Арæзтадон-цалцæггæнæн куыстытæ æххæст цæуынц нæ горæты Ленингоры уынджы. Ацы уынг дæр арæзт цæуы Хуссар Ирыстоны Инвестицион программæйы фæлгæтты. Дзæвгар азты дæргъы уыд æдзæллаг уавæры æмæ зындзинæдтæ æвзæрстой куыд йæ цæрджытæ, афтæ уынгыл цæуджытæ æмæ машинæты шофыртæ дæр. Ныр æрхæццæ уый рад дæр – аразджытæ йæм æрывнæлдтой июлы мæйы æмбисы.
Куыд иннæ уынгты, афтæ ам дæр фыццаг рады куыстытæм æрывнæлдтой “Водоканал”-ы кусджытæ. Баивтой канализацион æмæ доны хæххытæ. Уый фæстæ арæзт æрцыдысты газы хæтæлтæ. Зæронд телцæджындзты баивтой ногтæй. Ныр та фæндагаразджытæ æрывнæлдтой бордюртæ æмæ тротуарты арæзтадмæ.
Уынджы арæзтады прораб Быценты Давид куыд зæгъы, афтæмæй сæ куыст райдайынц райсомæй 7 сахатыл æмæ суанг изæрдалынгтæм сæ архайд нæ æруромынц. Кусынц æнæзæрдæхудтæй. Æмбарынц, сæхи адæмæн æй кæй аразынц, уый. Се ‘ппæт дæр хорз архайынц, фæлæ уæлдай раппæлыны аккаг сты Плиты Хох, Æлборты Алан, Харебаты Михаил æмæ шофыр Мамытаты Рома.
Кусджытæ ифтонг сты техникæйæ æмæ арæзтадон æрмæджытæй. Уымæ гæсгæ æппæт куыстытæ дæр цæуынц графикмæ гæсгæ. Ныфс сæ ис, сентябры мæймæ цæттæ кæй уыдзæн асфальт кæнынмæ.
Уынджы цæрджытæ райгонд сты аразджытæй сæ иузæрдион архайды тыххæй æмæ сын зæгъынц бузныг.
Бестауты Валя
