Æхсæнадæмон конкурс «Розы обзора»-мæ, кæцы уагъд цыд Болгарийы хуынд æрцыд хуссарирыстойнаг сывæллæтты кафты ансамбль «Кафт».

Хореографион ансамбль «Кафт»-ы къухдариуæггæнæг у Хуссар Ирыстон æмæ Абхазы республикæты сгуыхт артист Майа Четион. Сывæллæттæ Болгаримæ афæндараст сты 15-æм июлы. Ансамблы къухдариуæггæнæгæй дарддæр ма семæ æмбалц уыдысты хореографтæ Кæркуысты Алена, Бестауты Ирмæ æмæ Джиоты Къоста.

Болгарийы уагъдцæуæг фестивалы хайад райстой 27 коллективы Уæрæсейы алы регионтæй. Фестивалы организатортæ сты сфæлдыстадон коллективты æхсæнадæмон координатортæ «Дети 21 века».

Конкурс ауадзыны нысан уыд адæмты национ культурæ бахъахъхъæнын æмæ популяризаци кæнын.

Конкурсы уагъд цыд цалдæр номинацийы: адæмон, классикон, национ стилизацийы нырыккон æмæ эстрадон-спортивон кафтытæй.

Уагæвæрдмæ гæсгæ нæ сывæллæттæ бацæттæ кодтой видео ролик цыран æвдыст æрцыдысты Хуссар Ирыстоны æрдзы рæсугъддзинæдтæ.

Ансамбль «Кафт» жюрийы уæнгты раз сæххæст кодта «Симд», «Хонгæ», «Абхазаг кафт» æмæ «Хъаматимæ кафт».

Жюрийы уæнгтæ стыр аргъ скодтой не сфæлдыстадон коллективæн. Нæ сабиты куырдиат зæрдæскъæфдзинад, кæфтыты аивдзинады уацары уыйбæрц бахаудтой æмæ сын æппæт номинациты дæр сæвæрдтой иттæг хорз нысæнттæ. Иу-уыл тынгдæр та сæ зæрдæмæ фæцыдысты нæ ансамблы националон костюмтæ.

«Гран-при райсын махæн у стыр уæлахиз. Уымæн æмæ Болгарийы зæххыл æхсæнадæмон конкурс «Розы обзора»-йы хайад истой сфæлдыстадон коллективты хуыздæрты хуыздæртæ. Жюрийы уæнгтæ нæ ансамбль «Кафт»-ы архайд банымадтой иууыл хуыздæрыл æппæт номинациты дæр», – фыссы ансамблы къухдариуæггæнæг Майа Четион йæ социалон хызæджы фарсыл.

Бузныг зæгъы интернеты фæрцы «Розы обзора»-мæ нæ республикæйы цæрджытæй, сывæллæтты æххуысæн СМС-тæ чи арвыста, уыдонæн дæр.

Ансамбль «Кафт» фыццаг хатт не ссис «Гран-при»-йы хицау. Ивгъуыд аз та уыдон хайад истой Сочийы цæуæг адæмон кæфтыты фестивалы, уым дæр Майа Четионы сфæлдыстадон коллектив ссис уæлахиздзау.

Ансамбль «Кафт» – Болгаримæ арвитыны тыххæй финансон æххуыс бакодта нæ бæстæйы сæргълæууæг Бибылты Анатоли.

Уазæгты Марфа

Ацы æрмæджытæ дæр бакæс:

Уагъд æрцыд «Хонгæ кафт»-ы фестиваль-конкурс Кафты стыр дæсны Кафты стыр дæсныйы цытæн – «Симд»-ы концерт Хуссарирыстойнаг сценæйыл — Цæгат Ирыстоны паддзахадон ансамбль «Алан»Хуссарирыстойнаг сценæйыл — Цæгат Ирыстоны паддзахадон ансамбль «Алан» Сæрыстыр уæ стæм!..Сæрыстыр уæ стæм!..

Comments are closed, but trackbacks and pingbacks are open.