Хуссар Ирыстоны паддзахадон университеты уагъд æрцыдис цытджын изæр ирон зонынады къабазы стыр архайæг, профессор Гæбæраты Никъалайы райгуырдыл 95 азы сæххæсты цытæн. Изæрмæ фæхуыдтой РХИ-йы Хицауады Сæрдар Пухаты Эрикы.
Мадзалы райдианы университеты ирон æвзаг æмæ литературæйы кафедрæйы доцент Дзиццойты Юри раарфæ кодта мадзал бацæттæгæнджытæ æмæ уазджытæн, стæй номдзыд ахуыргонды цард æмæ архайды тыххæй æвдыст æрцыдис документалон киноныв. Дарддæр раныхасгæнæг банысан кодта, зæгъгæ, æвзаджы æмбарынгæнæн дзырдуат цы адæмтæн нæй, уыдон сты хæзна цух. Уыцы чиныг ис нæ адæмæн. Ахæм чиныг саразыны фæнд, зæгъгæ, æрцыдис Никъаламæ æмæ йæ рауадзыны тыххæй цы къамис арæзт æрцыдис, уымæн слæууыд йæ сæргъ.
Юри ма банысан кодта, зæгъгæ, Никъалайы лæггæдтæ ирзонынады раз тынг стыр сты. Йæ хъуыдымæ гæсгæ ахæм æнтыстытæ йæ къухты сæйраджыдæр бафтыдысты уымæн, æмæ уыд куыстуарзаг æмæ куыстхъом.
Номдзыд ирон ахуыргонды тыххæй та Абайты Васо загъта, зæгъгæ, йæ куыстыты ирдæй зынынц æвзаджы культурæ æмæ йæ дзырдарæзт.
Йæ раныхасы университеты ректор Тедеты Вадим банысан кодта, зæгъгæ, Никъалайы фæлтæр æвзæрстой стыр зындзинæдтæ. Уыдон рацыдысты Стыр Фыдыбæстæйон хæсты цæхæрыл, йæ фæстиуджытæ йын аиуварс кæныны уæззау фæндагыл. Никъала йæхæдæг уыд хæсты хайадисæг æмæ куы æрыздæхт, уæд бæстондæр æрæвнæлдта æвзагзонынады куыстмæ. Уыимæ ма раныхасгæнæг банысан кодта, зæгъгæ, абон, Ирыстоны ис хорз ахуыргæндтæ, фæлæ нын нæ фаг кæнынц Никъалайы æмвæзадыл ахуыргæнд-тæ. Мах ахуырады къабазы кусджытæ архайдзыстæм, цæмæй сомбоны ацы цухдзинад рараст кæнæм.
Абон у мадæлон æвзаджы дунеон бон, зæгъгæ, йæ раныхасы райдианы банысан кодта Хицауады Сæрдар Пухаты Эрик. Уыимæ ма банысан кодта, зæгъгæ, Никъалайы 95 азы бон абон нысан кæнын у ахсджиаг мадзал, æмæ бузныг загъта, чи йæ сорганизаци кодта, уыдонæн. Никъалайы куыстытыл бирæ дзурæн ис, фæлæ æз уæлдай тынгдæр банысан кæндзынæн йæ адæймагдзинад, йæ уæздандзинад. Уый уыдис принципиалон, фæлæ йæ тызмæг сдзургæ никуы ничи федта. Стырæй, чысылæй алкæмæ дæр йæ ахаст уыд уæздан. Уыимæ ма банысан кодта, зæгъгæ, Никъала йæ царды фæстаг азты мыхуырмæ бацæттæ кодта цалдæр чиныджы, уыдонæй ма мыхуыркæнинагæй баззад дыууæ. Хъæуы сæм, зæгъгæ, æркæсын, цæмæй рухс феной.
Университеты уырыссаг æвзаджы кафедрæйы сæргълæууæг Тедеты Залинæ та загъта, зæгъгæ, Никъаламæ бирæ хорз миниуджытæ кæй уыд, стыр бæрзæндтæм дæр зонады уымæн схызт. Йæ куыстытæ, зæгъгæ, сты ахæмтæ, кæцытæ æрмæст зонады нæ хъæуынц, фæлæ хуымæтæг адæмы дæр. Никъала мадæлон æвзаг æгæрон уарзтæй кæй уарзта, уый ма бæрæг у уымæй дæр, æмæ арæх дзырдта, зæгъгæ, нæ фæлтæр мæлын нæ бауагътой мадæлон æвзаджы, нæ амæл-дзæнис уæд, кæд æмæ йын нæ фæстæ разына хорз хицæуттæ.
Ирон литературæйы историйы кафедрæйы сæргълæууæг, профессор Плиты Гацыр та банысан кодта, зæгъгæ, Никъаламæ иууыл æввахсдæр чи лæууыд, уыдонæй сæ иу уыдтæн æз æмæ, зæгъгæ, сæрыстыр дæн, мæ лектор кæй уыдис, уымæй. Уый мæ, зæгъгæ, цайдагъ кодта зонады фæндагыл æмæ мын алы хатт дæр йæ амындтæ уыдысты пайда. Уый та уымæн, æмæ йæ алыварс чи уыд, уыдонæй литературон æвзаг Никъалайæ хуыздæр ничи зыдта. Йæ рæстæджы нæ цин уыд, Никъала нын кæй ис, уый, ныр та, зæгъгæ, Никъала нын кæй нал ис, уый у нæ мæт.
Изæры ма раныхас кодтой Национ политикæ, культурæ, ахуырад, дин æмæ дзыллон информацийы фæрæзты фæдыл Парламенты комитеты сæрдар Гæбæраты Юри, Зонад-иртасæн институты директор Гаглойты Роберт, Ахуырад æмæ зонады министр Гасситы Натали, ирон филологийы кафедрæйы декан Тыбылты Ингæ, ирон литературæйы историйы кафедрæйы хистæр ахуыр-гæнæг Плиты Серго æмæ æндæртæ.
Гæззаты Иван
Comments are closed, but trackbacks and pingbacks are open.