1992 азы 14-æм августы Абхазы райдайгæ трагикон цаутæ æфсымæрон адæмæн цæрæнбонтæм баззайдзысты æнæбайгасгæнгæ хъæдгомæй. Уый тыххæй дзырдæуы Хуссар Ирыстоны Фæсарæйнаг хъуыддæгты министрад Абхазы æддагполитикон ведомствомæ æмзæрдæдзинад æмæ фарсхæцынады тыххæй цы нотæ арвыста, уым.
Æртыццæджы, 14 августы Абхазы банысан кодтой Фыдыбæстæ хъахъхъæнджыты Мысынады бон. 32 азы размæ растдæр уыцы бон, 1992 азы 14-æм августы курортон сезоны тæккæ тæмæны, Гуырдзыстоны национ гварди Тенгиз Китованийы командæйæ бабырстой Абхазы территоримæ. Райдыдта тугкалæн хæст, кæцы аххæссыд 413 боны æмæ фæцис 30 сентябры абхазаг адæмы уæлахизæй.
Хуссар Ирыстоны Фæсарæйнаг хъуыддæгты министрады банысан кодтой, зæгъгæ, бирæ зиæнтты æмæ амæттæгты аргъæй Апсныйæн удуæлдай тохы йæ къухы бафтыд фæндвидар уæлахиз æмæ йæ бон ссис сабыр цардмæ йæ бартыл стох кæнын, æнахуыр хъайтардзинад æмæ патриотизм равдисгæйæ.
«Ацы нысаниуæгджын боны Хуссар Ирыстоны адæм Абхазы фæмардуæвæг хъахъхъæнджыты æмæ сабыр цæрджыты бинонтæ æмæ хиуæттимæ дих кæнынц сæ маст æмæ сæ сæртæй ныллæг кувынц фæмардуæвджыты ирд мысынады раз», – дзырдæуы нотæйы.
Абхазы оккупацийы хайад истой дыууæ мин гуырдзиаг «гвардионы» бæрц, бронетехникæйы 58 иуæджы, бирæнымæц артиллери (уыцы нымæцы реактивон ифтонгадтæ «Град» æмæ «Ураган»). Абхазы оккупацийы план кодон ном «Меч»-ы бын æххæст æрцыд ИНО-мæ Гуырдзыстоны куы райстой, уымæй дыууæ къуырийы фæстæ.
Ацы æрмæджытæ дæр бакæс:
РХИ-йы Президент Бибылты Анатолийы раныхас Уæрæсейы Федераци Республикæ Хуссар Ирыстоны хæдбардзинад куы банымадта, уыцы боныл 10 азы сæххæсты сæраппонд цытджын æмбырды
Мæсæллæйы телтæ
Балц – æфсымæрон Абхазы национ бæрæгбонмæ
Хуссар Ирыстоны делегаци хайад райста Абхазы бæрæгбонон мадзæлтты
Абхазмæ – улæфынмæ
