19-æм августы 60 азы сæххæст Республикæ Хуссар Ирыстоны сгуыхт нывгæнæг, Уæрæсейы нывгæнджыты цæдисы уæнг, хъæдкуыст æмæ керамикæйы куысты дæсны, скульптор, график æмæ хуызфыссæг Цхуырбаты Геннади Аршакы фыртыл. Уый 1988 азы каст фæцис Цæгат Ирыстон-Аланийы аивадон училищæйы згъæрыл хуызфыссынады хайад, уый фæстæ та ма ЦИПУ-йы хуызфыссынады аивады факультет.
Цхуырбаты Геннади университеты ахуыргæнгæйæ, йæ хуызфыссынадон арæхстдзинад фæбæрзонддæр кæныныл куы архайдта, уæд йæхи цæттæ кодта Уæрæсейы аивæдты академийы уæнг, Уæрæсейы Федерацийы сгуыхт нывгæнæг Бедойты Шалвайы æрмадзы. Удуæлдайæ, быхсонæй куыста йæхиуыл æмæ афтæмæй тырныдта йæ нысанмæ æмæ йыл уыцы миниуджытæ хорзæрдæм фæзындысты. Цхуырбайы фыртæн йæ равзаргæ дæсныйæдты æнтысы цымыдисон уацмыстæ фæлдисын æмæ кæддæриддæр равдыстыты руаджы ссары фæндаг аивадуарзджыты зæрдæтæм.
Цхуырбаты Геннади уыдис ирон аивадон скъолайы æрыгон фæлтæрты минæвæрттæй сæ иу. Ныртæккæ та йæхæдæг кæны ахуыргæнæджы куыст. Дзæуджыхъæуы аивадон ахуыргæнæндоны æмæ Октябрскы хъæуы сывæллæтты аивадон скъолайы æрыгон нывгæнджытæн иузæрдионæй амоны нывкæныны сусæгдзинæдтæ. (Йæ рæстæджы Геннади каст фæцис ацы скъола). Арæх фæисы хайад алыгъуызон равдыстыты. Йе ‘мдугон аивадиртасджытæ йæ хонынц æцæг ирон нывгæнæг, уымæн æмæ йæ уацмысты æвдисы нæ фыдæлты традицитæ, нæ царды реалон нывтæ æмæ райгуырæн бæстæмæ уарзондзинад. Ис ын йæхи ныв кæныны сæрмагонд æрмдзæф. Фæлдисæг йæхи банкъары æрдзы иу хайæ æмæ йын уый дæр йæ сусæгдзинæдтæ раргом кæны. Ирон аивадон культурæйы традициты рæзтыл архайгæйæ, Цхуырбайы фырт тырны Ирыстоны историон фæндагыл йæ хъуыдытæ зæгъынмæ. Цы диссаджы куыстытæ йын ис, уыдоны зыны йæ курдиат æмæ йæ уды фарн.
Цхуырбаты Геннади канд дæсны фæлдисæг нæу, фæлæ ма у уæздан æмæ æцæг хорз адæймаг. Цы бирæ адæм ын раарфæ кодтой йæ гуырæнбоны тыххæй, уыдон æмбал у газет «Хурзæрин»-ы коллектив дæр æмæ йын, фыццаджыдæр, нæ зæрдæтæ зæгъынц фидар æнæниздзинад æмæ ног æнтыстытæ йе сфæлдыстадон куысты.
ЦХУЫРБАТЫ Ларисæ
Comments are closed, but trackbacks and pingbacks are open.