Мах, ирон адæм, сæрыстыр стæм Стыр Фыдыбæстæйон хæсты нæ хæстонтæ цы хъайтардзинæдтæ æвдыстой, уымæй. Хъыгагæн, ацы аз Стыр Уæлахизы боныл нал сæмбæлдзæн хуссарирыстойнаг иунæг ветеран дæр. Фæсчъылдым чи архайдта, æмæ ма дзы сæрæгас чи сты, уыдонæн дæр сæ фылдæр сæхи хатынц лæмæгъ. Фæлæ, гæнæнуæвгæйæ, æрбацæудзысты Театралон фæзуатмæ, цæмæй радон хатт банысан кæной ацы нысаниуæгджын бæрæгбон. Ветеранты совет, Хицауад æмæ «Æнæмæлгæ полк»-ы штаб йæ сæргълæууæг Зассеты Жаннæ, афтæмæй кæнынц æмгуыст. Штабы кусджытæ абон дæр агурынц, æбæрæгæй сæфтыл нымад чи сты, ахæмты. Цалдæр азы размæ сытынг уыдон агурыны хъуыддаг. «Æнæмæлгæ полк»-ы штабы уæнгтæ бакуыстой алы æбæрæгæй сæфты тыххæй дæр, сæрмагондæй бæлвырдгæнæнтыл, цæмæй иунæг ном дæр рохуаты ма баззайа. Уыдонæн хорз бастдзинæдтæ ис æндæр ахæм штабтимæ æмæ сæ ахсджиаг куысты фæстиуæгæн ссардæуыд дзæвгар хæстонты ингæнтæ. Иуæй-иуты марды сыджытты фæхæццæ кодтой сæ фыдæлты уæлмæрдтæм дæр. «Æнæмæлгæ полк» ма æрбаиу кодта 1992-2008 азты гуырдзиаг-ирон хæсты рæстæджы нæ республикæ чи хъахъхъæдта æмæ чи фæмард, уыдоны портреттæ. Архайынц, цæмæй уыдонмæ баиу кæной Сæрмагонд æфсæддон операцийы чи фæмард, уыдон портреттæ дæр. Штабæн ма йæ сæйраг хæстæй иу у скъолайы кары сывæллæтты ‘хсæн патриотикон æнкъарæнтæ цырын кæнын. Алы аз дæр «Æнæмæлгæ полк»-ы штабы инициативæйæ бафснайынц республикæйы территорийыл Фыдыбæстæйы хъахъхъæнджыты номыл цы цыртытæ ис, уыдон алфæмблай. Уымæй дарддæр ма сидынц æгас ирон адæммæ, цæмæй æрбахæссой сæ дадатæ æмæ нанаты нывтæ штабмæ цы зонæнтæ сæм ис, уыдонимæ. Уыдон флешмоб – «Æз мæ зæрдыл дарын, æз сæрыстыр дæн»-ы фæрцы хъавынц ноджыдæр фылдæр информаци æрæмбырд кæнынмæ.
«Рæстæг йæ цыды хай кæны, фæлтæртæ ивынц фæлтæрты, фæлæ Стыр Фыдыбæстæйон хæсты уæлахизы бæрæгбон алкæмæн дæр уыдзæн нысаниуæгджын. Уыдон нæмттæ цæрдзысты нæ адæмты зæрдæты. Хæст адæмæн хæссы мæлæт, цæссыг æмæ хъизæмар. Мингай æвзонг цардбæллон удтæн æгъатыр хъысмæт сæ амæндтæ æмæ бæллицтæ сæ хъуыры фæбадын кодта, схæццæ сын сæ кодта. Чидæриддæр бабын уыцы хæсты, сахъатджынæй кæй, ныууагъта, уыдон иууылдæр сты æцæг хъбатыртæ. Абон цæмæй мах, сæ кæстæртæ, амондджын цард кæнæм, уый тыххæй бацыдысты æнæмсæр тохы æмæ айгæрстой æвыд цардмæ фæндаг. Фыдыбæстæйы хæсты фыдбылызтæ, æнамонддзинæдтæ уæлдай тынгдæр æмбæрстгонд сты махæн, Хуссар Ирыстоны цæрджытæн. Хæст мæлæтхæссæг кæй у, удхор æмæ цардхалæг, уый бирæтæ бавзæрстой сæхиуыл. Нæ чысыл Ирыстоны, æвæццæгæн, нæй ахæм хæдзар, гуырдзыйы фыдæхæй хион хæстæг кæмæн нæ басыгъд. Хæсты азарæй æвыд не стæм абон дæр Сæрмагонд æфсæддон операцийы мæлынц нæ лæппутæ», – зæгъы Зассеты Жаннæ.
P.S. Стыр Фыдыбæстæйон хæстмæ Хуссар Ирыстонæй ацыд 23 736 адæймаджы бæрц, уыдонæй 11 711 хæстоны фæмард сты, 7 мин адæймаджы та нымад цæуынц æбæрæгæй сæфтыл.
УАЗÆГТЫ Марфа
