Цхинвалы киноконцертон зал «Чермен»-ы аншлагимæ уагъд æрцыд Цæгат Ирыстон-Аланийы кафты паддзахадон академион ансамбль «Алан»-ы концерт. Ансамблы алы номырыл дæр хуссарирыстойнаг сценæмæкæсджытæ æмбæлдысты тыхджын къухæм-дзæгъдимæ.
Фыццаг номырæй фæстæмæ сценæмæкæсджытæ стыр цымыдисæй кастысты артистты архайдмæ. Афтæ зынд, цыма сценæмæкæсджытæй алкæйы зæрдæмæ дæр фæндаг ссардтой. Бирæ ирд æмæ цымыдисон номыртæ сæххæст кодтой уыцы изæр цæ-гатирыстойнаг уазджытæ. Кафджыты уникалон хореографион номыртæ сæхимæ аздæх-той сценæмæкæсæджы хъусдард. Кафджыты дырыс змæлдтытæм гæсгæ сценæмæкæс-джытæ рахатыдысты артистты профессионалондзинад. Уыдонмæ кæсгæйæ, фидарæй зæгъæн уыд, сæ хореограф стыр курдиаты хицау кæй у, уый.
Ансамбль «Алан» сæ концертон программæ байгом кодта æнæсфæлхаттгæнгæ кафт «Симд»-æй, кæцыйы солисттæ уыдысты Зæгъойты Майя æмæ Цæгат Ирыстон-Алани æмæ Хуссар Ирыстоны сгуыхт артист Мамиты Сослан. Ансамблы коллектив РХИ-йы сгуыхт артист, РЦИ-Аланийы адæмон артист Плиты Александримæ тынг хорз сæххæст кодта хъаматимæ рагон ирон кафт. Хореографион композици «Ивгъуыдæй» сæххæст кодтой Гелойты Дзерассæ æмæ РЦИ-Аланийы сгуыхт артисттæ Додиты Олег æмæ Тедеты Леван.
Хореографион композици «Цæргæсты знæт»-ыл дæр сценæмæкæсджытæ æмбæл-дысты стыр æхсызгонæй, йæ солист уыд РЦИ-Аланийы адæмон артист, РХИ-йы сгуыхт артист Тегойты Сослан, афтæ ма «Кафты ритмы» кубайнаг чызджыты кафт, кафты ныв «Фыййæутты хъæзтытæ», хæххон кафты тынг фæцыдысты сценæмæкæсджыты зæрдæмæ солисттæ Додиты Олег æмæ Джиоты Лев.
Ансамблы аивадон къухдариуæггæнæг у Уæрæсейы Федерацийы паддзахадон пре-мийы лауреат, Цæгат Ирыстон-Аланийы адæмон артист Сикъоты Тимур. Ансамблы сæйраг балетмейстер у РХИ æмæ УФ-йы аивæдты архайæг Касаты Кузбулат. Орекстры къухдариуæггæнæг та — Цæгат Ирыстоны-Аланийы адæмон артисткæ Датиты Эльзæ.
Концертон программæйы фæстæ кинокон-цертон зал «Чермен»-æй дæргъвæтин рæстæ-джы хъуыстысты тыхджын къухæмдзæгъд æмæ «Браво»-йы хъæртæ.
Республикæ Хуссар Ирыстоны къухдариуæгады, Культурæйы министрады æмæ æппæт æрæмбырдуæвджыты номæй ансамблы коллективæн раарфæ кодта РХИ-йы Культурæйы министр Остъаты Мадинæ.
«Хуссар Ирыстоны культурон царды цъус фæрстæ нæ бæттынц ансамбль „Алан“-ы коллективимæ. Мæнæн мæ зæрдыл хорз лæууынц 1980-1990 азты ансамблы гастролон балцытæ, уæд дæр уыдон стыр æнтыстимæ ралæууыдысты Хуссар Ирыстоны æппæт сценæтыл», — загъта Культурæйы министр.
Остъаты Мадинæ бахатыд ансамблы хореограф Сикъоты Тимурмæ, цæмæй фæстæмæ разадахой уыцы рагон традицитæ. «Абон æз дæумæ хатын Тимур Михаилы фырт, цæй æмæ раздахæм уыцы традици. Абоны изæр æвдисæн у, хуссарирыстойнаг арфæйаг сценæмæкæсæджы зæрдæмæ куыд тынг цæуы уæ ансамблы аивад, уымæн. Махмæ фæстаг дыууæ-æртæ азы гом сты сценæйон фæзуæттæ поселок Ленингор, Знауыр, горæт Къуайсайы æмæ мæ уырны, сымах ахæм æхцондзинад кæй райсын кæдзыстут æрмæст цхинвайлæгтæн нæ, фæлæ ацы цæрæн пунктты сценæмкæсджытæн дæр», — загъта Остъаты Мадинæ.
Уыцы изæр ансамбль «Алан»-ы коллективы ногæй фæхуыдтой хуссарирыстойнаг сценæмæкæсæджы раз сæ арæхстдзинад равдисынмæ.
«Стыр æхсызгонæй уæ хонын 20 сентябры, Республикæйы боны бæрæгбонмæ нæ зард æмæ кафты паддзахадон ансамбль „Симд“-имæ иумæ нæ республикæйы сценæмæкæс-джытæн уæ арæхстдзинад равдисынмæ», — загъта министр.
РХИ-йы Культурæйы номæй Остъаты Мадинæ арфæйы фыстæг радта паддзахадон академион ансамбль «Алан»-ы коллективæн.
Министр ма банысан кодта, зæгъгæ, уый Цæгат Ирыстон-Аланийы Культурæйы ми-нистр Ататы Мадинæимæ иумæ бакуыстой иумæйаг культурон мадзæлтты программæ-йыл. «Мах фæнды, цæмæй нæ коллективтæ кæрæдзийæн æвдисой сæ арæхстдзинад. Уырны мæ, ацы программæ æххæстæй сæххæст кæнын нæ къухты кæй бафтдзæн, уый», — загъта Остъаты Мадинæ.
Йæхи ’рдыгæй арфæйы ныхæстæ загъта ансамбль «Алан»-ы хореограф Сикъоты Тимур дæр. «Махæн æхсызгон уыд, абон ацы залы нæ арæхстдзинад кæй равдыстам, уый. Цæгат æмæ Хуссар Ирыстон алыхатт дæр цардысты куыд æфсымæртæ, афтæ, нæ хъыг дæр æмæ нæ цин дæр иумæйаг у, æмæ, Хуыцау зæгъæд, цæмæй кæрæдзийы зæрдæтæ хъæлдзæг кæнæм зард æмæ кафтæй. Сымахæн та, сценæмæкæсджытæ, дзурын стыр бузныг. Хъуыды кæнын афтæ, æмæ мах бирæ хæттыты кæй фембæлдзыстæм хуссарирыстойнаг сценæйыл».
Уыцы изæр концертон программæйы хайадисджытæн сценæмкæсджыты тыхджын къухæмдзæгъд ноджыдæр иу хатт фенын кодта ансамблы коллективмæ хуссарирыстойнаг цæрджыты уарзондзинад æмæ хъармдзинад.
Comments are closed, but trackbacks and pingbacks are open.