Хуссар Ирыстон сириаг бизнесментæн ратдзæн уæрæх преферацитæ

РХИ-йы Экономикон рæзты министрады сæргълæууæг Кокойты Геннади радзырдта Сирийы профилон министрадимæ къухтæ цы сразыдзинадыл æрфыстой, уый тыххæй.

«Хуссар Ирыстон æмæ Сирийæ продукци æрбаласыны тыххæй таможнæйон фиддонтæ къаддæр кæнынц 75 проценты. Уымæй дарддæр ма нæ республикæйы бизнес райтынг кæнын кæй фæнды, уыдонæн лæвæрд æрцæудзысты уæрæх гæнæнтæ æмæ преферацитæ, инвестицион фадыджы хатырон хуссарирыстойнаг закъондæттынад хынцгæйæ», – банысан кодта министр.

Кокойты Геннади зæрдыл æрлæууын кодта, зæгъгæ, Сиримæ Хуссар Ирыстоны делегацийы æрæджыйы балцы рæстæджы къухтæ æрфыстæуыд базарадон-экономикон, зонадон-техникон æмæ культурон фадгуыты æмгуыстады тыххæй сразыдзинадыл. «Дыккаг сразыдзинады фæлгæтты ист æрцыд уынаффæ дыууæ бæстæйы иумиаг къамис саразыны тыххæй», – загъта министр.

Экономикон рæзты министр ма радзырдта уыцы здæхтыты тыххæй, кæцытæ приоритетон сты дыууæ республикæты экономикон æмгуыстады планы. «Дзурæн ис туристон-рекреацион иумиаг экономикон секторы рæзты фадæтты тыххæй. Уымæй дарддæр ма Сирийы ис сæудæджерадон зонæтæ, цыран уагъд цæуы бæрзондтехнологон продукци дæр, кæцымæ махæн нæ бон у ориентаци кæнын. Ис иумиаг куыстуæттæ сорганизаци кæныны фадæттæ дæр», – радзырдта Кокойты Геннади.

Кокойы фырты ныхæстæм гæсгæ, Сириаг Адæмон Республикæйæн ис фаг бæрзонд экономикон потенциал. «Сирийы уæззау æфсæддон-политикон уавæр бæстон кæны, практикон æгъдауæй республикæйы æппæт территори сæрибар æрцыд террористтæй. Гæнæн ис афтæ зæгъæн, æмæ республикæ кæй æрлæууыд сабырадон рæзты фæндагыл.  Сири у регионы егъаудæр паддзахадтæй сæ иу, кæцыйы цæрджыты нымæц у 17 милуан адæймаджы, æмæ йын, кæй зæгъын æй хъæуы, ис фаг бæрзонд экономикон потенциал», – банысан кодта Кокойты Геннади.

Министр ма йæ ныхасмæ бафтыдта, зæгъгæ, Хуссар Ирыстон цымыдис кæны республикæмæ инвестицитæ æрбакæнынмæ, уыцы нымæцы Сирийæ дæр.

«Сирийы иу кæнæ иннæ районы хæстон архайдтытæ фæуыны фæстæ уайтагъд кусын райдайынц куыстуæттæ, базар, лæггæдты фадыг, хъæууонхæдзарадон фадыг. Бæрæг у, уым цæрджыты экономикон активондзинад бæрзонд кæй у, уый», – банысан кодта Кокойты Геннади.