Анахарсисы номыл Хуссар Ирыстоны национ библиотекæйы уагъд æрцыд Ирыстоны хъæбатыртæ Багаты Амиран æмæ Джиоты Азæмæты тыххæй мысæн изæр.
Мысæн изæры хайад райстой хъæбатырты æввахс хиуæттæ, сæ зонгæтæ, се ʻмхæстонтæ, кадетон скъолайы ахуыргæнинæгтæ, ахуыргæнджытæ æмæ Хуссар Иыстоны паддзахадон университеты лектортæ æмæ студенттæ.
Мадзал амонджытæ Хуыгаты Вадим æмæ Дзæгъиаты Аланæ кæрæдзи ивгæйæ дзырдтой, зæгъгæ, æрбалæууыдысты та Хуссар Ирыстоны адæмы тугкалæн æмæ уæззау хъизамæйраг мысæн бонтæ. Сабыр фынæй горæтмæ, æмткæй нæ республикæмæ радон хатт Гуырдзыстоны фашизмы къух куы æрбахæццæ, æмæ æртыккаг хатт ирон адæмæн геноцид куы сарæзтой, уыцы уæззау бонтæ æрымысыны рæстæг. Кæд, зæгъгæ, уæдæй рацыд цыппæрдæс азы, уæддæр абон дæр, уыцы уæззау тугкалæн нывтæ сыстынц нæ адæмы цæстыты раз æмæ сæ фæмысæм æнкъард æмæ æрхæндæг зæрдæйы уагимæ.
2008 азы 8-æм августы райсомы фондз сахатыл Амиран æмæ йæ къорды уæнгтæ лæууыдысты Присы хъæумæ хæстæг. Фæлæ уавæр мæгуыраудæр уыд горæтæн ныгуылæн фарс æмæ ратагъд кодтой, уырдæм. Фараст лæппуйæ гуырдзиаг фыдгæнджытимæ бацыдысты мæлæтдзаг тохы. Уыцы тохты кæд фыццаг Амиран, фæстæдæр та Азæмæт фæмард, уæддæр къорды иннæ уæнгтæ, гуырдзиаг фыдгæнджытæн фадат нæ радтой сæ фæндтæ кæронмæ сæххæст кæнынæн.
Мадзал амонджытæ бахатыдысты залы уæвджытæм, цæмæй Амиран æмæ Азæмæт, стæй иннæ фæмардуæвæг ирон хъæбатырты нæмттæ ссарой иу уысм æмырæй алæугæйæ.
Уый фæстæ мадзал уадзджытæ банысан кодтой, зæгъгæ, Амиран æмæ Азæмæт сæ амæлæты фæстæ хорзæхджын æрцыдысты «Уацамонгæ»-йы ордентæй. Уыимæ ма фехъусын чындæуыд, зæгъгæ, Цхинвалы кадетон скъолайæн лæвæрд æрцыд Багаты Амираны ном, рауагъдонты къордтæ та хæсдзысты Джиоты Азæмæты ном.
Мадзалы уыдысты æмæ дзы раныхас кодтой паддзахадон университеты уырыссаг литературæйы кафедрæйы сæргълæууæг Пæррæстаты Мананæ, хъахъхъæнынады министры хæдивæг Æлборты Игорь, кадетон скъолайы директор Баликоты Фатимæ æмæ Анахарсисы номыл Хуссар Ирыстоны национ библиотекæйы директор Кокойты Валерия. Уыдон се ‘ппæт дæр залы уæвджытæн дзырдтой Ирыстонæн рæсугъд сомбон чи сифтонг кодта, уыцы хæстонты архайд æмæ хъæбатырдзинады тыххæй. Раныхасгæнджытæ домдтой, цæмæй нæ хъæбатырты тыххæй дзурæм нæ æрыгон фæлтæрæн.
Гæззаты Иван
Comments are closed, but trackbacks and pingbacks are open.