Хуссар Ирыстон æмæ Уæрæсейы Федерацийы Хъахъхъæнынады министрадты æхсæн сразыдзинадмæ гæсгæ хуссарирыстойнаг æфсады иу къорд хизы Уæрæсейы Гарзджын тыхты рæнхъытæм.

Ацы сразыдзинады хорздзинады тыххæй æрæджы информагентад «Спутник»-ы пресс-центры эксперты хуызы йæ хъуыдытæ дзырдта РХИ-йы Информаци æмæ мыхуыры паддзахадон комитеты сæрдар Хъотайты Мария. Уый стыр æнтыстыл банымадта, æфсæддон службæгæнджытæн сæ раздæры цинтæ æмæ службæйы азтæ хъахъхъæд кæй цæуынц, уый. Ацы пункт сразыдзинады уый размæ нæ уыд, фæлæ уæрæсейаг коллегæтимæ бадзырдты фæстиуæгæн Хуссар Ирыстоны къухдариуæгады къухты бафтыд уый рараст кæнын. Хъотайты чызг зæрдыл æрлæууын кодта, Хуссар Ирыстоны Парламент кæй сратификаци кодта Уæрæсейы Федерациимæ  хуссарирыстойнаг æфсады хицæн дæлхæйтты Уæрæсейы Гарзджын тыхты скондмæ бакæныны фæткы тыххæй 2017 азы июлы мæйы сразыдзинад. Аивгъуыйгæ къуыри æнгæс къахдзæф сарæзта Уæрæсейы Федерацийы Паддзахадон Думæ.

Информацийы комитеты сæргълæууæджы ныхæстæм гæсгæ Æмцæдисад æмæ интеграцийы фæдыл бадзырды фæлгæтты къухтæ цы сразыдзинады проектыл фыст æрцыд, уый республикæйы цæрджыты ‘хсæн бирæ ныхмæвæрд æмæ алыгъуызон хъуыдытæ æвзæрын код-та. Бирæты хъуыдымæ гæсгæ та «сразыдзинадæй не ‘фсад куынæг æрцæудзæн, æмæ нын уæд бахъуаджы рæстæг нæ бæстæ чи бахъахъхъæндзæн».

Хъотайты чызг бамбарын кодта, дзырд кæй цæуы æрмæстдæр бæстæйы Хъахъхъæнынады министрады реформæйыл, ома, министрады хицæн дæлхæйттæ 4-æм æфсæддон базæмæ кæй хизынц, уый нысан кæны афтæ, æмæ не ‘фсæддон службæгæнджытæ æмхуызон службæ кæндзысты бæрæг хуыздæр уавæрты, бæрæг бæрзонддæр материалон æгъдауæй ифтонг æмæ социалон хатыртæй пайдагæнгæйæ.

Комитеты сæргълæууæджы ныхæстæм гæсгæ, сразыдзинадæн æрмæст æфсæддон æмæ политикон нысаниуæг нæй, фæлæ ма йын ис ахсджиаг социалон нысаниуæг дæр, уымæн æмæ ахъазгæнæг уыдзæн æфсæддон службæгæнджытæ æмæ сæ бинонты царды уавæртæ хуыздæр кæнынæн.

Уымæй дарддæр ныхасгæнæг хъусдард аздæхта сразыдзинады æндæр фарстмæ, ома, уымæ гæсгæ хъомысджындæр кæндзæн Хуссар Ирыстоны Хъахъхъæнынады министрады материалон-техникон ифтонгад.

«Сразыдзинад бафыссыны фæстæ министрад материалон-техникон æгъдауæй ифтонг куы цæуа, уæд уый æфсады райрæзтæн у стыр разæнгардгæнæг. Уæд не ‘фсад суыдзæн ноджы мобилондæр æмæ фæткыл хæст», – ахæм у Хъотайты Марияйы хъуыды.

Абоны бон Гуырдзыстоны ‘рдыгæй æфсæддон тæссагдзинад кæд карз нæу, уæддæр Гуырдзыстоны цы æфсæддон ахуыртæ уагъд фæцæуы æмæ НАТО-йы æххуысæй гуырдзиаг æфсад ифтонг кæй цæуы ны-рыккон æхсæнгæрзтæй, уый хуссарирыстойнаг фарсы дæр хæсджын кæны, цæмæй бæрæг къахдзæфтæ сараза, хъуамæ хуыздæр цæттæ æмæ ифтонг цæуой. Кæдфæндыдæр хъуамæ уой цæттæ.

«2008 аз макуыуал хъуамæ æрцæуа фæлхатт. Хæстон архайдтыты тæссагдзинæдтæ хуыдуг æрцыдысты, фæлæ уæддæр «кæд сабырадмæ тырныс, уæд дæхи цæттæ кæн хæстмæ», афтæ фæдзурынц, æмæ мах дæр уыцы хъуыдыйыл хæст хъуамæ уæм», – дзырдта ныхасгæнæг.

Уый ма информацион фæрæзты хъусдард аздæхта, фæстаг рæстæджы Турчы æмæ Афганистаны цы цаутæ цæуы, уыдонмæ. Бабаста сæ Уæрæсейы президентон æвзæрстытимæ, зæгъгæ, гæнæнæн ис æмæ гуырдзиаг фарсæрдыгæй дæр фæзына провокацитæ. Уымæ гæсгæ мах цæттæ хъуамæ уæм æппæтмæ дæр.

Нæ уацх.

Comments are closed, but trackbacks and pingbacks are open.