15-æм февралы нæ горæты микрорайон БАМ-ы, цытджын æгъдауæй байгом Æфснайæн бангы уæлæмхас филиал.
Ахæм филиалтæ нæ горæты уымæй размæ та æрбайгом Джиоты Аланы проспекты кæрон базарадон центр «Хурзæрин»-ы, æмæ Дзулфыцæн комбинаты фарсмæ. БАМ-ы районы «Энергоресурс – Хуссар Ирыстон»-ы ныхмæ цы филиал байгом, уый та у æртыккаг. Йе ‘рбайгом кæнынæн ис социалон нысаниуæг – бангы лæггæдтæ хъуамæ цæрджытæн уой æнцонвадат. Сталины уынджы Æфснайæн бангæн цы сæйраг филиал ис, уым, кæд, цæрджытæн лæггад кæныны нысанæн, цалдæр рудзынджы ис, уæддæр дзы вæййы стыр радтæ, уæлдайдæр та пенситæ дæттыны афон. Цы филиал гом цæуы, уым та, пенситæй дарддæр, цæрджытæн кæндзысты банджы æндæр лæггæдтæ дæр. Зæгъæм, ам бафидæн уыдзæн коммуналон лæггæдтæ, кредиттæ исыны тыххæй документтæ бацæттæ кæнын. Ам хатырон кредиттæ райсын сæ бон уыдзæн фермертæ æмæ амалиуæггæнджытæн дæр.
Филиал гом кæныны церемониты хайад райстой Хицауады Сæрдар Джусойты Константин, горæты администрацийы сæргълæууæг Хуыгаты Ромео, Национ банджы сæргълæууæг Джиоты Жаннæ, ацы районæй РХИ-йы Парламенты депутаттæ Тъехты Алан, Сланты Иван æмæ æндæртæ.
Æфснайæн банчы сæргълæууæг Бекъойты Сослан загъта: «Æфснайæн банчы филиалы хорз уавæртæ уыдзæн клиенттæн. Йæ кусджытæ лæггад кæндзысты «БАМ», «Мæскуыйаг», «Цæгаттаг» æмæ «Хурзæрин»-ы микрорайонты цæрджытæн дæр. Афтæ ма, ардæм хæстæг цы уынгтæ ис, уыдоны цæрджытæн. Цард размæ цæуы æмæ æнцонвадатæн бирæ рæтты раджы ахызтысты картæйон системæмæ. Абон уа æви сом, мах дæр уырдæм хъæуы. Ацы ногдзинад æнцонвадат уыдзæн алы адæймагæн дæр. Ацæргæ адæймæгтæ сæ пенси исынмæ фæзивæг кæнынц дæрддзæф ранмæ ацæуын, стæй сæ коммуналон фиддонтæ бафидыны тыххæй дæр рады ма хъуамæ лæууой. Уыдæттæ иууылдæр бахынцыдтам æмæ æрбайгом кодтам ацы филиал».
Банчы филиалы, æцæгдæр, ис комфортон уавæртæ кусынæн. Хорз уавæртæ дзы ис клиенттæн дæр. Ифтонг у видеоцæстдарæнтæй.
Йæ байгомимæ ардæм фæзындысты фыццаг клиенттæ дæр. Сæ иу – ацы районы цæрæг Тедеты Роман загъта: «Раздæр бангæй кредит райсын уыд вазыгджын процедурæ. Фæлæ ныр ам рады лæууын нæ хъæудзæн. Кæд æмæ дæ кредитон истори йæ уагыл уа, ома, уый размæ кредитор цы æхца ахаста бангæй, уый схемæмæ гæсгæ æрвылмæй дæр афоныл фыста, уæд кредит райсдзæн æнæкъуылымпытæй. Уымæй уæлдай ма цалдæр азы размæ фæкъаддæр кредиты афæдзон процент æмæ бæрæг фæфылдæр сты кредитисджытæ. Мæнæн ныридæгæн мæ гæххæттытæ арæзт сты, райсом æрбацæудзынæн æмæ ме ‘хца, æнцад-æнцойæ, райсдзынæн».
БАМ-ы районы æндæр ацæргæ сылгоймаг та афтæ зæгъы: «Мæ пенси бангæй фæисын алы мæй дæр 16-æм боны. Зивæг-иу кодтон бангмæ ацæуынмæ, ныр мæ пенси ам исдзынæн æмæ ма уымæй хуыздæр цы ис! Стыр бузныг зæгъын, йæ байгом кæныныл чи бакуыста, æппæт уыдонæн».
УАЗÆГТЫ Марфа
