Республикӕйы цӕрджытӕ цӕттӕ кӕнынц президент ӕмӕ парламентмӕ куырдиат, ӕмбырд кӕнынц къухфыстытӕ. Фӕнды сӕ ног — UTC +4 сахаты рӕстӕгмӕ рахизын. 2002 азӕй фӕстӕмӕ цӕрынц Мӕскуыйы рӕстӕгмӕ — UTC +3 сахатмӕ гӕсгӕ. 2014 азӕй фӕстӕмӕ та сӕрдыгон ӕмӕ зымӕгонмӕ нал ивтой. Ныр курӕг сты рӕстӕг сахат раздӕр раивын.
«Географион» рӕстӕгмӕ рахизыны хъӕппӕрис фӕзынд 2017 азы. Уӕрӕсе 2014 азӕй фӕстӕмӕ цардис зымӕгон рӕстӕгмӕ гӕсгӕ. Ӕхсӕнадон архайӕг Пухаты Аллӕйы ныхӕстӕм гӕсгӕ, уый адӕмыл фӕбӕрӕг ис. Уый сæрмагондæй банысан кодта, ног рӕстӕгмӕ рахизыны куырдиатимӕ сӕм бирӕтӕ кӕй ӕрбадзурынц:
«Адӕмы ӕнӕниздзинадыл фӕзыны. Бирӕтӕ боныцъӕхы райхъал вӕййынц. Ӕрдзон ӕмӕ амынд рӕстӕг хицӕн кӕй кӕнынц, уый сӕ хъыгдары, сӕхи ивын сын тынг зын у».
Уый аххосӕй ацӕргӕ адӕмы дзӕвгар хай тыхсынц туджы бӕрзонд ӕлхъывдадӕй, кӕмӕндӕрты фæзыны невроз дæр.
Фӕлӕ зӕрдӕйы низты дохтыр, кардиолог Хъороты Светланӕ куыд радзырдта, афтӕмӕй ахӕм рӕстӕгыл цӕрджытӕ фӕцахуыр сты:
«Рӕстӕджы раив-баив искӕуыл фӕзынд ӕмӕ уый аххосӕй медицинон ӕххуысагур исчи ӕрбацыд, зæгъгæ, ахӕм цау æз нӕ хъуыды кӕнын».
Ӕхсӕнадон архайджыты хъуыдымӕ гӕсгӕ, рӕстӕг куы раивой, уӕд республикӕйӕн фадат уыдзӕн электрон тых фӕстауӕрц кӕнӕн. Уыцы хъуыдыйӕн паддзахадон куыстуат «Энергоресурс Южная Осетия»-йы генералон директор Лена Рагимовамӕ ис дзуапп. Куыд ӕмбарын кӕны, афтӕмӕй республикӕйы сæудæджерадон къабаз, афтæ зæгъæн ис æмæ нæй. Хи хӕдзӕртты ӕмӕ фатерты та электрон тых фылдӕр уазалгӕнӕнтӕ ӕмӕ хъармгӕнӕн ӕгтӕн хъӕуы:
«Рӕстӕг ивдзӕн ӕви нӕ, уый сыл нӕ фӕбӕрӕг уыдзӕн. Раздӕрау, уыцы-иу рӕстӕг кусдзысты. Энерги фӕстауӕрцгӕнӕн рухсгӕнӕн цырӕгъты кой кӕнгӕ дӕр нӕ кӕнын. Зӕронд нымайӕн прибортӕ сӕ нӕ хынцынц».
Цӕмӕй ӕхсӕнадон архайджыты фӕндон размӕ ацӕуа ӕмӕ йӕм Парламенты ӕркӕсой, уый тыххӕй сӕ хъӕуы мин къухфысты сӕмбырд кӕнын.
ТГ «САПÆ»
