Хуссарирыстойнаг хореографион ансамбль «Ирон» æрæджы хуынд æрцыд VII Ӕппæтадæмон аивæдты чемпионат «Лазурная волна – Сочи 2022»-мæ æмæ фæстæмæ æрæздæхтысты уæлахиздзаутæй. Музыкалон фестиваль уагъд цыд 17 июнæй 21 июнмæ горæт Сочийы Лазаревскийы районы æмæ дзы хайад райстой 20 ансамблæй фылдæр Сомихыстонæй, Грецийæ, Белоруссийæ, Украинæйæ, Кæсæг-Балхъарæй, Цæцæнæй æмæ ма æндæр æндæр уæрæсейаг регионтæй æмæ горæттæй. Конкурсы организатортæ уыдысты дунеон æмæ Уæрæсейы национ Артийаг комитеттæ, УФ-йы Культурæйы æмæ Рухсадон министрадтæ, Ӕппæтадæмон аивæдты академи æмæ ма Уæрæсейы адæмты Ассамблея. Банысан кæнæн ма хъæуы уый дæр, æмæ жюрийы уæнгтæй иу кæй уыд не ‘мзæххон, Республикæ Хуссар Ирыстоны сгуыхт артист Гуццаты Нодар.
Ансамбль «Ирон»-ы аивадон къухдариуæггæнæг Хуыгаты Дианæ коллективæн сæвæрдта æртæ кафты – хæххон, симд æмæ испайнаг кафт, кæцыйы уыд дзæвгар кавказаг кæфтыты элементтæ æмæ уымæ гæсгæ бæрæг хицæн кодта иннæты равдыстытæй. Æртæ номыры дæр афтæ аив сæххæст кодтой, афтæ рæсугъд сæ акафыдысты æмæ уыцы номинациты ба-цахстой фыццаг бынæттæ æмæ иумæйагæй сисгæйæ та баисты фестивалы иууыл уæлдæр хорзæхы хицæуттæ – райстой Гран-при.
Чемпионаты ма хайад иста дзæуджыхъæуккаг ансамбль «Орион», кæцы иттæг рæсугъд сæххæст кодта «дагъыстайнаг» кафт æмæ ссис номинацийы уæлахиздзау.
Ансамбль «Ирон»-ы коллектив уыдысты 30 адæймагмæ ввахс. 16 июны райсом раджы 5 сахатыл афæн-дараст сты Цхинвалæй, бынатмæ ныххæццæ сты æхсæвы фыццаг сахатыл æмæ комкоммæ бацыдысты уазæгдонмæ, кæцыимæ развæлгъау уыдысты дзырдгонд æмæ сæм æнхъæлмæ кастысты. Ансамблы солист Плиты Сослан куыд зæгъы, афтæмæй сын рæстæг фæцис денджызы хи ныннайынæн æмæ атезгъо кæнынæн дæр. Кæй зæгъын æй хъæуы, фестивалы хайад исгæйæ, фæллайгæ дæр бакодтой, фæлæ сыл Гран-прийы райст уæлдай тыхтæ бафтыдта. Конкурсы кæронбæттæны ма Лазаревскы районы централон сценæйы фестивалы уæлахиздзаутæ ауагътой грандиозон гала-концерт дæр æмæ сын адæм æмдзæгъд кодтой сæ диссаджы арæхстдзинады тыххæй.
Ныр сын сæ аивадон къухдариуæггæнæг улæфты рæстæг радта – æввахс рæстæджы конкурсты æмæ фестивалты хайад нал райсдзысты. Фæлæ ма сæ бахъæудзæн иу хатт сæ арæхстдзинад равдисыны сæр – 30 июны Дзауджыхъæуы ансамбль «Фидæн»-имæ иумæйагæй концерт хъуамæ ауадзой.
Джиоты Алыксандр
Comments are closed, but trackbacks and pingbacks are open.