Нæ республикæйы бастдзинады иунæг монополист «Мегафон-Хуссар Ирыстон»-ыл сæххæст 20 азы.
Уый цытæн уагъд цæудзæн цытджын мадзæлттæ, кæцыты хайад райсдзысты Уæрæсейы Федерацийы ЗАО «Остелеком»-ы минæвæрттæ дæр.
Мах фембæлдыстæм «Мегафон-Хуссар Ирыстон»-ы æхсæнадимæ бастдзинады хайады сæргълæууæг Бежанты Заринæимæ. Уый нын радзырдта цыбыртæй сæ куыст æмæ архайды тыххæй.
«Мах регуляронæй уынаффæ кæнæм нæ уæрæсейаг коллегæтимæ, цæмæй «Мегафон-Хуссар Ирыстон»-ы интернет æмæ мобилон бастдзинады лæггæдты фæдыл тарифон опцитæ æмæ лæггæдты гъæд уой нырыккон æмвæзадыл. Кæй зæгъын æй хъæуы, мах хынцæм цæрджытæй бирæтæн сæ бон стыр аргъ фидын кæй нæу, уый. Ацы фарст аскъуыддзаг кæнынмæ здæхт сты махæн дæр нæ архæйдтытæ. Ахæм позици ис нæ офисы директорты советæн дæр. Уыдоны хъуыды дæр у, цæмæй лæггæдты гъæд æмæ тарифтæ кæрæдзийæн дзуапп дæдтой», – загъта Бежанты чызг.
Уый ма компанийы номæй хатыр ракуырдта абоненттæй хатт Кавказы филиалы биллингон системæйы аххосæй аваритæ кæй æрцæуы æмæ цалынмæ локализаци æрцæуынц, уæдмæ информацион технологитæй кæй фæиппæрд вæййынц. Уый тыххæй компани дыууæ азы размæ сарæзта мидадминистративон хайад, кæцы кусы инциденттæ ма æруадзыныл. Цæмæй интернет фæхуыздæр уа æмæ бастдзинад æнæкъуылымпыйæ куса, уый тыххæй та æрцыд стыр ивындзинæдтæ зæронд ифтонггæрзтæ баивыны фæдыл.
«Мегафон Хуссар Ирыстон»-ы коммерцион директор Санахъоты Ларисæ афтæ загъта: «Бынæттон абоненттæ активондæрæй цæмæй пайда кæной «Мегафон»-ы лæггæдтæй, уый тыххæй æппынæдзух бакусæм уæлæмхас тарифтыл. Зæгъæм «М» пакетæй чи пайда кæны, уыцы абоненттæ пайда кæнынц Цæгат Кавказы цы Мегафонтæ ис, уыдонæй дæр. Фæлæ уыимæ иумæ сæ бон у опцитæ баиу кæнын дæр, ома, «Соседние страны», «Легкое путешествие» æмæ æнд. Тарифон плантæй иууыл зынаргъдæр тариф у XXL, фæлæ ацы тариф абонентæн лæвар кæны 200 æнæаргъæй дзурыны минуты 20 гб та интернет-трафик. Тарифон план XL та у видеохостинг. «Мегафон Хуссар Ирыстон» арæх ахизы ног тарифтæм, фæлæ уый тыххæй æхсæнадæн рагацау фехъусын кæны, бамбарын кæнынц абонентæн, цæмæй уыдзæн хуыздæр, уыдæтты тыххæй. Бирæ хатт абонент æнæразыдзинад равдисы, фæнды йæ зæронд тарифон планыл баззайын. Фæлæ абон уа æви сом, уæддæр уыцы тарифтæ нал бæздзысты æмæ сæ мах дæр нал пайда кæндзыстæм. Ног тарифтæм æнцонæй ахизынц фæсивæд, ацæргæ адæмимæ та бахъæуы сæрмагондæй бакусын. Ног пакетты мидис уый мидæг вæййы æмæ абоненттæн æнцондæр у иууон пакет балхæнын, уымæ хауынц телефонæй дзурын æмæ интернет хицæнтæй куы æлхæнай. Ныр уыцы æххæст пакет саразгæйæ, фæхуымæтæгдæр уавæр».
Уый ма радзырдта компанийы ног лæггад «Интернет алы хæдзары дæр»-ы тыххæй. «Мах абонентæн активонæй хъарæм æнæтелæй интернет. Сæрмагонд хæдзæрттæм уыцы лæггæдтæ лæууынц 2 000 мин сом, фæлæ бирæуæладзыгон хæдзæртты фатертæм та у æнæаргъ, æрмæст телефоны хыгъдыл сæвæрын хъæуы 10200 сом. Зæгъын ма мæ фæнды хатт абоненты хыгъдæй æхцайы фæрæзтæ кæй сфыссынц, уыцы системæйы тыххæй. Уыцы къуылымпыдзинæдтæ уыд, фæлæ цау куы сбæрæг вæййы, уæд мах фæстæмæ аздахæм æхцатæ клиенттæн. Уыд ахæм цаутæ æмæ нæ компанийы æдзæсгом кусджытæ махинацитæ куы арæзтой, фæлæ компанийы дирекци сбæрæг кодта уыдон æмæ сæ сæ бынæттæй сæрибар кодта», – загъта Бежанты Заринæ.
УАЗÆГТЫ Марфа
