Ирыстоны цы минералон дæттæ ис, уыдонæй иууыл рагондæрыл нымад у Дзауы суар. Йæ пайдайы миниуджытæ йын рагæй зыдтой бынæттон цæрджытæ æмæ йæ нуæзтой хосæн. Ахуыргæндты дæр бацымыдис кодта суар æмæ донæй сарæзтой иртæстытæ. Уый адыл 1929 азы Дзауы суармæ хæстæг сырæзт пансионат. Ам уыцы иурæстæджы сæ бон баулæфын уыдис 250 адæймагæн. Пансионаты-иу бынат кæй нæ фæцис, уый та – иу суармæ хæстæг æххуырст фатерты æрцард. Чи дзыулæфыд, уыдон дæр-иу сæ фылдæр рæстæг æрвыстой суары цур. Машинæвæндаг æм нæ уыд æмæ йæм къахæй цыдысты, фæлæ-иу йæ алфæмблай алыхатт дæр уыд æфснайд. Зæххæнкъуыст раууатмæ æркодта Дзауы суар æмæ йæ алфæмблай дæр. Ныххæлæттаг пансионат æмæ суармæ дæр йæ хъус ничиуал дардта.
Цалдæр азы размæ Дзауы администрацийы цæрæнуатон-коммуналон хайады кусджытæ суары алфæмблай ныссыгъдæг кодтой, сæмбонд æй кодтой, ныссагътой дзы соцъи бæлæстæ. Хъавыдысты ам улæфæн зонæ саразынмæ.
Специалистты хатдзæгтæм гæсгæ Дзауы суар ахъаз у, ахсæнæй чи хъæрзы, ахæм адæймæгтæн. Гастрит кæмæн ис, уыдон дæр ацы дон фæнуазынц. Зæгъынц, зæгъгæ, хорз фидар кæны иммунитет дæр. Гастроэнтерологтæ куыд амонынц, афтæмæй суарæй бон нуазын хъæуы иу литры бæрц. Советон дуджы Дзауы суары дон барстой Ессентук-4 суары донимæ. Сæ мидæг цы минералтæ ис, уыдон сты æнгæс, хорз тайын кæнынц, адæймаджы организмы цы биологон элементтæ ис, уыдоны.
Ацы минералон доны бындурыл 2018 азы уадзын райдыдтой продукци базарадон маркæ «Санай»-ы бын 1,5 литруат мигæнæнты. Йæ саразæг уыд не ‘мбæстаг амалиуæггæнæг Тедеты Дзамболат. Паддзахадон регистраци райсыны фæстæ уый сæвæрдта донуадзæн хахх æмæ суар реализаци цыд бынæттон магазинты. Йæ гуырахст стыр нæ уыд. Заводы къухдариуæггæнæг уæд уыдис Сиукъаты Радион æмæ куыд дзырдта, афтæмæй сын уыдис сæ продукци таможнæйон цæдисы бæстæтæм ласыны бар. Фæлæ иуцасдæр рæстæджы фæстæ завод æхгæд æрцыд. Йæ аххосаг ын рахуыдтой, республикæйæн æддæмæ аласыны хæрдзтæ бирæ кæй лæууыдысты заводæн, уый.
Дзауы суар ныртæккæ официалонæй никæйы у. Хорз уаид, кæддæр æхсызгонæй кæй нуæзтой нæ хистæр фæлтæр, уыцы уарзон минералон дон «Дзау» абон дæр куы æлхæниккам. Йæ нуазынмæ æрмæст хицæн адæймæгтæ куыд цæуынц, афтæ йæ агурæг цæуой магазинтæм, базæрттæм…
УАЗÆГТЫ Марфа
