæрзиуæгон цард æмæ паддзахады размæцыды исут активон хайад. Бахъуыды рæстæджы искæй царды сæрвæлтау нæ бавгъау кæнут уæхи цард. Уый бæрæг у 99 азы размæ милици арæзт куы æрцыд, уæдæй абонмæ. Гуырдзиаг-ирон хæсты рæстæджы та фыдгæнджыты ныхмæ хъæбатыр тох чи кодта, уыдон æхсæн уыдысты нæ милицийы кусджытæ. Ацы æгъатыр хæсты милицийы кусджытæй 20 хорзæхджын æрцыдысты Уацамонгæйы ордентæй. Уыдонæй 6-æн хорзæх лæвæрд æрцыд сæ амæлæты фæстæ.
Абон рæстæг æмæ домæнтæ дæр сты æндæр, куысты фæзынд ивындзинæдтæ. Уый хынцгæйæ æппынæдзух архайæм кадртæ хъуыздæр æмæ тыхджындæр кæныныл, æмæ ис æнтыстытæ. Фыдгæнджыты ныхмæ ист цæуынц æмбæлон барæнтæ».
Цытджын мадзалы раныхас кодта æмæ милицийы кусджытæн сæ бæрæгбоны цытæн раарфæ кодта Хуссар Ирыстоны Хицауады Сæрдар Хъуылымбегты Доменти дæр.
Уый фæстæ министрады кусджыты иу къордæн лæвæрд æрцыдысты хорзæхтæ.
Гæззаты Иван
Comments are closed, but trackbacks and pingbacks are open.