Хетæгкаты Къостайы номыл Хуссар Ирыстоны паддзахадон драмон театры коллектив сæ ног бæстыхаймæ куы рахызтысты, уæдæй зынгæ фæхуыздæр сты сæ куысты уавæртæ. Театры къухдариуæгад архайы, цæмæй хъæздыгдæр кæна сæ репертуар, хуссарирыстойнаг сценæмæкæсджыты та, раздæрау, æрбаздахой сæхимæ ирон, уырыссаг æмæ фæсарæйнаг драматургты уацмыстæм гæсгæ æвæрд спектакльтæм, уый у сæ бæллиц. Ахæм бæрндзинад æнкъаргæйæ, тырнынц сфæлдыстадон бæрзæндтæм. Ныр та куыст цæуы ууыл, цæмæй сæндидзын кæной театры оркестр.
Республикæ Хуссар Ирыстоны паддзахадон драмон театры пресс-службæйы нын куыд фехъусын кодтой, уымæ гæсгæ ныридæгæн куыст цæуы оркестр сæндидзын кæныныл. Программæмæ гæсгæ премьерæтæй сæ иу, режиссер Дзуццаты Тамерланы æвæрд комедион спектакль «Сæтти æмæ Бæтти»-йы, фæнд кæнынц театры оркестры музыкæмæ гæсгæ сæвæрын. Спектаклы сценæмæкæсджыты размæ рахæсдзысты январы æмбисы. Ацы спектаклæн музыкæ ныффыста композитор Гæздæнты Булат. «Спектаклы музыкалон фæлындзынадыл кусы Республикæ Хуссар Ирыстоны æмæ Абхазы сгуыхт артисткæ Саппиаты Залинæ. Оркестрæн къухдариуæгад дæр кæны уый. Банысан кæнын мæ фæнды уый, æмæ нæ театры спектакльтæ бирæ азты дæргъы сценæйыл æвдыст кæй нæ цæуынц оркестрон музыкæимæ. Хистæр кары театрдзаутæ ма хорз хъуыды кæнынц спектакльты рæстæджы-иу оркестрæн кæм уыдис сæ бынат, сæ цагъдæй-иу кæй баххæст кодтой спектаклы, музыкæ-иу сын радта эмоционалон-экспрессивондзинад æмæ сценæмæкæсджытæ истой стыр æхцондзинад артистты хъазтæй.
Профессионалон театры оркестры архайд у æнæмæнгхъæуæг, уый фæзынд, нæ театр куы сырæзт, уæдæй æмæ уыцы хъуыддаг сног кæнын хъæуы абон дæр. Профессионалон театр нæм куы слæууыдис йæ къахыл, уæд нæм профессионалон музыканттæй, композитортæй зындгонд уыдысты ирон профессионалон музыкæйы бындурæвæрæг Галаты Барис, Кокойты Тæтæрхъан, Хаханты Дудар, Гæбæраты Илья, Плиты Христофор æмæ æндæртæ. Уыдон стыр хайбавæрд бахастой ирон аивадмæ, сæ диссаджы уацмыстæм схъомыл сты цалдæр фæлтæр адæм, абон дæр сты цымыдисон æмæ зæлынц сценæтæй», – зæгъынц пресс-службæйы.
Театр кæддæриддæр уыдис æмæ у, адæймаджы удварн чи хъæздыгдæр æмæ рæсугъдæр кæны, ахæм фæрæз. Хуссар Ирыстоны паддзахадон драмон театр хызт иу сфæлдыстадон æнтыстæй иннæмæ. Ныр дæр ис рæзты фæндагыл æмæ сын нæ зæрдæ зæгъы, цæмæй цæуой аивады тæмæнтæкалгæ бæрзæндмæ, сценæмæкæсджытæн та цы рухс кæной сæ зæрдæтæ сæ профессионалон хъазтæй.
Нæ уацх.
Comments are closed, but trackbacks and pingbacks are open.