Президентон æвзæрстытæ æмæ бæстæйы ном аивыны фæдыл референдум ауадзыныл уæхскуæзæй кусы Хуссар Ирыстоны Централон æвзарæн къамис. Къамис йæ куысты фæстиуджыты тыххæй рæстæгæй рæстæгмæ зонгæ кæны нæ бæстæйы æмбæстæгты информацион фæрæзты руаджы. Пресс-конференцитæ та организаци кæны Информаци æмæ мыхуыры паддзахадон комитет. Ацы хатт дæр Централон æвзарæн къамисы сæрдар Плиты Беллæ дзуаппытæ радта информацион фæрæзты минæвæрттæн.
– Президенты бынатмæ кандидат цæмæй регистраци æрцæуа, уый тых-хæй нын лæмбынæг куы радзурис?
– Президентон æвзæрстытæм бæрæг кандидаты инициативон къорд, кæнæ политикон парти кæй кандидат раразмæ кæны, уыдон регистраци куы ‘рцæуой, уый фæстæ сын бар ис къухфыстытæ æмбырд кæнынæн. Къухфыстыты бæрц хъуамæ уа 3 500 бæрц æмæ + 15 проценты уæлдай. Уыцы къухфыст сыфтæ фæстиуджыты суагъæимæ лæвæрд цæуынц Централон æвзарæн къамисмæ. Уыцы сыфтимæ уæлæмхасæй балæвæрдæуы бæрæг кандидаты куырдиат, разы кæй у, президенты бынатмæ æвзæрстытæм кæй цæуы. Уымæй дарддæр ма куырдиаты нысан цæуы кандидаты тыххæй зонæнтæ: кæм кусы, цы ахуырад æм ис, гоймаг бæлвырдгæнæны бæрæггæнæнтæ, æфтиæгтæ йын кæд ис, уæд уыдон дæр.
Æвзæрстытæй 35 боны раздæр, ома, 5 марты изæры 6 сахатмæ Централон æвзарæн къамис исы документтæ.
Уымæй фæстæмæ дæс боны дæргъы уыдон цæуынц сгæрст æвзарæн къамисы ‘рдыгæй, ома, раст æмбырд æрцыдысты къухфыст гæххæттытæ æви нæ. Уый фæстæ уыдон лæвæрд цæуынц Мидхъуыддæгты министрадмæ æмæ сын уым сæ растдзинад бæлвырд кæнынц специалисттæ.
Дарддæр æрфæрсæм, иу кæнæ иннæ кандидат кæм цæры, фиддонон службæйæ йæ æфтиæгтæ, бинонтæ, кæнæ йын нæ республикæйы территорийыл, кæнæ уымæн æддейæ æнахъом сывæллæттæ ис æви нæ.
Уыцы бæрæггæнæгтæ сбæлвыд кæныны фæстæ рабадты ист цæуы уынаффæ, бæрæг кандидат регистраци цæуы æви нæ.
– Президенты бынатмæ кандидаттæ паддзахадон æвзæгтæ иттæг хорз зонынц æви нæ, уый фæдыл арæзт æрцыд лингвистикон къамис. Уыцы къамисы сконды чи ис?
– Ацы къамис ныридæгæн арæзт æрцыд. Дих у дыууæ хайыл, уымæн æмæ нæм ис дыууæ паддзахадон æвзаджы – ирон æмæ уырыссаг. Дыууæ къамисы сконды дæр сты университет æмæ ахуыргæнджыты бæрзонддæргæнæн институты ахуыргæнджытæ. Уыдонæй æртæ ис ирон æвзаджы къамисы – Плиты Гацыр, Битарты Зоя æмæ Тыбылты Ингæ. Уырыссаг æвзаджы къамисы сконды та сты Остъаты Джульеттæ, Тедеты Заирæ æмæ Къæбулты Заирæ.
– Бæрæг куыд у, уымæ гæсгæ Централон æвзарæн къамис кусы 9 апрелы бæстæйы ном аивыны фæдыл рефе-рендум ауадзыныл дæр…
– Æвзарæн къамис фыццаг хатт нæ кусы ахæм хъуыддагыл. Ацы уавæры æвзарæн къамис кусдзæн, куыд референдумы фæдыл къамис, афтæ дæр.
Цæттæ цæуынц, куыд президент сæвзарыны фæдыл бюллетентæ, афтæ паддзахады ном аивыны фæдыл дæр.
– Æвзæрстыты агъоммæ политикон дебатты рæстæг кæд райдайдзæн?
– Президенты бынатмæ кандидаттæн политикон дебаттæ информацион фæрæзты руаджы уагъд цæудзысты, кандидаттæ регистраци куы æрцæуой, уæд. Уый фæстæ сын фадат ис сæ агитацион рæстæгæй спайда кæнынæн.
– Ныридæгæн президенты бынатмæ раразмæ кæныныл цал инициативон къорд æрцыд регистрацигонд?
– Регистрацигонд æрцыд фондз инициативон къорды – Тыбылты Леонид, Къозонты Алан, Багаты Амиран, Гаглойты Алан æмæ Кокойты Эдуарды.
15 февралы изæрырдæм ма райстам хъусынгæнинаг Джиоты Анатолийы номыл, кæцыйы инициативон къорд æмбырд кæны 21 февралы Профцæдисты хæдзары.
Ныртæккæ президенттæм кандидатты инициативон къордтæ активон куыст кæнынц къухфыстытæ æмбырд кæныныл.
– Бæстæйæн æддейæ цы хуссарирыстойнаг æмбæстæгтæ цæрынц, уы-донæн æвзарæн фадгуытæ кæм æрцæудзысты гом?
– Хуссар Ирыстоны закъоны фыст ис, нæ бæстæйы алы æмбæстагæн дæр фадат кæй ис хъæлæс кæнынæн æмæ æвзæрстыты хайад исынæн. Уымæ гæсгæ æвзарæн фадгуытæ гом æрцæудзысты, минæварадтæ нын кæм ис, уыцы территоритыл – Цæгат Ирыстоны, Уæрæсейы Федерацийы æмæ Абхазы.
– Цахæм барадон бындуртæ хъуамæ уа æмбæстагæн, кæд Хуссар Ирыстоны территорийыл нæ цард, æмæ йын цензмæ гæсгæ бар нæй æвзæрстыты хайад райсын?
– Хуссар Ирыстоны президентон æвзæрстыты фæдыл закъонмæ ивындзинæдтæ бахæссыны фæстиуæгæн кандидат Хуссар Ирыстонæн æддейæ гæнæн ис æмæ уа 93 кусгæ боны. Уымæй дарддæр ма закъонмæ гæсгæ кандидатæн фадат ис æмæ республикæйы территорийыл ма уа, йе ‘нæниздзинад, кæнæ кæд ахуыры фæдыл цæуы, кæнæ йæ куыстæй арвыстой, ахæм уавæрты. Ацы ранымайгæ аххосæгтæ нымад цæуынц уæд, кæд æмæ бæрæг кандидаты арвитынц паддзахадон органтæ.
Къæбулты М.
Comments are closed, but trackbacks and pingbacks are open.