Милицийы майор Кортиаты Регинӕйы административон фадыджы цӕры 600 адӕймаджы бӕрц. Хауы йӕм Хслебы хъӕусовет, кӕцыйы сконды ис авд хъӕуы. Йӕ куыст ӕрвылхатт дӕр райдайы Хслебы хъӕуӕй. Йӕ фадыджы цӕрджытӕ йыл бацин кӕнынц, раарфӕ йын кӕныц ӕмӕ дзы кӕд исчи истӕуыл фӕтыхсы, уӕд ын ӕй раргом кӕны.
Ӕрӕджы та бабӕрӕг кодта Хслебы хъӕуы цӕрӕджы, кӕцы у иунӕг ӕмӕ йӕм куыд милици, афтӕ районы администраци дӕр йӕ хъус дары, ӕх-хуыс ын кӕнынц. Регинӕйы куы федта, уӕд ыл бацин кодта ӕмӕ журналисттӕн раппӕлыд, зӕгъгӕ мӕ ацы чызджы йеддӕмӕ никуы ничи ӕрхъуыды кӕны.
«Раздӕр мӕ фадыгон инспектор чи уыд, уый зонгӕ дӕр нӕ кодтон. Стӕй нын снысан кодтой Регинӕйы ӕмӕ мӕ ныр цалдӕр азы дӕргъы ӕппынӕдзух бӕрӕг кӕны, кӕнӕ та мӕм телефоны ӕрбадзуры ӕмӕ мӕ бафӕрсы, истӕуыл тыхсын ӕви нӕ, уымӕй. Ӕз ӕй нымайын иууыл хуыздӕр фадыгон инспекторыл», – зӕгъы уый.
Хуыцъейы хъӕуы фадыгон инспектор та у милицийы капитан Гаглойты Аланæ. Профилактикон мадзӕлтты рӕстӕджы бабӕрӕг кодта иунӕг, зӕронд сылгоймаджы. Инвалид кӕй у, уый тыххӕй йӕм ис фылдӕр хъусдард милицийы ‘рдыгӕй.
«Ӕрӕджы йӕм ӕрбацыдтӕн бӕрӕггӕнӕг ӕмӕ йӕ ӕрбаййӕфтон зӕххыл хаудӕй, йӕхи дӕр не ‘мбӕрста. Ӕвӕццӕгӕн, дзӕвгар рӕстӕг уыд ахӕм уавӕры. Мах ын бакодтам фыццаг медицинон ӕххуыс ӕмӕ стӕй тагъд ӕххуысы службӕмӕ фӕдзырдтам», – банысан кодта Аланæ.
Ахӕм профилактикон мадзӕлттӕ уагъд цӕуынц Мидхъуыддӕгты министры хӕслӕвӕрдмӕ гӕсгӕ. Алы районы ӕмӕ горӕты дӕр милицийы кусджытӕ бӕрӕг кӕнынц иунӕг цӕрджыты ӕмӕ сӕ сӕ уавӕртӕ куыд фӕамонынц, афтӕ сын ӕххуыс дӕр бакӕнынц сӕ проблемон фарстатӕ аскъуыддзаг кæныны.
ДЖИОТЫ Алыксандр
