«Аттестаци у барвæндон хъуыддаг – кæд дæ ныфс хæссыс тестон экзаментæ раттынмæ, уæд бафæлвар. Кæннод дæр æгуыстæй нæ баззайдзынæ», – зæгъы Æнæниздзинад æмæ социалон райрæзты министры хæдивæг Сиукъаты Родион.

Медицинон кусджыты куыстмызд баст вæййы аттестациимæ. Цæмæй мызды æдде уæлæмхас æфтиæгтæ бафта кусæгмæ, уый тыххæй йын æнтыстджынæй аттестаци рацæуыны фæстæ лæвæрд æрцæуы квалификацион категори. Ацы категори йæ тыхы вæййы 5 азы æмгъуыдмæ æмæ та йæ стæй нæуæгæй хъуамæ сфидар кæнай. Æрæджы медицинæйы къабазы кусджытæ сæ мыздтæ райстой цухгондæй æмæ куыд рабæрæг, афтæмæй уый дæр баст уыд аттестациимæ – 1 январы фесты сæ квалификацион категориты æмгъуыдтæ æмæ сын уæлæмхас фиддонтæ нал снысан кодтой. Медицинон персонал фæстаг хатт аттестаци рацыдысты 2018 азы æмæ та ацы азы райдианы æрхæццæ сæ ног тестон экзаменты рæстæг. Сиукъаты Родионы ныхæстæм гæсгæ, ныридæгæн аттестаци æнтыстджынæй чи рацæуа, уыдонæн фæлхыгъд сараздзысты 1 январæй.

Медицинон кусджытæ аттестаци цæуынц Цхинвалы медицинон училищейы бæстыхайы. Ныры онг уал дзы тестон экзаментæ радтой æртæ къордæй æмæ фæстæдæр аттестацион къамис фæндон рахæсдзæнис, кæмæ æмбæлы квалификацион категори снысан кæнын, уый фæдыл. Тесттæ конд сты дыууæ хайæ – иумæйаг-медицинон æмæ санитарон-эпидемиологон режимы къабазты фарстатæй. Сиукъаты Родионы ныхæстæм гæсгæ ацы тестты фæрцы рабæрæг уыдзысты медицинон персоналы хъæндзинæдтæ æмæ  министрады къухдариуæгадæн фидæны æнцондæр уыдзæнис квалификаци фæбæрзонддæр кæныны программæ бацæттæ кæнын. Медицинон хотæн квалификаци фæбæрзонддæр кæныны курсытæ райдайдзысты ацы аз сентябры мæйы.

Сиукъаты Родион ма банысан кодта, зæгъгæ информацион ресурсты дам-думтæ цæуынц, ома, мецицинон къабазы кусджытæй чидæртæ æгуыстæй аззадысты.

«Иу адæймаг дæр йæ куыст нæ фесæфта æмæ нæм дарддæр дæр нæй искæй куыстæй ссæрибар кæныны фæнд. Ацы аттестаци та у æнæмæнгхъæуæг, фæлæ барвæндонæй у. Мах медицинон уагдæтты хистæрты рагацау бафæдзæхстам, цæмæй сæ кусджытæй кæй фæнды квалификацион категоритæ райсын, уыдон-иу рагацау бацæттæ кæной хъæугæ документаци. Нырæй фæстæмæ-иу искæмæн йæ квалификацийы æмгъуыд куы æрхæццæ уа, уæд-иу ын развæлгъау фехъусын кæндзыстæм, цæмæй-иу йæ мызд цухгондæй мауал райса», – загъта министры хæдивæг.

Аттестацион къамисы уæнгтæ сты – Республикон бирæпрофилон медицинон центры директоры хæдивæг Тасойты Кларæ, уæрæсейаг специалист Чумакова Ольга æмæ къамисы секретарь Сохугова Светлана. Медицинон пер-соналмæ кæд исты проблемон фарстатæ  фæзына сæ куысты процессы, кæнæ тестон экзаменты рæстæджы, уæд министрады къухдариуæгад кæддæриддæр цæттæ у сæ фарсмæ балæууынмæ. Æрмæст сæ претензитæ хъуамæ уой гæххæттыл фыст. Ныридæгæн уал аттестаци чи рацыдис, уыдонæй райгонд сты къамисы уæнгтæ. Ольга Чумаковайы ныхæстæм гæсгæ медицинон хотæ хорз цæттæ уыдысты, сæ хæслæвæрдтæ æнæаиппæй сæххæст кодтой. Ацы мæйы ма аттестаци рацæудзысты дохтыртæ дæр.

Медицинон хо Джиоты Индирæ тестон экзаменæй рахизгæйæ, загъта, ома дзы зынæй ницы ис, æрвылбонон куысты цæуыл æмбæлынц, уыдонимæ баст сты фарстатæ иууылдæр.

«Мæнмæ гæсгæ дзы тæрсын нæ хъæуы, уæлдайдæр та, фæлтæрд кусæг куы уай, уæд. Аттестаци рацæуын бафæлвæрдтон æмæ кæд райсон квалификацион категори, уæд хорз, кæннод дæр нæ хъынцъым кæндзынæн», – зæгъы Индирæ.

Æрæджы æнамонд цау æрцæуыны фæстиуæгæн æхсæнгарзы нæмыг цы цыппараздзыд сывæллоныл сæмбæлд, уый фæдыл Сиукъаты Родион фехъусын кодта, ома, хуыздæр кæны йе ʻнæниздзинад.

«Стыр бузныджы ныхæстæ мæ фæнды зæгъын хирургтæ Мæргъиты Георги æмæ Джиоты Сосланæн, стæй ма анестезиолог Юлия Поляхова æмæ операцион медицинон хо Пухаты Светланæйæн. Сывæллонæн фæхъыгдард сты йæ мæкъуыстæг, игæр æмæ тъæнгтæ  æмæ тынг уæззау операци сарæзтой бæрзонд, профессионалон æмвæзадыл. Ныридæгæн дæр сывæллоны уавæр у уæззау æмæ йе ‘ввахс хиуæтты фæндонмæ гæсгæ дарддæр хос кæнынмæ конд æрцыд республикæйы æддæмæ», – фехъусын кодта Сиукъаты лæппу.

Джиоты Алыксандр

Comments are closed, but trackbacks and pingbacks are open.