Горæты хæрзарæзтад æмæ аивдзинадыл æппынæдзух чи кусы, уыдонæй сæ иу у цæрæнуатон-коммуналон хæдзарады управлени. Кусджытæ æдзухдæр вæййынц сæ бахæсгонд куысты уæлхъус æмæ сæ алчи дæр архайы йæ разылæууæг хæстæ æнтысгæйæ ахицæн кæныныл. Уыимæ цы куыст бакæнынц, уый та вæййы гъæдджын æмæ йæм нæ вæййы фау æрхæссæн. Куыстуаты хистæры хæдивæг Джиоты Юри куыд зæгъы, афтæмæй ныр æртæ къуырийæ фылдæр хæрзарæзт кæнынц БАМ æмæ Джиоты Аланы проспекты кæрон хæдзæртты раз кæртытæ. Уыцы куыстытæ бакæнын та у æнæмæнгхъæуæг, цæмæй фистæгæйцæуджытæ æмæ машинæты хицæуттæ дæр зындзинæдтæ ма бавзарой. Уымæй дарддæр ма кусджыты иу хай кусынц, горæты уынгты цы дзыхъхъытæ фæзынд, уыдон алæгъз кæныныл.
Ацы æввахс бонты «Ирдизайн»-ы коллектив æрæвнæлдта уынгты светофортæ ногтæй раивыныл. Ныззакъаз сæ кодтой Уæрæсейы æмæ ныртæккæ уыдонæй ифтонг сты æххæстбæрцæй. Сæ сæвæрыныл ацы бонты архайынц Тæболы фырты æмæ Хъайтарты уынгты, куыстытæ та æххæст кæнынц фæлтæрд æмæ арæхстджын специалисттæ.
ХУЫБИАТЫ Никъала
