Арæзтадон куыстытæ – сæ тæмæны

Куыд ивгъуыд аз, афтæ та 2017 азы нæ республикæйы бирæ бæстыхæйттæ æрцæудзæн арæзт.

Университетон комплекс, операцион-хирургион корпус, Ленингоры поселочы уырыссаг скъолайы агъуыст, Хъайтарты уынгыл бирæфатерон хæ-дзæрттæ, гуырæн хæдзары арæзтад – уыдон райдыдтой фарон.

Фæлæ куыстытæ кæронмæ æххæст не ‘рцыдысты, уымæ гæсгæ объекттæ рахызтысты ацы азы программæмæ.

«Ацы аз адарддæр уыдзысты куыстытæ столицæйы уынгтыл. Нывæзтмæ гæсгæ хæрзарæзт хъуамæ æрцæуа 12 уынджы», – загътой Арæзтады министрады пресс-службæйы.

Ивестпрограммæмæ  цы уынгтæ бахауд, уыдон сты: Герцены, Дзауы, Скъолайы, Фæсивæды, Джиоты Дауыты, Колыты Аксойы, Кутузовы, Сомихæгты, æмæ Кировы уынгтæ. Ноджы ма дыууæ уынджы Калинины æмæ Заводы уынгтæ цалцæг æрцæудзысты иу хайæ. Уый тыххæй Инвестпрограммæйæ хыгъд æрцæудзæн 471 милуан сомы.

Адарддæр уыдзæн Хъайтарты уынгыл микрорайоны арæзтад дæр. цæмæй микрорайоны арæзтад балхынцъ уа, уый тыххæй программæйæ хицæн æрцæудзæн 380 милуан сомы. Райдайдзысты аразын Гаглойы фырты уынгыл цæрæн комплекс дæр. Уымæн та Инвестпрограммæйæ хицæн цæуы 220,5 милуан сомы.

Ацы аз ма райдайдзæн Хуссар Ирыстоны хъахъхъæнджыты мемориалон комплексы арæзтад. Йæ фæзуат уыдзæн авд мин квадратон метрæй фылдæр. Уымæн та йæ реализацийы хæрдзтæ уыдзыстьы 63 милуан сомы..

Хъуамæ кæронмæ ахæццæ уа автомобилон фæндаг «Гуфта-Къуайса». Куыд зонæм, афтæмæй уымæн йæ арæзтады фыццаг этап комкоммæ зæгъгæйæ та фæндаджы 13-æм километры фадыджы онг фæуд у. Цы аразинæгтæ ма дзы баззад, уый тыххæй хицæн æрцæудзæн 336 милуан сомы.

Инвестпрограммæйы ма ис Ленингоры районы доны хæтæлтæ, канализаци æмæ энергоифтонгады арæзтадтæ.

Уынгтыл дзургæйæ Арæзтады министрады пресс-службæ ноджыдæр загъта, зæгъгæ, уыдон æмрæнхъ арæзт æрцæудзæн Мады Майрæмы аргъуаны раз цы фæзуат ис, уый дæр. Кæд, дам, нырмæ цæнтралон уынгтæ арæзт цыдысты, уæд нырæй фæс-тæмæ та цалцæг æрцæудзысты фæрсаг уынгтæ дæр, сæ иу хай ис горæты, иннæ хай та  горæтгæрон районты.

Адарддæр ма уыдзæн реалон секторы проекты финанскæнынад дæр. Ацы мадзæлттæ та бюджетæн слæудзысты 266 милуан сомы.

Арæзтады министрады нын куыд загътой, афтæмæй ацы аз Хуссар Ирыстоны кæронмæ бахæццæ уыдзæн арæзтадон Инвестпрограммæйы фæстаг этап, кæцы райстæуыд 2014 азы. Йæ реализацийæн уæрæсейаг бюджетæй рахицæн æрцыд фараст миллиард сомæй фылдæр.

УАЗÆГТЫ М.