Фæстаг рæстæджы æрвылаз дæр мыхуыры рацæуы зæрдылдарæн бонты къæлиндар. Æмæ та ныр дæр рухс федта ахæм къæлиндары ног чиныг, йæ ном дæр хуыйны афтæ: “Календарь знаменательных дат на 2023 год”, зæгъгæ. Чиныгæн йæ æдзухон автор у ирон æвзаджы æнувыд патриот, уымæн лæггадгæнæг Къуезерты Петр. Ахæм чиныг мыхуырмæ бацæттæ кæнынæй дарддæр ма уый æмбырд кæны ирон фысджыты базырджын хъуыдытæ, аразы кросвордтæ æмæ нын сæ нæ размæ хæссы газеты фæрстыл. Рауагъта чиныг “Они были первыми”, зæгъгæ, цы ран дзырд цæуы æндæр æмæ æндæр къабæзты Ирыстонæй фыццæгтæ чи уыдысты, уыдоны тыххæй.

Авторæн нæ къухмæ цы ног чиныг райстам, уырдæм хаст æрцыдысты, Ирыстоны зындгонд, номдзыд гоймæгтæй сæ юбилейтæ кæмæн сты, уыдон. Ахæмтæ сты фысджытæ Плиты Харитон (115 азы), Плиты Грис (85 азы) Илас Æрнигон (135 азы), Беджызаты Чермен (125 азы), Гаглойты Владимир (95 азы), Гафез (110 азы), Хъазиты Мелитон (75 азы),  аивады дæснытæ Плиты Христофор (100 азы), Хетæгкаты Георги (120 азы), Мамсыраты Хаджи-Умар (120 азы), ахуыргæндтæ Жорж Дюмезиль (125 азы), Всеволод Миллер (175 азы), Тыбылты Алыксандр (135 азы), Уанеты Захар (135 азы), Гобозты Иван (85 азы), Карсанты Никъала (100 азы), Къусраты Анатоли (70 азы), номдзыд инженер Гаглойты Рутен (135 азы) æмæ бирæ æндæртæ. Æдæппæт 200 адæймаджы бæрц. Уыдонæй бирæтæ абон не `хсæн нал сты, фæлæ сæ рухс нæмттæ, сæ хъуыддæгтæ цæрынц нæ адæмы зæрдæты, иннæтæ та абон дæр бæрзонд хæссынц сæ адæмы фарн æмæ кад. Фæлæ, хъыгагæн, рауайы афтæ дæр æмæ иуæй иуты нæмттæ аззайынц рохуаты. Æмæ хорз хъуыддаг у, автор нын сæ нæ размæ кæй рахæссы æмæ нæ, цыма фæдзæхсæгау кæны, цæмæй сæ ма рох кæнæм.

Чиныг æрмæст нæ номдзыд адæймæгты – юбилярты тыххæй нæ дзуры, фæлæ ма дзы мах базондзыстæм нæ царды чи æрцыдысты æмæ юбилейон аз кæмæн у ахæм ахсджиаг цауты тыххæй дæр. Цæвиттон, 65 азы размæ Цхинвалы районы Дыргуисы хъæу баиу горæт Цхинвалимæ. Уый тыххæй уынаффæ рахаста Хуссар Ирыстоны облæххæстком. Нæ уарзон кинотеатр “Чермен” байгом 50 азы размæ. Сывæллæтты сфæлдыстадон галуан та байгом 70 азы размæ. 30 азы рацыд Зæрæмæг-Дзауы электрохахх эксплуатацимæ лæвæрд куы æрцыд, уæдæй. Уал азы размæ  Республикæ Хуссар Ирыстоны паддзахадон хæдбардзинад банымадта Цæгат Ирыстон. Фæстæдæр, 15 азы размæ та – Уæрæсейы Федераци…

Кæронбæттæны ма нæ чиныджы тыххæй уый зæгъын фæнды æмæ йæ тираж æгæр цъус кæй у – бæрцæй 100 экземпляры. Афтæмæй та цымыдис кæмæ равзæрын кæна, æхсызгонæй йæ йæ къухмæ чи райса, уыдон бирæ фылдæр уыдзысты. Уымæ гæсгæ хорз уаид, ацы хъуыддаг куы бахынциккой чиныгуарзджытæ æмæ радон азтæн ахæм чиныг уадзгæйæ, куы фæфылдæр кæниккой сæ тираж.

                           БЕСТАУТЫ Валя

Comments are closed, but trackbacks and pingbacks are open.