Республикæ Хуссар Ирыстоны Президент Бибылты Анатоли æмæ УФ-йы Æдасдзинады советы нымæрдары хæдивæг Рашид Нургалиев инспекцион балцы ацыдысты республикæйы районтыл. Балцы ма хайад райстой РХИ-йы УФ-йы Уæлрадон æмæ Æххæстбарджын минæвар Марат Кулахметов, РХИ-йы Мидхъуыддæгты министр Наниты Игорь, РХИ-йы Хъахъхъæнынады министры хæстæ æххæстгæнæг Гассеты Ибрагим æмæ æндæр официалон адæймæгтæ.

Фыццаджы уал Бибылты Анатоли æмæ Рашид Нургалиев сæ цæст ахастой Цхинвалы районы уыцы бынатыл, цыран Хуссар Ирыстоныл транзит байгом кæнгæйæ гæнæн ис æмæ арæзт æрцæуа горæтæн иувæрсты цæуæг фæндаг уæзау уæзтæ ласæг транспортæн.

Уый фæстæ уыдон ацыдысты Зонкъары донæмбырдгæнæнмæ, цыран федтой доны ауæзт. Бибылты Анатоли æмæ Рашид Нургалиев уынаффæ кодтой арæзтады æдасдзинадыл.

Сæ нысаны кæройнаг пункт уыд республикæйы Ленингоры район. Бибылты Анатоли Рашид Нургалиевимæ иумæ басгæрстой Республикæ Хуссар Ирыстоны социалон-экономикон рæзтæн ахъазгæнæг Инвестицион программæйы фæлгæтты цы объекттæ арæзт æрцыд, уыдон. Сæйраджыдæр Ленингоры поселочы 1-æм сабидон æмæ скъола, кæцы эксплуатацимæ ратдзысты ног ахуыры азы райдианмæ.

Балц фæци æмбырдæй, цыран уынаффæ кодтой Хуссар Ирыстоны арæнгæрон территорийы æдасдзинады фарстатыл.

Comments are closed, but trackbacks and pingbacks are open.