Инциденттæ ма æруадзын æмæ сæм хъусдард здахыны фæдыл механизмты форматы радон, 121-æм фембæлд Эргнетмæ хæстæг.
Хуссар Ирыстонæй механизмты форматы хуссарирыстойнаг делегацийы сæргълæууæг, Фæсконфликтон фарстатæ бæстонкæныны фæдыл Президенты æххæстбарджын минæвары хæстæ æххæстгæнæг Коцты Егор фембæлдæн хатдзæгтæ аразгæйæ, информацион фæрæзтæн афтæ радзырдта, зæгъгæ, паддзахадон арæнтæ фылдæр хæлд цæуынц æнæнхъæлæджы, кæнæ та бирæтæ кæй нæ фæзонынц, арæнты хахх кæуылты цæуы, уый аххосæй. Æмæ ахæм рæстæджы бæрæг фæткхалæджы ныхмæ равдисынц гуманон ахаст. Кæд фыццаг хатт фехалы арæнты фæтк, уæд æй æнæ ивар санкцитæй æмæ уголовон хъуыддаг бакæнынæй ахизын кæнынц фæстæмæ. Кæд æмæ уыцы фæткхалæн цаутæ фæлхатт æрцæуынц, уæд ахæм рæстæджы конд æрцæуы уголовон хъуыддаг, суанг тæрхондоны æркæсыны онг.
Механизмты фæстаг фембæлдæй фæстæмæ арæнты фæтк чи фехæлдта, уыдоны нымæц у æхсæз. Уыцы æхсæзæй иу факты фæдыл конд уголовон хъуыддаг, лæвæрд æрцыд тæрхондонмæ. Иу фæткхалæн цау та уыд афтæ – цуангæнджытæ фæдзæгъæл сты æмæ афтæмæй фехæлдтой Хуссар Ирыстоны паддзахадон арæн. Ныртæккæ уагъд цæуынц фæдагурæн мадзæлттæ æмæ уый бындурыл ист æрцæудзæн æмбæлон уынаффæ.
Егоры ныхæстæм гæсгæ фæтыхджындæр кодтой гуырдзиаг фарсы цæрджытæн информаци дæттын æмæ æдасдзинады мадзæлттæ, паддзахадон арæнтæ халын кæй нæ хъæуы, науæд ахст цæудзысты кæнæ сæ ныхмæ конд кæй цæудзæн уголовон хъуыддаг.
Ахæм архайдтыты руаджы фæкъаддæр сты арæнты фæткхалджытæ. Æввахс рæстæджы республикæйы территорийæ иуварс æрцæудзæсты иууыл къаддæр цыппар паддзахадон арæнты фæткхалæджы. Уыдонæн кæронмæ бахæццæ ахæстоны бадыны рæстæг.
Уистæйы æнæзакъонон пост
Механизмты форматы фæлгæтты æппынæдзуз уынаффæ цæуы, Хуссар Ирыстоны территорийыл Уистæйы хъæуы цы æнæзакъонон пост ис, уый аиуварс кæныны фарстыл. Хуссар Ирыстонæй делегацийы сæргълæууæг Коцты Егоры ныхæстæм гæсгæ ацы фарсты фæдыл уагъд цæуынц бадзырдтытæ. Банысан кодта, уæззаугай кæй цæуынц, фæлæ кæй архайдзысты, цæмæй нæ территорийæ æнæзакъонон пост иуварс æрцæуа.
Æнæпилотон тæхæн аппараттæ кæй сты, уый сбæрæг кæнын зын у.
Коцты Егоры ныхæстæм гæсгæ æнæпилотон тæхæн аппаратты фарст вазыгджын у, уымæн æмæ уæлдæфы куы вæййынц, уæд кæй сты, уый сбæрæг кæнын хуымæтæг нæу.
«Æппынæдзух тæвд хаххы руаджы фехъусын кæнæм æнæпилотон тæхæн аппараттæ кæй тæхынц, уыцы факт. Гуырдзиаг фарс уый сбæрæг кæныныл цалынмæ фæархайы, уæдмæ тæхæн аппарат атæхы Хуссар Ирыстоны уæлдæфон тыгъдадæй æмæ æрбады Гуырдзыстоны территорийыл. Кæй зæгъын æй хъæуы, ахæм уавæрты факт сбæрæг кæнын зын у», – банысан кодта делегацийы сæргълæууæг.
Хуссарирыстойнаг фарс нæ дызæрдыг кæны, уыцы æнæпилотон тæхæн аппараттæ гуырдзиаг фарсы кæй сты, уымæн æмæ социалон хызæгты гуырдзиаг сегмент йемыдзаг у Хуссар Ирыстоны территорийыл ист къамтæй. Уыцы къамтæ сисынц Гуырдзыстоны территорийæ æмæ, кæй зæгъын æй хъæуы, нæ республикæйы территорийæ дæр.
Донхæры донæй ифтонгады фарст
Гуырдзиаг фарсимæ бадзырдтыты руаджы уæрæсейаг фарс Евроцæдис æмæ ЕÆÆО-йы хъусдарджыты руаджы Хуссар Ирыстоны æнæкъуылымпыйæ сифтонг кодтой донхæры донæй Цъинагары зонæ æмæ уымæ æввахс хъæуты. Ацы фарстыл дарддæр куыст цæудзæн. Цъинагары зонæйæ дон цæуы гуырдзиаг территоримæ æмæ та фæстæмæ рахизы хуссарирыстойнаг территоримæ – цæрæн пункт Орчъосанмæ.
«Фарсты фæдыл серьезон проблемæтæ фæзыны. Уыдзæн нын техникон фембæлд æмæ нæ ныфс ис, донхæры дон фæстæмæ Орчъосанæн дæр лæвæрд кæй цæудзæн», – банысан кодта уый.
Механизмты фæлгæтты ма уынаффæ цыд паддзахадон арæнты делимитаци æмæ демаркацийы фарстытыл. Фæрстæ куыд бадзырдтой, уымæ гæсгæ форматы фæлгæтты радон фембæлд уагъд æрцæудзæн 12 ноябры.
КЪÆБУЛТЫ Маринæ
