Цымæ театрдзаутæй искуы исчи ахъуыды кодта, спектаклы сырæзты ахсджиаг роль нывгæнæг-декораторæн лæвæрд кæй ис? Æвæццæгæн, театралон аивадимæ æнгомдæр чи у, йæ куыст ын лæмбынæгдæр чи зоны, æрмæстдæр ахæмтæ. Æмæ афтæмæй та фыццаджыдæр сæйраг режиссер æмæ нывгæнæг-декораторы æмгуыстæй æвæрд æрцæуы спектакль. Декоратор-нывгæнæг хъуамæ зона æнæхъæн сценари. Уый у сценæйы архитектор æмæ текст арф хъуамæ æмбара, цæмæй йæ бон суа спектаклы цыды дуг, уавæртæ æмæ æндæр ахадгæ миниуджытæ йæ декорациты руаджы равдисын, актертæн уа æнцонвадат, сценæмæкæсæгæн та хæсса æхцондзинад.
Нæ республикæй драмон театры бутафорон цехы бригадир, аивадон æвæрæг, нывгæнæг Джиоты Вадим хæрз чысылæй райдыдта ныв кæнын. Фæлæ йæхæдæг куыд загъта, афтæмæй искуы сценæтæ кæй фæлындздзæнис, ууыл, æгæрыстæмæй, уæлдæр ахуыргæнæндæтты куы ахуыр кодта, уæддæр никуы ахъуыды кодта. «Дзауы астæуккаг скъолайæ мæ зæрдыл баззадис, мæ ныййаржытæ-иу мын мæ «хъулæттæ» къултыл куы бакодтой. Уазæг-иу нæм куы ‘рбацыд, уæд-иу ын сæ равдыстой æмæ-иу мæ алчидæр раппæлыд. Уый та мыл «сагъта базыртæ» æмæ, æвæццæгæн, ахъаз фæцис, мæ фидæн аивадимæ кæй баиу кодтон, уымæн», – радзырдта Вадим.
Вадим ахуыр кодта ХИПУ-йы аивадон факультеты. Стыр æхцондзинад иста йæ куыстытæ ахуыргæнджыты зæрдæмæ кæй цыдысты, кæй сын аргъ кодтой, уымæй. Горæтон равдыстыты-иу райстой хайад æмæ сын уыдис æнтыст. Фæлæ æрыгон курдиатджын лæппумæ фаг нæ кастысты йæ райсгæ зонындзинæдтæ: «Арæх-иу мыл амбæлдысты ахæм терминтæ кæнæ аивадимæ баст æндæр бæрæггæнæнтæ, кæцыты-иу нæ зыдтон, мæ зонæнтæ мæм фаг нæ кастысты æмæ мæ ахуыр адарддæр кодтон Цæгат Ирыстоны Падзахадон университеты нывкæнынады факультеты», – зæгъы Вадим.
Вадимæн ныв кæныны курдиат æрдзæй ратгæ у, æви нæ, уый тыххæй йæхæдæг зæгъы, зæгъæ, æрмæст курдиат фаг нæу, цæмæй адæймагæн уа æнтыстытæ: «Фæндондзинад, куыстмæ уарзондзинад, æмæ нысанмæздæхтæй тырнындзинад сты æнтыстыты рахæцæнтæ. Æрдзæй цыфæнды курдиат лæвæрд куы рахæссай, уæддæр хъæуы кусын, æмæ ма стыр нысаниуæг ис цы куысты уæлхъус уай, уый уарзынæн», – зæгъы йæ хъуыды нывгæнæг.
Вадимы дипломон куысты темæ уыд аивадон декорацитæ æмæ сæ нысаниуджытыл. Цæмæй фылдæр зонæнтæ райстаид, уый тыххæй сфæнд кодта драмон театры нывгæнæг – декораторæй бакусын. 2011 азы бацыд бутафорон цехы бригадиры бынатмæ. Рæстæгмæ, бацыд фæлæ… «Тынг мæ зæрдæмæ фæцыд куыст, исын дзы стыр æхцондзинад. Афтæ йæ бауарзтон, æмæ цæттæ дæн цыфæнды зын уавæрты дæр мæ разылæууæг хæстæ сæххæст кæнынмæ», – загъта нывгæнæг-бутафор.
Вадим бутафорон цехмæ куы бацыд, уæдæй нырмæ бакуыста тынг бирæ спектаклты сценæтæ сфæлындзыныл. Хуымæтæджы хъуымацы гæппæлтæ, пенопласт, пеноплекс, хъæдæрмæджы, зайæгойты хæйттæ æмæ æндæр ахæм æрмæджытæй нывгæнæджы ахорæнтимæ иумæ Вадим саразы спектаклы æвæрæг режиссер æмæ нывгæнæг гæххæттыл цы сценæ сныв кæнынц, уый. Цæмæй ахæм куыст æнтыстджынæй бакæнай, уый тыххæй, фыццаджыдæр, хъуамæ зонай, авторы цы фæнды радæттын сценæмæкæсæгæн, цы дуджы цæуы архайд, цы уавæрты, æмæ уыдæттæ хынцгæйæ спайда кæнай æмбæлон ахорæнтæй. Спектаклæн хъуамæ æххæстæй зонай куыд йе’ддаг хуыз, афтæ йæ мидис дæр. Йæ бирæ куыстытæй йæхæдæг райгонд у Остъаты Аланы æвæрд спектакль «Фæстаг æвдисæн», «Братья», «Укрощение строптивой» æмæ «Файнустытæ»-йы декорацион куыстытæй. Спектакль «Дон-Жуан»-æн та сарæзта скульптурæтæ дæр.
Бутафоры куысты æмрæнхъ Вадим у цæгат æмæ Хуссар Ирыстоны Нывгæнджыты цæдисы уæнг æмæ йæ конд нывтæ хайад райсынц куыд нæ республикæйы, афтæ Уæрæсейы Федерацийы равдыстыты дæр.
Хуыгаты Милена
Comments are closed, but trackbacks and pingbacks are open.