Галаты Барисы номыл кафт æмæ зарды паддзахадон ансамбль «Симд»-ы кæстæр къорд рæхджы хайад райсдзæн сывæллæтты III-æм Æхсæнадæмон культурон форумы. Ацы форум уагъд цæудзæнис 22 августæй 24-æм августмæ горæт Мæскуыйы Ногдзауты галуаны. Уый тыххæй нын фехъусын кодта ансамблы аивадон разамонæг Коцты Сергей.
«Нæ ансамблы кæстæр къордимæ нæхи активонæй цæттæ кæнæм ацы ахсджиаг культурон форуммæ, цæмæй нæ республикæйы цæсгом, куыд æмбæлы, ахæм хуызы равдисæм. Ансамбль Мæскуымæ абалц кæндзæнис нæ республикæйы Культурæйы министрады æххуысæй.
Мах ацы форумы хайад райсыны тыххæй развæлгъау бадæттам куырдиат, нæ видеоæрмæгмæ нын бакастысты æмæ нын аккаг аргъ скодтой. Форумы организатортæ ма нын нæ кафты гала-концертмæ дæр бахастой. Фæнды мæ зæгъын уый, æмæ нæ сывæллæттæ кæй сты тынг хорз цæттæ æмæ мах сæрыстырæй равдисдзыстæм ирон культурæ.
Сывæллæтты форумы мах уæрæсейаг сценæмæкæсджыты базонгæ кæндзыстæм ирон хореографиимæ. «Симд»-ы кæстæр къордæй æхсæзæй сæххæст кæндзысты «Хæххон кафт». Уымæй дарддæр ма хуссарирыстойнаг делегаци хайад райсдзæнис форумы кæронбæттæны цы гала-концерт уагъд цæудзæн, уым дæр», – загъта Коцты Сергей.
Мæскуыйы III-æм Æхсæнадæмон сывæллæтты культурон форум организацигонд цæуы Уæрæсейы Федерацийы Культурæйы министрады хъæппæрисæй. Форумы куысты нысан, сæйраджыдæр, здæхт у сфæлдыстадон бастдзинæдты райрæзт æмæ сфидар кæнынмæ, афтæ ма курдиатджын сывæллæтты фарсмæ балæууын æмæ фыдыбæстæйон историон-культурон бынтæ популяризаци кæнынмæ.
Хуссарирыстойнаг ансамблæй дарддæр ацы форумы хайад райсдзысты Египет, Инди, Серби, Беларуси, Китай, Бразили, Сири, Туркменистан, Узбекистан, Иордани, Ливи, Приднестровье æмæ Абхазы Республикæ.
Форумы уазджытæн æртæ боны дæргъы организацигонд æрцæудзæн 60 мадзалы бæрц. Уыдон нымæцы уыдзысты: мастер-къластæ, сфæлдыстадон уроктæ, дискусситæ æмæ æндæр ахæмтæ. Сывæллæтты форумы æппæт уазджытимæ æндæр æмæ æндæр фæдыздæхтыты кусдзысты Уæрæсейы Федерацийы зындгонд аивадон архайджытæ. Сывæллæттæн бацæттæ кодтой хъæздыг æмæ цымыдисон экскурсион программæ дæр æмæ сæ рæстæг арвитдзысты хъæлдзæгæй.
Цхуырбаты Лариса
