20 апрелы хуссарирыстойнаг-гуырдзиаг арæныл Эргнеты хъæумæ хæстæг уагъд æрцыд Инциденттæ ма æруадзын æмæ сæм хъусдард здахыны фæдыл механизмты фæлгæтты 65-æм фембæлд. Традицимæ гæсгæ механизмты куысты хайад райстой Республикæ Хуссар Ирыстон, Гуырдзыстон, Уæрæсейы Федераци, афтæ Евроцæдис æмæ ЕÆÆО-йы минæвæрттæ.

Механизмты куыстæн хатдзæгтæ аразгæйæ Хуссар Ирыстонæй делегацийы сæргълæууæг, РХИ-йы Президенты Паддзахаддон уынаффæгæнæг Санахъоты Дауыт афтæ радзырдта:

«Фембæлды рæстæджы дзырд цыд цалдæр фарстыл, кæцытæ, фыццаджыдæр, баст сты паддзахадон арæнтæ халыны цаутыл. Хынцыд æрцыд 14-æм ахæм цауы, сæ аразджытæ сты гуырдзиаг æмбæстæгтæ. Æмбæлон процедурæты фæстæ лæвæрд æрцыдысты Гуырдзыстоны фарсмæ. Дыууæ арæнхалæджы фæдыл ма цæуы куыст æмæ уыдон дæр лæвæрд æрцæудзысты».

Арæнтыл уавæр кæддæриддæр хъуамæ уа стабилон — уыцы фарстмæ алы фембæлды дæр здæхт цæуы сæрмагонд хъусдард.

Гуырдзиаг фарс ма рæгъмæ рахаста, æрæджы Ленингоры районы цы гуырдзиаг æмбæстаг Башарули амард, уый фæдыл фарст. Ацы фарсты фæдыл хъуыддаг æхгæд уыд, фæлæ йæ ныййарæг мад сног кодта фæдагурæн мадзæлттæ (фæзынд æм бæрæг фарстатæ). Санахъоты Дауыты ныхæстæм гæсгæ йын бавдыстой механизм, Хуссар Ирыстоны закъоны нормæтæм гæсгæ, кæцыйæ йæ бон у æмæ спайда кæна.

Дзырд ма цыд Тирипоны донхæргæнæн доны фæдыл. Механизмты куысты уынаффæ цыд техникон фарстытыл æмæ донæй Хуссар Ирыстон æмæ Гуырдзыстоны хъæутæ рæстæгыл æмæ æххæст гуырахстæй пайда кæныныл.

Æбæрæгæй сæфт æмбæстæгты фæдыл фарст Хуссар Ирыстоны фарсæн ахсджиаг æмæ æнæаргъæвгæ фарст у. Уый фæдыл Санахъоты Дауыт банысан кодта, ныртæккæ ацы фарстыл дзырд кæй цæуы æртæфарсон Координацион механизмы, цыран хайад исынц Хуссар Ирыстон, Уæрæсейы Федераци æмæ Гуырдзыстон. Механизм координаци кæны Сырх Дзуары Дунеон Комитет. Уым, кæй зæгъын æй хъæуы, дзырд цæуы æбæрæгæй сæфт æмбæстæгтæм хауæг æппæт фарстатыл. Уыцы Координацион механизмы куысты руаджы бæлвырд æрцыд не ’мбæстаг Тедеты Маирбеджы фæдыл фарст.

Механизмты фæлгæтты радон, 66-æм фембæлд уагъд цæудзæн 16 майы.

Нæ уацхæссæг

Ацы æрмæджытæ дæр бакæс:

Хуссар Ирыстон нæ иппæрд кæны йæ сæйраг фарстæй ГУЫРДЗЫСТОН ЙÆ КЪУХ НÆ ИСЫ ПРОВОКАЦИОН АРХАЙДЫЛ Механизмты фæлгæтты куыст адарддæр Арæныл уавæр у стабилон Алчидæр хъуамæ хынца паддзахадон арæнты уæвынад

Comments are closed, but trackbacks and pingbacks are open.