Хуссар Ирыстоны Россотрудничествойы ног хистæр ссис Сергей Комиссаров.
Уый ацы бынаты баивта Сергей Скворцовы, кæцыйæн республикæйы фæцис йæ дипломатон куыст.
Россотрудничествойы ног хистæры республикæйы Президент Гаглойты Аланимæ базонгæ кодта Уæрæсейы минæвар Хуссар Ирыстоны Марат Кулахметов.
Гаглойты Алан банысан кодта, республикæйы къухдариуæгад алыварсон æххуыс кæй кæндзæн минæварадæн, цæмæй Уæрæсеимæ ахастытæ уой фидардæр æмæ рæзой.
«Минæварад кусы 2010 азы сентябрæй æмæ реализаци æрцыд бирæ мадзæлттæ ахуырадон, зонадон æмæ æндæр фадгуыты. Алы хатт дæр цæттæ дæн, фæсивæды рæзтæн цы проекттæ ис, уым баххуыс кæнынмæ», – загъта Президент.
Комиссаров бузныг загъта паддзахады сæргълæууæгæн йæ хъарм химæрайсты тыххæй.
«Æхсызгон мын у, мæ бæстæ мыл кæй баууæндыд йæ интерестæ æвдисын Хуссар Ирыстоны, Уæрæсейæн хæларадон бæстæйы. Æз æй æмбарын, мæнмæ æппæт структурæты кæй æнхъæлмæ кæсы алыварсон æххуыс», – загъта уый.
Комиссаров банысан кодта, зæгъгæ, минæварад адарддæр кæндзæн республикæимæ гуманитарон, зонадон, бæcтæйы ахуырадон процессы рæзтæн æххуыс.
