УФ-йы Паддзахадон думæйы делегациимæ
Президент Гаглойты Алан фембæлд Уæрæсейы Федерацийы Паддзахадон Думæйы Хæдбар паддзахадты æмхæларады евразиаг интеграци æмæ æмфыдыбæстæйонтимæ бастдзинæдты фæдыл комитеты сæрдары фыццаг хæдивæг Тайсауты Хъазбегимæ.
Фембæлды хайад райстой РХИ-йы Парламенты Сæрдар Мæргъиты Алан, РХИ-йы Президенты Администрацийы къухдариуæггæнæг Æлборты Алан, РХИ-йы Парламенты Сæрдары хæдивæг Тадтаты Таймураз æмæ Республикæ Цæгат Ирыстон-Аланийы Парламенты депутат Дудайты Чермен.
Паддзахады сæргълæууæг «æгас цу» загъта уазджытæн. Загъта ма сын бузныджы ныхæстæ, дæргъвæтин рæстæджы дæргъы сæ фарсхæцынад æмæ æххуысы тыххæй.
«Æхсызгон мын у, ахæм ахсджиаг бæрæгбоны уын Хуссар Ирыстоны раарфæ кæнын. Мах стыр аргъ кæнæм Паддзахадон Думæйы алыварсон æххуысæн æмæ бузныг стæм, цины дæр æмæ хъыджы хъуыддæгты дæр Хуссар Ирыстоны адæмимæ кæй стут, уый тыххæй», – загъта Гаглойты Алан.
Йæ рады Тайсауты Хъазбег бузныг загъта Президентæн йæ зæрдиаг химæрайсты тыххæй æмæ Уæрæсейы Федерацийы Паддзахадон Думæйы Сæрдар Вячеслав Володины æмæ Хæдбар паддзахадты æмхæларады, евразиаг интеграци æмæ æмфыдыбæстæйонтимæ бастдзинæдты фæдыл Паддзахадон Думæйы комитеты Сæрдар Леонид Калашниковы номæй арфæйы ныхæстæ загъта Президентæн.
«Дæ сæргълæудæй мæ раарфæ кæнын фæнды Хуссар Ирыстоны адæмæн ахæм нысаниуæгджын боны цытæн. Паддзахадон Думæйы депутаттæ æмхъæлæсæй куы райстой Республикæ Хуссар Ирыстон æмæ Республикæ Абхазы паддзахадон хæдбардзинæдтæ банымайыны тыххæй уынаффæ, уыцы историон цау æрцыд 16 азы размæ. Цæмæй уе ‘мбæстæгтæ комфортон æмæ аккаг цард кæной, уый тыххæй æппæт дæр саразынмæ мах цæттæ стæм республикæйы къухдариуæгадимæ иумæ стыр куыст бакæнынмæ», – загъта Тайсауты Хъазбег.
Президенты барамындæй Тайсауты Хъазбег æмæ Дудайты Чермен хорзæхджын æрцыдысты майдантæ «В ознаменование 15-летия победы в Отечественной войне народа Южной Осетии».
Фембæлды кæрон дыууæ фарсы кæрæдзийæн бакодтой зæрдылдарæн лæвæрттæ.
Цæгат Ирыстоны делегациимæ
Гаглойты Алан фембæлд Республикæ Цæгат Ирыстон-Аланийы делегацийы уæнгтимæ.
Делегацийы сконды уыдысты Парламенты Сæрдар Тускъаты Таймураз, Хицауады Сæрдары хæдивæг Икъаты Русланбег, Закъондзинад, закъондæттынад æмæ бынæттон хæдуагæвæрды фæдыл парламентон комитеты сæрдар Черчесты Аслан æмæ Национ политикæ æмæ фæсивæды хъуыддæгты фæдыл парламентон комитеты сæрдар Джиоты Георги.
Хуссарирыстойнаг фарсы æрдыгæй фембæлды хайад райстой Хицауады Сæрдар Джуссойты Константин, Парламенты Сæрдар Мæргъиты Алан, Президенты Администрацийы къухдариуæггæнæг Æлборты Алан æмæ горæт Цхинвалы администрацийы сæргълæууæг Хуыгаты Ромео.
Гаглойты Алан зæрдиаг арфæтæ ракодта уазджытæн æмæ сын бузныг загъта сæ æрцыды тыххæй.
«Ирон адæмы бирæ азты тохы фæстæ 2008 азы 26 августы Уæрæсе банымадта Хуссар Ирыстоны паддзахадон хæдбардзинад. Ацы бон мах нысан кæнæм иумиаг бæрæгбон. Ирыстон адих ис, фæлæ ирæттæ кæддæриддæр уыдысты иу адæм, кæцытæ дих нæ цæуынц хуссайрæгтæ æмæ цæгаттæгтыл. Уыдон кæддæриддæр иу кæнынц хъыгдзинæдтæ дæр æмæ циндзинæдтæ дæр», – загъта Президент.
Тускъаты Таймураз банысан кодта, зæгъгæ, ацы бон сыгъзæрин дамгъæтæй фыст æрцыд æппæт ирон адæмы историйы æмæ арфæйы ныхæстæ загъта Республикæ Цæгат Ирыстон-Аланийы Сæргълæууæг Сергей Меняйлойы номæй.
«Хæдбардзинадмæ фæндаг вазыгджын уыд. Уый уыд ирон адæмы бирæ æнусон хъизæмæртты, æхсардзинады, тынг вазыгджын уавæрты хъæбатырдзинады æмæ нæ иумиаг традицитыл иузæрдиондзинады фæстиуæг. Æппæт уыцы азтæ сты Хуссар Ирыстоны æхсæнадон-политикон, социалон-экономикон, мононхæрзæгъдауы размæцыды азтæ. Уый бæрæг у, куыд уæ республикæйы иумиаг хуызæй, афтæ, ам чи цæры, уыцы адæмы мидбылхудтæй дæр. Республикæйы дарддæры размæцыды тыххæй мах дарддæр дæр хæцдзыстæм не ‘мгуыстады фарс», – загъта Тускъаты Таймураз.
Президенты барамындæй Тускъаты Таймураз, Черчесты Аслан æмæ Джиоты Георги хорзæхджын æрцыдысты «В ознаменование 15-летия победы в Отечественной войне народа Южной Осетии»-йы майдантæй.
Икъаты Русланбегæн та лæвæрд æцыд горæт Цхинвалы цытджын æмбæстаджы ном.
***
Гаглойты Алан ма фембæлд Хъæрæсе-Черкесийы Республикæйы, Абхазы Республикæйы, Дагестаны Республикæйы, УФ-йы Уæлвæткон уавæрты министрады, Дунеон æхсæнадæмон палатæйы делегацитимæ
