Æрхæццæ йæ рад

Ивгъуыд къуырийы кæрон горæты Администрацийы сæргълæууæг Къадзты Гено æмæ Архитектурæ æмæ арæзтады министр Зæгъойты Эдуард фембæлдысты Харебаты Исахъы уынджы 32 æмæ 36 хæдзæртты цæрджытимæ. Фембæлды дзырдтой, боны фæстагмæ, кæй æрхæццæ сæ аварион хæдзæртты аразыны рад дæр. Уыцы хæдзæртты бынæтты Инвестпрограммæйы фæлгæтты сырæздзæн 75 фатерон бирæуæладзыгон хæдзар. Арæзтадмæ бавналдзысты уалдзæджы æмæ йæ эксплуатацимæ та ратдзысты 2025 азы. 75 фатерæй 50 ратдзысты ацы хæдзæртты цæрæг бинонтæн, иннæ 25 фатеры та лæвæрд æрцæудзысты горæты цæрæнуатон фондмæ.

Ацы æртæуæладзыгон хæдзæрттæ арæзт кæд æрцыдысты, уый бæлвырдæй ничиуал хъуыды кæны. Цæрджыты ныхæстæм гæсгæ, бæстыхæйттæй сæ иу арæзт æрцыд 1931 азы, уыдис, дзы къазармæтæ. Иннæ бæрæггæнæнтæм гæсгæ та, Стыр Фыдыбæстæйон хæст куы райдыдта, уæд бæстыхайæ сарæзтой æфсæддон госпитал, стæй та, зæгъ, уыд æмдзæрæндон. Фæстæдæр æм балыгъдысты æнæхæдзар бинонтæ.

36-æм хæдзары æдзæллаг хуыз тынг халы горæты центры иумæйаг бакаст. Ныртæккæ дзы ис 20 фатеры. Хæдзар аварион уавæры ис, фæлæ алы фатеры дæр ис цæрджытæ, афтæмæй та цалдæры коммуникацитæ дæр нæй. Бæстыхай бавзæрста рæстæджы æгъатыр æндæвдад – хæстытæ, зæххæнкъуыстытæ. Бынтон æдзæллаг уавæрмæ æрцыд. Цæрджытæ бирæ инстанцитыл фæзылдысты. Афтæ кæй ныддаргъ хъуыддаг, уым сæхи аххос дæр  бирæ уыд. Уымæн æмæ иутæ домдтой бæстыхайы æрмæстдæр капиталон цалцæг, хæдзары къултæ, зæгъгæ бæзджын сты, туфдурæй амад æмæ, дам, сæ æрмæст хъæуы сфидар кæнын. Иннæты та фæндыд, цæмæй зæронд бæстыхай æрцæуа пырх æмæ йæ бынаты сырæза ног. «Уал азы æбæлвырд уавæры аххосæй мæ фатер никуы сцалцæг кодтон. Халинаг хæдзæртты номхыгъды дам стут, дзырдтой горæты администрацийы. Æмæ мæ хæрдзтæ дзæгъæлы куы фæуой, уымæй тарстæн», – зæгъы ацы хæдзары цæрджытæй сæ иу.

Иннæтæн та сæ ныфс раджы ацъæл. Уавæртæ кæй амыдтой, уыдон сæхæдæг фатертæм бауагътой коммуникацитæ, сæвæрдтой хъармгæнæн системæ, бацалцæг кодтой сæ хатæнтæ. Ис дзы ахæмтæ дæр, кæдон сты иунæджытæ. Зæгъæм, сæ иу, æртыккаг уæладзыджы цæрæг 2008 азы хæсты фæстæ ма йæ фатерæй цы иу къуым аирвæзт, цæры уым. Нæй йæм уагъд коммуникацитæ. «Фæнды уынджы цæр, фæнды – ам. Мæ фатер дыууæ уатоныл нымад цæуы æмæ 2008 азы хæсты бонты сæ иу сармадзаны нæмыгæй ныппырх. Хатæн гом тыргъы хуызæн у. Цæттæ уыдтæн «Цæгаттаг» кæнæ «Хурзæрин»-ы микрорайонтæм ацæуынмæ, фæлæ мын уым дæр къуым нæ радтой».

Дыккаг уæладзыджы цæрæг та кæд йæ хæдзар капиталонæй сцалцæг кодта æмæ ныр систæй сыджыт нал кæлы, уæддæр фатермæ куы бахизы, уæд хæдзар базмæлы. «Нæ цартæ бæрзонд сты, фæлæ раздæр куыд арæзтой, æхсныфтæ æмæ æлыгæй. Люстрæ дзы хорз нæ ныффидар кæндзынæ, куыддæр ыл уæлдæф сæмбæлы, афтæ сызмæлы» – загъта уый.

Ныртæккæ цæрджыты цинæн кæрон нал ис, æппынфæстаг сæ рад дæр кæй æрхæццæ, уый фæдыл. «Горæт æмткæй тыхст уавæры куы уыд, уæд мах дæр быхстам. Фæлæ нæ алфæмблай цы бæстыхæйттæ уыд, уыдонæн 2008 азы фæстæ раивтой сæ рудзгуытæ, агъуыстытæ, бацæуæн дуæрттæ. Мах хæдзæрттæ та, цыма рохуаты баззадысты» – зæгъынц цæрджытæ.

Хæдзары цæрджытæ ма куыд зæгъынц, афтæмæй цæттæ сты кæдæм сæ арвитой, уым æрцæрынмæ, æрмæст – рæстæгмæ, цалынмæ сæ аварион хæдзары бынаты ног саразой, уæдмæ. Уыдон нæ фæнд кæнынц центрæй сæ цæрæнбынæттæ баивын, кæд æмæ зонынц, кæдæм сæ æрвитынц, уым дæр дзæбæх фатертæ ис, уæддæр.

 УАЗÆГТЫ Марфа